Allen den, die disen brief ansehent oder ho^erent lesen, kúnden wir her Fridrich von Húnwile¹ ritter, Peter von Ebersperg², Herman von Werdegg genant von || Landenberg³ vnd Johans von Sêon⁴ vnd veriehen offenlich an disem brief fúr v´ns vnd alle v´nser erben vnd nachkomen, die wir vestekliche hier || zů binden in dirre sache, als wir alle vier gemeinliche vnd vro^v Elsbethe von Schlatt⁵ her Johans Giels⁶ ritters elichú wirtinne mit v´ns ko^vft haben vnd an den ko^vfe gestanden sijen zů der vesti ze Elgo^ewe⁷ mit lúte mit gůt mit getwinge vnd ba^ennen, an dú vogtije des^a) kelnhofs ze Turbeton⁸, an dú vogtije ze Wille⁹ mit lúte mit gůt, so zů ietwederr vogtije geho^ert, an dú leigen quartt ze Go^vsso^vwe¹⁰ vnd an daz burgsesse halbes ze Gru^eningen¹¹ mit aller rechtumge^b) nútzen gewonheit vnd zů geho^ert, so zů der vorgenanten vesti ze Elgo^ewe, der vogtije des kelnhofs ze Turbeton, der vogtije ze Wille, der leigen quartt ze Gossow vnd zů dem burgsesse halben geho^ert oder geho^eren mag deheins wêgs, es sije lútzel oder vil klein oder grosse benemtz oder vnbenemtz, da loben wir die obgenanten her Fridrich von Húnwile, Peter von Ebersperg, Herman von Werdegg vnd Johans von Sêon fúr v´ns vnd alle v´nser erben vnd nachkomen vnd haben des offenliche gesworn v´nser ieklicher besvnder einen gelerten eide ze den heilgen mit vff gehabnen handen, die obgenante vrô Elsbethen von Schlatt oder ir erben, ob si enwere, oder dem^b), der denne disen brief mit willen vnd gunst ze der obgenanten vro^v Elsbethen von Schlatt wegen inne hett, oder ir erben, ob si enwere, an ire teile noch von deheiner gemeinde wêgen vnd so vil, als ir in dem ko^vf ziehen mag vnd gezúhet, vnd als vil danne ir gůtes darzů komen ist vnd bewendet hett an den obgenanten ko^vfe, des wirt einlife hundert guldin zwentzig guldin vnd funfzehen schilling pfenning alles gůter Florentzer gůter an dem golde vnd vollen swa^erer an der gewicht, vnbekumbert ze^c) lassenne nu vnd hie nach vnd dehein anspräche darzů niemer mere ze habenne mit gericht noch ane gericht geistlichem noch weltlichem, vnd also mit der bescheidenheit, wenne dú obgenant vro^v Elsbethe von Schlatt oder ir erben, ob si enwere, oder der, der danne disen brief mit ir willen inne hett, den selben ir teile in dem ko^vff ornot fu^egêt oder git mit disem brief, daz wir da die obgenanten her Fridrich von Húnwil ritter, Peter von Ebersperg, Herman von Werdegg vnd Johans von Sêon noch v´nser^d) vnd nachkomen, ob wir enweren, die obgenant vro^v Elsbethen von Schlatt noch ir erben, ob si enwere, noch dem^b), der denne disen brief mit ir willen inne hett, daran nút svmen noch irren sont mit deheinen sachen, dú ietz ieman erdacht hatt oder noch funden vnd erdacht wurdi, vnd sol ir des nieman vor sin noch schaden bringen noch sin deheine herre noch herschaft noch gewalt deheine friheit noch recht noch deheine buntnúst werder^e) stetten noch des landes noch mit deheinen gerichten geistlichen noch weltlichen. Vnd des ze einem vesten vrkúnde vnd sicherheit aller dirre vorgeschribner dingen, daz dis alles war sige vnd sta^ett belibe vnd haben nu vnd hie nache, davon so geben wir die obgenanten her Fridrich von Húnwil, Peter von Ebersperg, Herman von Werdegg vnd Johans von Seon fúr v´ns vnd v´nser erben, ob wir enweren, der vorgenanten vro^v Elsbethen von Schlatt vnd ir erben, ob si enwere, vnd wer disen brief mit ir willen inne hett, disen brief offenliche besigelt mit v´nsren eignen hangenden insigeln. Dirre brief ist geben ze Rapreswil¹² in der statt in dem jare, do man zalt von gottes gebúrt drútzehenhundert jar vnd dar nach in dem sibentzigosten jar, an der mitwuchen nach sant Gregorijen tage.

Source Fulltext: Chartularium Sangallense VIII, Nr. 5215, S. 404-405.