Wir Geori von gottes gnâden abt¹ vnd das cappittel gemainlich des gotzhus ze sant Gallen, das ân mittel dem stůl || ze Ro^vme zůgeho^ert, kúnden vnd veriehen offenlich mit disem brief fúr vns vnd fúr alle vnser nachkomen allen, die in sehent lesent oder ho^erent || lesen, das wir ainhelklich mit gůter vorbetrahtung vnd willeklich durch fúrdrung gottes dienstes vnd durch des wolerbornen herren || grauen Friderichs von Zolr² herren ze Schalksburg³ ernstlichen bett willen den closnerinen vnd der closen ze sant Margarethunhusen⁴ das gůt ze Ka^esental⁵, das swo^ester Agneten von Ka^esental vatter waz, gebent vnd besta^etent mit disem brief eweklich ze habenn vnd ze niessenn also vnd in dem rehten, das dis geben vnd besta^eten vns noch vnsren nachkomen noch vnserm egenemten gotzhus an allen vnsren zinsen vnd rehten, so vns von dem selben gůt gânt vnd ja^erlich werden sont, gantzlich vnscha^edlich sin sol. Vnd das dis also sta^et vnd sicher sie vnd belib, so haben wir abt Geori vnd das cappittel gemainlich da vorgenemt vnser vnd vnsers conuentes insigel gehenkt an disen brief fúr vns vnd fúr alle vnser nachkomen. Dirre brief ist geben in vnser stat ze sant Gallen an sant Mathyas abent des zwelffbotten in dem jâre, do man zalt von Cristus geburt drúzehenhundert jâr, sechtzig jâr vnd darnach in dem núnden jâre.

Source Fulltext: Chartularium Sangallense VIII, Nr. 5164, S. 333.