Ich^a) Hainrich Blârrer statamrnan ze sant Gallen¹ tůn kunt vnd vergich offenlich mit disem brieue allen, die in sehent lesent oder ho^er||ent lesen, daz fúr mich kament ze sant Gallen in der stat an dem na^ehsten fritag vor sant Laurencis tag, do ich offenlich ze geriht saz, die || erbern vnd wolbeschaiden Johans vnd Albreht von Haydelberg gebrůder hern Johansen sa^elgen von Haydelberg ritters wîlunt êlichen sún || ze ainem tail, Bartholome Blârrer, Johans Bla^errer vnd Johans am Bolle phleger der siechen dez spittals ze sant Gallen an dez selben spittals stat ze dem andern tail, vnd nâment da die vorgenemten von Haydelberg gebrůder Bilgrin Spiser burgermaister ze sant Gallen² ze fúrsprechen, der offenot an iro stat vnd von ir baider wegen offenlich vor mir an gemainem geriht vnd sprach, daz sú lieplich vnd gu^etlich v´ber ain komen vnd verriht wa^erint gantzlich vnd gar mit den vorgenemten phlegern an dez vorgedahten spittals stat vmb alle die sto^esse misshellung vnd ansprâchen, die sú mit in ald zv^o in gehept hettint vntz her vff disen húttigen tag, alz dirre brief geben ist, von der nâchgeschribenen ho^ef gu^eter schůppůssen vnd zehenden wegen, der hof, den man nemmet Sôrndal, die múli da bi gelegen, der hof, den man nemmet der Bůba hof gelegen ze Zilschlaht, die schůppůss an den Kúben, zwo schůppůssen ze Bintzen, die in den selben hof geho^erent, der hof, den man nemmet dez Ômen hof, o^vch gelegen ze Zilschlaht, der hof ze Vesersegge, den man nemmet Hindernegg, der hof am Lên gelegen an dem Riet, der zehend ze Râtzzenwîlle, der da gât ab dez Schenken hof von Casteln, vnd a^ellú dú gu^eter ho^ef schůppůssen vnd zehenden, die sú oder iro vordem an dez vorgedahten spittals stat vnd zv^o sinen handen von dem obgenanten hern Johansen von Haydelberg iro vatter sa^elgen ie ko^vft hânt vntz her vff disen húttigen tag, alz dirre brief ist geben, wâ sú gelegen wa^erint ald wie sú genemt wa^erint. Vnd verzigent sich o^vch do die vorgenemten Johans vnd Albreht von Haydelberg gebrůder offenlich vor mir vnd dem geriht willeklich frilich vnd vnbezwungenlich vnd verzihent sich mit disem brieue gantzlich vnd gar fúr sich vnd alle iro erben gen den vorgenemten phlegern gen allen iren nâchkomen vnd gen dem vorgedahten spittal ze sant Gallen der vorgedahten ho^ef múli gu^eter schůppůssen vnd zehenden mit aller zv^o geho^erde aller aigenschaft aller manschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so sú vnd iro erben an den zv^o den vnd von der vorgedahten ho^ef gu^eter schůppůssen vnd zehenden wegen ie gehattent ald hie nach iemer gehaben oder gewinnen mo^ehtint. Die vorgenemten Johans vnd Albreht von Haydelberg gebrůder veriahent o^vch offenlich vor mir vnd dem geriht, daz sú von diser vorgeschribenen rihtung wegen fúr die selben sto^esse misshellung vnd ansprâchen von den obgenanten phlegern genomen vnd enphangen hettint ahtzig phunt phenning gůter vnd gena^emer Costentzzer múnse, die an iren offenn nutz komen vnd bekert wa^erint. Vnd swůrent o^vch do die vorgenemten Johans vnd Albreht von Haydelberg gebrůder offenlich vor mir vnd dem geriht ietwedre besunder willeklich ainen gelerten ait ze den hailigen mit v^f gehabenen vingern, daz sú noch iro erben, ob sú enwa^erint, noch nieman andre an iro stat noch von iro wegen die vorgenemten phleger noch dehain iro nâchkomen noch dehain iro buwlút noch hindersa^etzzen noch den vorgedahten spittal ze sant Gallen von der vorgedâhten ho^ef gu^eter schúppüssen noch zehenden wegen, sú sigent genempt oder vngenempt, niemer mêr súllent noch wellent ansprechen v^ftriben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Die vorgenemten Johans vnd Albreht von Haydelberg gebrůder lobtent o^vch ietwedre besunder mit siner trúwe, der vorgedahten ho^ef gu^eter schůppůssen vnd zehenden vnd o^vch der vorgeschribenen rihtung reht wern ze sinne gen V^olrichen von Haydelberg iro brůder vnd gen allen iren geswistriden, ez sigent fro^vwen tohtren ald knaben, vnd o^vch die vorgenemten phleger vnd iro nâhkomen vnd den vorgeschribenen spittal ze sant Gallen darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sú darumb angesprochen geschadgot oder v^f getriben werdent. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzů gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem waren vrkúnde vnd gantzzer sicherhait aller der vorgeschribenen dinge vnd vergiht so han ich Hainrich Blarrer amman da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Darnâch veriehent wir die vorgenemten Johans vnd Albreht von Haydelberg gebrůder vnd Bilgri Spiser fúrsprech in der vorgeschribenen sache offenlich mit disem brieue ainer gantzzer wârhait aller der dinge vnd gedinge, so von vns an disem brief da vorgeschriben stânt, vnd ze merer sicherhait der selben dinge so habent wir o^vch v´nserú insigel gehenkt an disen brief. Der geben ist ze sant Gallen an dem vorgeschribenen fritag in dem jâr, do man zalt von gottes gebúrt drúzehenhundert jâr, sehszig jâr vnd darnach in dem núnden jâre.

Source Fulltext: Chartularium Sangallense VIII, Nr. 5186, S. 357-358.