Allen den, die disen brief ansehent lesent oder ho^erent lesen, tůn ich Anna vom Toss¹ Dietrichs Windeggers² elichi husfrow kunt || vnd vergich offenlich mit disem brief, das ich mich erfarn hân, das ich zů den lúten, so Johans sa^elig vom Toss³ min brůder gelassen || hatte, die von dem gotzhus ze sant Gallen sin lehen warent, nút rehtes hân, vnd darumb so hân ich mich mit gůter vorbetrahtung || willeklich vnd frilich mit des selben Dietrichs mines elichen mannes willen vnd gunst verzigen vnd verzih mich mit disem brief fúr mich fúr alle min erben gen dem erwirdigen minem gena^edigen herren abt Georien von gottes gnâden abt des gotzhus ze sant Gallen⁴ gen sinen nahkomen vnd gen dem selben gotzhus, als reht sitte vnd gewonlich was, aller reht vordrung vnd ansprach, so ich min erben ald der selb Johans sa^elig min brůder zů den selben lúten zů ir lip ald zů ir gůt hatte oder hernach iemer gehân gewinnen oder erwerben mo^eht von reht oder von gewonhait oder von dehainen andren sachen. Vnd des ze ainer warhait henk ich Anna vom Toss da vorgenemt min insigel an disen brief. Darnach vergich ich Dietrich Windegger da vorgenemt ain gantz warhait aller diser vorgeschriben ding vnd das die vorgenemt Anna min elichi husfrow sich der vorgeschriben lút mit minem gůten willen vnd gunst verzigen hat gen dem vorgenemten minem herren abt Georien sinen nahkomen vnd gen dem gotzhus ze sant Gallen, als vorgeschriben stat. Vnd ze merer sicherhait der selben ding henk ich och min insigel an disen brief. Der geben ist ze Wil⁵ an dem na^ehsten samstag nâh sant Agten tag in dem jar, do man zalt von gottes gebúrt drúzehenhundert iar, sehzig iar vnd darnach in dem núnden jare.

Source Fulltext: Chartularium Sangallense VIII, Nr. 5163, S. 332.