Allen den, die disen brief ansehent lesent oder ho^erent lesen, tůn ich Herrnan von Landenberg von Griffense¹ ritter kunt vnd vergich offenlich mit disem brief, das || ich mit dem erwirdigen minem gena^edigen herren abt Georien von gottes gnâden abt des gotzhus ze sant Gallen² lieplich vnd frúntlich v´berain || komen bin von des mayeramptes vnd der vogtye wegen ze Germershusen³, als hienach geschriben stat, also das min vorgenemter herre abt Geori || vnd sin nâhkomen das vorgeschriben mayerampt vnd och die vogtye ze Germershusen mit vogtreht mit allen rehten nútzen vnd gewonhaiten^b) vnd mit aller zůgeho^erd innemen haben vnd niessen sont, alle die wil ich noch min erben mit im von des selben mayeramptes vnd vogtye wegen nút veraint noch verrihtet bin ze den minnen ald zů dem rehten. Bescha^eh aber, das ich mitt minem vorgenemten herren von des selben mayeramptes vnd der vogtye wegen veraint vnd verrihtet wrde ze den minnen oder ze dem rechten vor, ê das er den na^ehsten nutz, so nâh disem húrigen nutz, der ietz von der selben vogtye geuallet^c) nâh dem tag, als dirre brief geben ist, in na^eme, so sol er oder sin nahkomen, ob er enwa^er, mir oder minen erben, ob ich enwa^er, den selben nutz, so er dann von disem húrigen iar von der selben vogtye wegen in genomen hât, als dann die kuntschaft geben hât, so darzů geho^ere, vnuerzogenlich wider geben ân alle geua^erd. Wa^er aber, das ich mit minem vorgenemten herren abt Georien nút veraint noch verrihtet wrde ze den minnen noch ze dem rehten von der selben vogtye vnd mayeramptes wegen vor, ê das er die na^ehsten zwen nútz, so ân vnderlasse nâh enander von dem selben mayerampt vnd der vogtye koment vnd vallent, als vor ist geschriben^d), so sol dann min vorgenemter herre vnd sin nahkomen das vorgeschriben mayerampt vnd die vogtye ze Germershusen mit allen rehten innemen haben vnd niessen, alle die wil ich mit im darumb nút veraint noch verrihtet^e) bin ze den minnen noch ze dem rehten, als voro ist geschriben, vnd sol och mir noch minen erben dannenhin den nutz von der selben vogtye nút mer herus geben noch damit gebunden sin ze wartenn, vnd sol och ich noch min erben noch nieman andrer von minen wegen minen vorgenemten herren sin nahkomen noch das selb gotzhus ze sant Gallen an^f) dem selben mayerampt noch an den nútzen von der selben vogtye noch dauon niemer bekúmberren vftriben noch ansprechen weder mit geriht noch ân reht noch mit enkainen sachen. Bescha^eh aber, das die rihtung entzwischent minem vorgenemten herren abt Georien vnd och mir von des selben mayeramptes vnd der vogtye wegen von mines vorgenemten herren wegen verzugen wrd vnd sinhalb abgieng, als lang vntz das er die zwen nútz von der selben vogtye in genomen hetti, vnd och das kuntlich wrd nah erber lúten sag, so sont mir dannenhin die nútz von der selben vogtye ia^erlich volgen vnd werden, als vor ist geschriben. Vnd des ze ainer warhait henk ich Herman von Landenberg ritter da vorgenemt min insigel an disen brief. Der geben ist ze Wil⁴ an dem na^ehsten samstag vor sant Laurencien tag in dem jar, do man zalt von gottes gebúrt drúzehenhundert jar, sehzig vnd darnach in dem núnden jare.

Source Fulltext: Chartularium Sangallense VIII, Nr. 5187, S. 359.