Allen^b) den, die diesen brief ansechent lesent oder ho^erent lesen, kunden wir Herman von Landenberg von Gryffense ritter, Phaffherman von Landenberg gebrůder¹, Peter von Ebersperg² vnd Hans von Bonstetten³ || vnd vergechen offenlich an diesem brief von der sto^ezz missehellung vnd a^vnsprach wegen, so junchfrow Gret hern Hansen sa^eligen ritters des Giels⁴ elichiv tochter hat zů Wernher dem Giel⁵ ir vetter von des erbes vnd gůtes || wegen, so der vorgenant hern Hans Giel ir vatter sa^elig gela^vssen hat, der selben sto^ez vordrung vnd anspra^vch die vorgenant Margaretht Gielin mit hern Fridrichen von Hunwil⁶ ritter ir erkornen vogtes handen vnd Wernher || Gyel fúr sich selber vff v´ns willeklich komen sint mit der bescheidenheit, wes wir v´ns fier oder der merteil vnder v´ns her vmb nach beiderteil fúrlegung kuntschafft briefen vnd widerred erkennent vnd vssprechent, es sigi ze der minne oder ze dem rechten, daz o^vch dz si ze beidenteiln fúr sich vnd ir erben nv vnd hienach war vnd sta^et halten súllent, vnd swůrent o^vch ze beidenteiln gelert eid ze den heiligen, diesen satz vnd vsspruch fúr sich vnd ir erben nv vnd hie nach war vnd sta^et ze halten vnd dawider niemer getůn noch schaffen getan weder mit geistlichen noch mit weltlichen gerichten noch ane gericht noch mit keinen andern sachen weder sus noch so ane geuerd. Vnd do si ze beiden siten diesen satzz vnd vsspruch also lo^vpten vnd swůren sta^et ze halten, darnach haben wir v´ns alle fier einhelleklich erkennet nach beiderteil fúrlegung kuntschafft briefen vnd widerred vnd nach dem, alz div sach an v´ns komen ist, vnd v´ns besser důnket getan denn vermitten, vnd sprechent vnd sagent vs des ersten bi den trewen, so wir darvmb geben haben in eydes wis, was des eignen gůtz ist vnd der vorgenanten Margreten Gielinen vatter sa^elige gela^vssen ha^vt, es si lút oder gůt, wie dz genant ist vnd ir vatter sa^elig harbra^vcht hat vntz an sinen tot, daz sol alles der egenanten Margreten Gielinen des egenanten hern Hansen sa^eligen ritters des Giels elichen tochter beliben ir vnd iran erben ane allen irrat vnd sumung. Aber sprechen wir vmb die vesti Liebenberg, diú lechen ist von v´nser gena^edigen herschafft von O^esterich nach der vrkúnd, so wir haben gesechen, daz die obgenant Margret Gielin bi dem teil der selben vesti beliben sol, den der vorgenant hern Hans Giel sa^elig ritter ir vatter gehept ha^vt an der selben vesti vntz an sinen tot, vnd waz lechen ist von O^esterrich, wa diu selben lechen gelegen sint, da sol o^vch div egenant Margret Gielin bi beliben vnd vngesumpt dar an beliben. Wir sprechent o^vch vmb diú lechen, die lechen sint von sant Gallen, daz wir o^vch darvmb so^elich vrkúnd geho^ert haben, daz die obgenant Margret Gielin bi den selben lút vnd gu^ettern beliben sol in aller der wis vnd in allem dem rechten, alz ir vatter sa^elig hern Hans der Giel ritter an si bra^vcht hat, a^vn allein waz daz kamerlechen anru^erret vnd sich enphindet, daz darzů geho^eret, daz sol dem obgeschriben Wernher Giel zů geho^eren vnd beliben ane allen irrat vnd sumung, vnd sol div egenant Margret Gielin da mit nit ze schaffent haben in keinen weg si noch ir erben. Aber sprechen wir vnd heissent, waz des farenden gůtz vnd phender hern Hans sa^elig ritter der Giel gela^vssen ha^vt, daz sol o^vch der egenanten Margreten der Gielinen beliben. Weri o^vch, daz Wernher Giel dez selben varenden gůtz v´tz verzert oder vertan het, daz sol er der egenanten Margreten Gielinen oder iren erben, ob si enweri, widertůn vnd widergeben hinnan ze dem nechsten sant Michels tag, der nun nechst kumpt nach dem tag, alz dierre brief geben ist, bi dem eid, so er dar vmb gesworn ha^vt, ane alle geuerd. O^vch sprechen wir vmb die lechen von Toggenburg vnd vmb die lechen von Klingen⁷, waz der lechen ist, die si in gemein genossen hand, daz die selben lechen Wernher dem Giel ellú zůgeho^eren sond vnd im beliben sond, vnd sol diu obgenant Margret Gielin da mit mút^c) ze schaffent han. Vnd sprechen o^vch vmb ellú diu manlechen, die die Gieln von der hand lichent, dz die o^vch Wernher Gieln beliben sond, vnd sol si liehen vnansprechig von der obgenanten Margreten Gielinen vnd von iren erben. Aber sprechent wir vmb die brief, die si beidenthalb hand, es si ze Bůbicon⁸ oder ze Rúti⁹ ald anderswa, wa si liegent oder wa si gelegen sint, daz o^vch da ietwederteil sin brief nemen sol, die im sunderlichen zůgeho^erent, vnd sol o^vch ietwederteil den andernteil daran vngesumpt la^vssen, waz aber gemeiner briefen ist, die beidenteiln zůgeho^erent, da heissent wir vnd sprechent, daz si die selben brief ze Bůbicon ze Rúti oder wa die selben brief ligent an den selben stetten la^vssen ligen ald aber anderswa hinlegint ze iren gemeinen handen, also ferre wederteil der selben briefen bedurf ze keinen sinen sachen oder no^eten, daz er die wol mag nemen, also mit der bescheidenheit, daz er vertro^est, die selben brief wider ze antwurten an die stett, da si vor gelegen sint, oder an die stette, dannan si komen sind, vnd o^vch iedwedremteil vnschedlich. Wir sprechent o^vch vnd heissent v´ch ouch bi den eiden, so ir beidenthalb gesworn hand ze den heiligen, diesen vsspruch war vnd sta^et ze halten vnd ze volfu^erren in allen stuken, alz da vor geschriben sta^vt, vnd da wider niemer getůn noch schaffen getan weder mit geistlichen noch mit weltlichen gerichten noch ane gericht noch in keinen weg, so iemant erdenken kan nv noch hienach. Vnd herúber ze einem offenem warem vrkúnde, das dies alles war vnd sta^et belib nv vnd hienach, so geben wir die vorgenanten fier Herman von Landenberg von Griffensee ritter, Phaffherman von Landenberg von Griffense gebrůder, Peter von Ebersperg vnd Hans von Bonstetten dirre vssprúch brief zwen gelich von beiderteil bette wegen mit v´nsern insigel offenlich besigelt. Wir die vorgenanten Margret Gielin hern Hansen sa^eligen ritters dez Giels elichiv tochter vnd Wernher Giel vergechen offenlich mit diesem brief alles des, so for von v´ns an diesen briefen geschriben sta^vt, vnd loben es o^vch alles war vnd sta^et ze halten vnd ze volfu^eren bi den eiden, so wir vor hervmb gesworn haben, vnd dez ze vrkúnde so haben wir v´nsri insigel an dies vssprúch brief gehenket. Ich der obgenant Fridrich von Húnwil ritter vergich o^vch an diesen briefen, daz die egenant Margret Gielin alles daz, so an diesen briefen geschriben sta^vt, mit miner hand willen vnd gunst getan ha^vt, vnd dez ze vrkúnd so han ich o^vch min insigel in vogtes wis von ir bette wegen mir vnd minan erben vnschedlich o^vch an dis vssprúch brief gehenket, die gelich geben sint ze Winterthur¹⁰ an der nechsten mitwuchen nach sant Verenen tag des iares, do man zalt von gottes gebúrt drúzechenhundert jar, dar nach in dem sybentzigestem jare.

Source Fulltext: Chartularium Sangallense VIII, Nr. 5239, S. 426-428.