Allen^a) den, die disen brief an sehent lesent oder ho^erent lesen, tu^egen wir nâhgenemten V^olrich von Lo^enberg¹ vogt ze Tosters² vnd V^olrich sin sûn kunt vnd veriehin offenlich mit || disem brief, das wir baide ainmu^eteklich von v´nser redlichen nôt wegen das gůt gelegen in dem Bůch³ entzwischen Winikon⁴ vnd der Rúti⁵, daz ietz ze mâl die || Amman vss der Rúti bûwent vnd wilent ritter Cůnrat bûwte, fúr ain lediges vnuerkúmbertes recht aigen gůt mit aker mit wisen mit holtz mit veld || mit wasen mit zwi mit wunn mit waid mit stegen mit wegen mit wasser flússen vnd rúnsen vnd mit allen rechten nútzzen vnd gewonhaitten, so zů dem selben gůt vnd darin geho^eret, fúr v´ns vnd alle v´nser erben vnd nâhkomen redlichen recht vnd och aigenlich verkoft vnd haben ze koffenn geben den frômen lúten Johansen dem Kôch von Affêltrangen⁶ ze disen ziten miner heirren^b) amtman von Tobel⁷, Margrêten Brûninen siner elichen husfrôwen vnd Katherinen iro baider elichen tochter inen allen drin gemainlich vnd vnuerschaidenlich vnd iren erben, ob sú ensint, vmb sehzig pfunt vnd drithalb pfunt pfenning alles gůter vnd gena^emer Costentzer mv´ns, der selben pfenning wir gar vnd gantzlich von in sien gewert an den stetten, da wir v´nsern nv^tz vnd frômen mit geschaffet haben. Wir haben inen och das vorgeschriben gůt mit allem recht vnd mit aller zůgeho^erd fúr aigen vf geben vnd geuertegot, als recht sitt vnd gewônlich was. Vnd darumb verzihen wir v´ns vorbenempten V^olrich von Lo^enberg vnd V^olrich sin sv^n baide vnd ietwedre besunder vnd haben och verzigen mit disem brief v´ns vnd alle v´nser erben vnd nâhkômen gentzlichen vnd och gar gen dem vorbenempten Johans Koch, Margreten siner elichen hûsfrowen vnd Katherinen iro baider tochter vnd gen allen iren erben alles rechten gaistliches vnd weltliches gerichtes aller aigenschaft aller manschaft aller kuntschaft aller besatzzung aller zúgnust aller gewer lút vnd brief aller recht rechtung vordrung vnd ansprach, so wir an dem zů dem vnd von des vorgeschribenen gůtes wegen ie gehebt haben ald noch hinnenhin iemer gehan vnd gewinnen in dehain wis mo^ehten mit recht oder ân recht ald mit kainen andren Sachen. Wir haben och baide vnd ietwedre sv^nderlich gelobt vnd loben och mit disem brief, das wir vnd v´nser erben, die wir vesteklich herzů gebunden haben vnd binden mit disem brief, des vorgeschriben gůtes fúr recht ledig aigen vnd och des kofs recht wêr sin sont nâch recht, wenn wa ald wie dik sin der vorbenempt Johans Koch, Margret sin elichú hûsfrôw vnd Kathrin ir baider tochter vnd ir erben bedûrfent vnd notdúrftig sint an gaistlichem vnd an weltlichem gericht, ân alle geuerd. Vnd ze ainer sicherren vesten warhait aller vorgeschribner ding vnd gedingde henken wir V^olrich von Lo^enberg vnd V^olrich sin sv^n da vorgenemt v´nsri insigel fúr v´ns vnd alle v´nser erben vnd nâhkômen offenlich an disen brief. Der geben ist ze Wil⁸ in der stat an dem na^ehsten samstag nach sant Valentins tag in dem jar, do man zalt von gottes gebúrt drúzehenhvndert jar, darnach in dem sibenzigesten jar.

Source Fulltext: Chartularium Sangallense VIII, Nr. 5212, S. 400-401.