Ich Wilhalm hern Růdolfs sun vnd ich Wilhalm Wilhelmes sun von End geuettern fryen || veriehen vnd tůn chunt offenlich mit disem brief allen den, die in sehent ho^erent oder lesent, || als der hochgeborn fúrst weilent herczog Růdolf von O^esterreich vns mit gewalt angewan die || vest Grymmenstain zů den zeiten, do ich Wilhalm der elter in seinen vngenaden was, vnd darnach recht vnd redlich kouft den tail an derselben vest, der vnsern lieben vettern hern Eczlen von End korherren vnd schulmaister ze Brichsen angehort, hat nv der hochgeborn fúrst vnser lieber gnêdiger herre herczog Leupolt ze O^esterreich von besundern gnaden vnd durch vnserr dienst willen vnd ouch durch vleizzig pet erberer herren vnd vil ritter vnd knecht vns die vorgenant vest Grymmenstain gar vnd gantz widergegeben, vnd haben wir die vnd was darczů geho^eret von im emphangen zů rechtem purchlehen. Da von haben wir gesworn gelert vnd gestalt ayde zů den heiligen fúr vnsselb vnd vnser erben, daz wir wider die hochgeborn fúrsten vnser lieb gnêdig herren herczog Albrechten vnd den egenanten herczog Leupolten von O^esterreich gebru^eder, ire land vnd lêwt nymmer getůn noch sein wellen in dhainen weg vnd daz die vorgenant vest Grymmenstain sol ir vnd irer erben offen haus sein wider aller mêniklich nyeman auzgenomen, si vnd die iren darin vnd darauz ze lazzen vnd ouch darinn ze enthalten, wenn si des bedúrffen, an geuêrd. Vnd súllen wir vnd vnser erben in vnd irn erben darczů getrew vnd gewêrtig sein in ander weg als vnsern rechten lehenherren vnd als landes vnd purchlehens recht ist. Vnd des ze vrchund hiezzen wir vnsere insigel henken an disen brief. Der geben ist ze Mattray an sand Andres tag des heiligen zwelfpoten nach Kristes gebúrd drewczehen hundert iar, darnach in dem acht vnd sechtzigistem jar.

Source Fulltext: Chartularium Sangallense VIII, Nr. 5158, S. 328-329.