Allen^a) den, die disen brief ansehent lesent oder ho^errent lesen, kúnd ich Eglolf von Roschach¹ der elter ritter || vnd vergich des offenlich an disem brief fúr mich vnd fúr min erben, das ich reht vnd redlich ze ko^vffenne || gib vnd geben han zů ainem rehten redlichem vnd ewigen ko^vf vrow Amalien von Ramswag² hern Eglolff || von Roschachs sa^eligen elichen wirtinne mines vettern vnd allen ir erben dis nachgenenten gu^eter, vss dem gůt ze Kratzzeren³ zehen viertal kernen ja^erliches geltes, das gu^etli ze Koblach⁴ minen tail, das der alten Rennha^esinen sa^eligen was, das Haini Locher buwt, ain phunt vnd fúnf schilling gůter^b) Costentzer múns ja^erliches geltes uss der staingrůb ze Roschach vnd uss des Verren zehenden ainen drittail^c) mit allen minen rehten vmb viertzig phunt vnd vmb drissig schilling phenning gůter Costentzer múns, der ich gantzlich vnd gar von ir gewert bin vnd minen schaden da mit verkomen han, dis vorbenten^d) gu^eter a^ellú minú lehen sint von dem gotzhus ze sant Gallen, dú ich ir a^ellú geben han vnd ir erben ze ainem rehten ko^vf, als vor beschaiden ist, mit allen den rehten, dú den selben gu^etern zů geho^errent, an gefa^erd. Ich der vorbenent Eglolf von Roschach ritter kúnd mit urkúnd diz briefes, das ich vnd min erben, ob ich enwa^er, dis vorbenenten ko^vffes reht gewern sin sont nach dem rehten, wa sin dú egenent vro^vw Amalia von Ramswag des vorbenenten hern Eglolfs von Roschach sa^eligen mines vetters elichú wirtinne vnd ir erben, ob si enwa^er, bedurfent ald notdúrftig wrdint an gaistlichem vnd an weltlichem geriht vnd an geriht vnd an allen stetten an gefa^erd, vnd wie si oder ir erben, ob si enwa^er, von des ansprechens wegen ze schaden ka^emint, von dem selben schaden sol ich sú vnd min erben, ob ich enwa^er, gantzlich vnd gar lo^esen vnd ledig machen an geua^erd. Ich der vorbenent Eglolf von Roschach ritter han mich entzigen vnd enzich mich mit disem brief fúr mich vnd fúr min erben aller reht aller ansprach, es sie von aigenschaft oder von lechenschaft von gewer oder von was sachen sich das gefu^egen mo^eht, vnd das die vorbenent Amalia von Ramswag vnd alle ir erben, ob sie enwa^er, bi disen vorbenenten gu^etern vnd o^vch ko^vffen beliben sont ru^eweclich an min vnd miner erben ierrung. Vnd des ze urkúnd aller dirre vorgschribener dinge vnd gedinge, so hie vor von mir dem egenenten Eglolfen von Roschach ritter vnd von minen erben an disem brief geschriben stat, so gib ich der egenten^d) vro^vw Amalien von Ramswag vnd allen ir erben disen brief besigelten mit minen aigenen insigel. Dirre brief wart geben ze Roschach uff der burg an der na^ehsten mitwuchen vor sant Vrbanus tag in der phingstwuchen des jares, do man zalt von Cristus gebúrt drútzehenhundert jar, sehtzig jar vnd dar nach in dem núnden jare.

Source Fulltext: Chartularium Sangallense VIII, Nr. 5176, S. 344-345.