Ich^a) V^olrich von Roggwille stettamman ze Costentz¹ tv^on kvnt allen, die disen brief ansehent oder ho^erent lesen, das ich offenlich ze gerihte || sass in der statt ze Costentz an disem hútigen tag, als dirre brief geben ist, do kament fúr mich Johans von sant Gallen der reb||kneht vnd Margaret sin elichú wirtinne mit Cv^onraten von Mettendorff² iro brůder, vnd offnotent da die selben Johans vnd Cv^on||rat gebrůder vnd sprachent, das si die selben Margarethen wisen weltint an ir widerlegung vnd an ir hainstúr vmb zwaintzig pfvnt pfenning Costentzer mv´ns vff vier stuk aker, den man sprichet ze der Stegen³, ennent Petershusen⁴ gelegen vnd ainhalb stossent an die lantstrass gen O^vwe⁵, vnd vff zwai stuk akern, die ze dem núwen tor ze Petershusen gelegen sint, die ainhalb vnd hinnen stossent an der Herrenberg aker anderthalb an den steg, da man in des Wolmatingers wiger ingat, vnd vornen an des riches Strasse, die selben gu^etli wa^erint iro reht aigen vnd wa^erint ainr ander reht gemainder, vnd batent inen eruaren an ainer vrtail, wie si die selben gu^eter in pfantz wise an ir widerlegvng vnd ir hainstúr ze ir handen bringen so^eltin, als reht wa^er vnd das es kraft hett, do ward ertailt mit reht gesamnoter vrtail, das die selben Johans von sant Gallen vnd Cv^onrat sin brůder die egenanten gu^eter, die iro reht aigen wa^erint, der selben Margarethen an ir hant versatztin ze ainem rehten redelichen pfant an ir widerlegvng vmb die zwaintzig pfvnt pfenning Costentzer mv´ns, der selbe Johans von sant Gallen ir elicher wirt mit siner hant von ir widerlegvng wegen vnd Cv^onrat von Mettendorff sin brůder och mit siner hant, won er sin rehter gemainder wa^er ze den egenanten gu^etern, wenne si baide das ta^etint, das es danne wol dur reht kraft vnd rnaht hett nv vnd hernach, das versetzen vollefůrtent och da die egenanten Johans von sant Gallen vnd Cv^onrat von Mettendorff sin brůder offenlichen vor geriht, als inen mit frag vnd mit gesamnoter vrtail ertailt ward. Vnd ze warem vnd offem vrkúnde aller diser dinge geben wir die vorgenanten V^olrich von Roggwille stettamman, Johans von sant Gallen vnd Cv^onrat von Mettendorff gebrůder v´nsrú insigel an disen brief. Der ist ze Costentz geben, do man von Cristes gebúrte zalt drúzehenhvndert jar, darnach in dem nv´n vnd sehtzigosten jar, an der mitchen in der pfingstwvchen.

Source Fulltext: Chartularium Sangallense VIII, Nr. 5177, S. 345-346.