Allen^a) den, die disen brief ansehent lesent oder ho^erent lesen, kúnd ich V^olrich Bermatinger von Balga¹ vnd vergich dez offenlichen || mit disem brieue fúr mich vnd fúr alle min erben, daz ich lieplich vnd gu^etlich v´berain komen vnd verriht bin gantzlich vnd gar || mit den êrberen vnd wolbeschaidnen Bartholome Blârrer, Johansen Blârrer vnd Johansen am Bolle phleger der siechen dez spit||tals ze sant Gallen² an dez selben spittals stat vmb alle die sto^esse misshellung vnd ansprâchen, die ich mit in ald zv^o in vnd zv^o dem obgenanten spittal ze sant Gallen ie gehept hân vntz her vff disen húttigen tag, alz dirre brief ist geben, ald hie nâch iemer gehaben oder gewinnen mo^eht von dez hofes wegen an der Lîtun³ gelegen ze Altstetten⁴ ennent dem Vorst⁵. Vnd darumb so han ich mich willeklich verzigen vnd verzieh mich mit disem brieue gantzlich vnd gar fúr mich vnd alle min erben aller der reht vordrung vnd ansprachen gaistlichs vnd weltlich gerihtes, so ich vnd min erben, ob ich enwa^er, an dem zv^o dem vnd von dez vorgeschribenen hofes wegen an der Litun ie gehept habent ald hie nâch iemer gehaben oder gewinnen mo^ehtint. Vnd han o^vch darumb vnd da fúr von dez vorgeschribenen spittals phlegern willeklich genomen vnd enphangen zwai phunt phenning gůter vnd gena^emer Costentzzer múnse, die an minen offenn nutz komen sint vnd bewendet. Ich han o^vch gelobt mit miner trúwe vnd loben mit disem brieue fúr mich vnd alle min erben, daz ich noch min erben, ob ich enbin, noch nieman andre an v´nser stat noch von vnsern wegen die vorgenemten phleger noch dehain iro nâchkomen noch den vorgenemten spittal ze sant Gallen von dez vorgeschribenen hofes wegen an der Litun noch von dehainer siner zv^o geho^erde wegen niemer mêr súllent noch wellent ansprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Ich han o^vch gelobt mit miner trúwe vnd loben mit disem brieue fúr mich vnd alle min erben, der vorgeschribenen rihtung reht wer ze sinne fúr Hainrichen vnd fúr Růdolfen min brůder vnd die vorgenanten phleger vnd alle iro nâchkomen vnd o^vch den vorgeschribenen spittal ze sant Gallen darumb ze versprechenn vnd ze versta^enne gen den vorgenanten minen brůdern an allen stetten ân allen iren schaden, wenn wâ vnd wie dik sú darumb von in an gesprochen geschadgot oder v^f getriben werdent. Ez ist o^vch in der vorgeschribenen rihtung mit namen bedingot vnd berett, bescha^ech daz Walther min o^ehain, der ietz in der gegen noch in dem lande niht ist, ze land vnd in diz gegen ka^emi, daz ich danne vnd min erben, ob ich enbin, vnuerzogenlich an den selben minen o^ehain werben vnd in mit ernst bitten súllent, daz er o^vch belibi bi der vorgeschribenen rihtung von sin selbes wegen vnd die vorgenemten phleger noch iro nâchkomen noch den vorgeschribenen spittal ze sant Gallen von dez vorgeschribenen hofes wegen niht ansprech v^f trîbi noch schadge, alz o^vch ich in gelobt hân, alz vorgeschriben stat. Wa^er aber, daz wir in dez niht gewîsen noch v´berkomen mo^ehtint, so súllent wir dez selben spittals phlegern die vorgeschribenen zwai phunt phenning gůter Costentzzer múnse ân fúrzug wider geben vnd súllent in danne von dez selben Walthêrs mines o^ehaims wegen niht fúrbaz haft noch gebunden sin. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich erbetten den êrsamen Hainrichen von Hofen⁶ lantrihter ze Rankwîl⁷ in Músinan⁸, daz er sin insigel fúr mich gehenkt hât an disen brief, won ich aigens insigels niht han. Ich Hainrich von Hofen lantrihter da vorgenemt vergich, daz ich von ernstlicher bet wegen dez obgenanten V^olrich Bermatingers, won er aigens insigels niht hât, min insigel fúr in gehenkt hân an disen brief. Der geben ist ze Veltkylch⁹ an sant Bartholomeus abent dez zwelfbotten in dem jâr, do von Cristus gebúrt wârent drúzehenhundert jâr vnd darnach in dem sibenzigostem jâre.

Source Fulltext: Chartularium Sangallense VIII, Nr. 5238, S. 424-425.