Ich^a) Kathrin von Ramswag¹ herr Hainrichs von Lochen² von Raitnow³ ritter elichú wirtenn kúnd vnd vergich offenlich fúr den obgenanten || minen wirt, won der in landez nit ist, vnd fúr mich vnd fúr v´nser baider erben an disem brief allen, die in ansehent oder || ho^erent lesen, won die erwirdig gaischelich in got min gna^edig frow fro Angnes von Wolfurt a^ebtissenn v´nser frowen gotzhus || ze Lindow⁴ vnd daz capitel gemainlich korherren vnd korfrowen dez selben gotzhus angesehen hant dez obgenanten mines wirtes vnd min vnd v´nser frúnt bet vnd dienst vnd v´ns v´nser tochter Klaren ze ainer korfrowen vfgenomen vnd enpfangen hant, vnd vmb die gnad vnd gůta^et, so si v´ns damit getân vnd erzaigt hant, dar vmb so han ich fúr den obgenanten minen wirt vnd fúr v´nser baider erben gelobt mit miner trúw in aidez wise, waz wir rechtes vorderung vnd ansprach hettend ald noch han vnd gewinnen mo^echtend ze den erwirdigen fro Kathrinen von Trisen wilent a^ebtissenn⁵ vnd ze dem capitel dez obgenanten gotzhus vnd ouch ze dem selben ir gotzhus von dez schaden wegen, so wir ietz genomen hant oder noch nemen vnd enphahen mo^echtend von der pfrůnd wegen der obgenanten v´nser tochter, wie der schad dauon ietz dargelouffen ist ald noch dauon darkomen vnd entstân mag, ez si von brief wegen dez babstes dez kaisers dez bischofs oder ander herren vnd lút ald von zerung von klag von boten oder von v´nser frúnd vnd helffern wegen ald von andern sachen wegen, wie daz ietz darkomen ist ald noch darkomen mo^echt, dez schaden allez han ich fúr den obgenanten minen wirt vnd fúr mich vnd fúr v´nser baider erben v´ns gen inen vnd gen irem gotzhus luterlich verzigen, vnd verzih v´ns dez gen inen mit disem brief, daz wir noch v´nser erben noch nieman ander von v´nseren wegen noch dehain v´nser frúnd noch helffer si noch ir obgenant gotzhus von dez selben obgeschriben schaden vnd rechtez wegen niemer fúro súllent bekúnbern noch angesprechen weder mit gaischelichem noch mit weltlichem gericht noch mit dehainen andern sachen, vnd súllent och vmb die selben geschieht der obgenanten a^ebtissenn vnd dez capitels vnd wer von ir wegen darzů behaft waz, richer vnd armer, wie die genant sint, vnd herr Chůnratz von Wolfurt ritter⁶ gůt frúnd sin vnd all v´nser frúnt diener vnd helffer ze frúnden gewinnen ân geuerd vnd dez ir recht weren sin. Vnd han inen vmb die vorgeschriben sach zů mir vnd och fúr den obgenanten minen wirt vnd fúr v´nser erben vnd fúr alle vnser frúnd vnd helffer ze merrer sicherhait ze rechten geweren gesetzt die vesten lút herr Eglolf von Roschach ritter⁷, Frikken von Lochen, Chůnrat von Wiler⁸ vnd Hainrich den Súryen⁹ alle vnuerschaidenlich mit so^elichem gedinge, wery daz die vorgeschriben fro Angnes a^ebtissenn daz capitel vnd ir gotzhus vnd ir helffer rieh vnd arm, wie die genant sint, die von wilent fro Kathrinen a^ebtissenn vnd von iro aller wegen ze den obgenanten sachen behaft gewesen sint, von dehainer obgeschribener sach vnd geschieht wegen dehainen schaden na^emint vnd enpfiengint, wie der darka^emi, den schaden súllent der obgenant min wirt vnd ich vnd die obgenanten geweren vnd v´nser aller erben inen vnd och denen, den der schad beschicht, vnuerzogenlich vnd och gar vnd gentzlich ablegen vnd vsrichten ân allen iren schaden, vnd ta^etind wir vnd die geweren vnd v´nser aller erben dez nit, so sont vnd mugent die vorgenanten fro Angnes a^ebtissenn vnd daz capitel vnd ir nachkomen vnd ir gotzhus vnd die, den so^elich geschicht vnd schad denne beschehen ist, vnd iro aller helffer mich vnd den obgenanten minen wirt vnd die obgenanten geweren vnd v´nser aller erben dar vmb denn angriffen pfenden vnd no^eten an v´nsern lúten vnd gůten mit gaischelichem vnd mit weltlichem gericht, wie vnd wa si mugent, in stetten in gerichten vnd vf dem land vnd och úber alle búnde burgerrecht frihait gesetzten vnd lantfrid alz uil vnd alz dik, v´ntz dz inen der vorgeschriben schad vnd waz dauor geschriben ist, gar wirt vsgericht vnd vergolten, ân allen ir schaden. Ka^emint si och dez selben pfendentz vnd no^etentz ze schaden ald ob si hie von schaden werdent nement von klag von zerung von boten Ion von brieuen oder von andern sachen, den schaden súllent ich vnd der obgenant min wirt vnd die vorgenanten geweren vnd v´nser aller erben inen och gar abtůn vnd vsrichten ân ir schaden. Wenn och der vorgenant min wirt herr Hainrich von Lochen ze land kumpt, so súllent ich vnd die obgenanten geweren vnd v´nser aller erben in denn ze mal vnd vnuerzogenlich darzů wisen vnd bringen, dz er sich mit sinem offenn brief aller vorgeschribener sach denn bind, die sta^et ze haltend vnd ze habent ân geuerd in aller der wise, alz wir v´ns dez ietz an disem brief gebunden habint, ân geuerd, vnd ta^etind wir dez nit, so sont die obgenant a^ebtissenn vnd dz capitel vnd ir helffer mich vnd den selben minen wirt vnd die obgenanten geweren vnd v´nser aller erben dar vmb denn angriffen pfenden vnd no^eten, alz dauor vmb den schaden beschaiden ist, v´ntz daz der selb herr Hainrich von Lochen sich aller vorgeschribener ding mit sinem brief bindet, alz vorgeschriben ist. Ich vnd der selb min wirt vnd vnser e´rben súllent och die vorgeschriben geweren vnd ir erben von dirre vorgeschribener gewerschaft ân allen ir schaden von entlo^esen, vnd ob si aber hie von schaden nement, den schaden súllent wir vnd v´nser erben inen vnd iren erben och gar abtůn ân ir schaden. Dirre vorgeschribener ding ze vrkúnd der warhait habint ich vorgenantú Kathrin von Ramswag vnd och wir die vorgenanten geweren Eglolf von Roschach ritter, Frik von Lochen, Chůnrat von Wiler vnd Hainrich Súry disen brief mit v´nseren aigenen insigeln besigelt. Geben ze Lindow am nechsten dvnrstag nach sant Jacobs tag nach Cristus gebúrt drúzehenhvndert vnd sechtzig iar, donach in dem achtenden iar.

Source Fulltext: Chartularium Sangallense VIII, Nr. 5141, S. 311-312.