Allen, die disen brief sehent oder ho^erent lesen, kúnd ich Johans Ho^esch vogt des erwirdigen mines gnedigen herren her Brun Brunen || probst des gotzhus Zúrich¹, das fúr mich kam an der stat, da ich von des selben mines herren wegen ze Meilan² offenlich ze ge||richte sass, Johans Mijen vnd Margretha Sennin von Rozbach³, vnd offenberten vnd sprachen vor mir, si so^elten ein tribweg haben vber der er||wirdigen fro^vwen der eptischin vnd des conuentes gemeinlich von Wurmsbach⁴ gu^eter vnd durch ir reben ze Rozbach gelegen in dem veld, die Johans Werder buwet, fúr ir hus hin, dz zů den selben reben geho^ert, dz si ir vich vber den selben weg so^elten triben vnd fu^eren an einem seil. Das versprach die erwirdig fro^vw die eptischin des gotzhus ze Wurmsbach ze ir vnd ir conuentes wegen vnd sprach, das die egenanten Johans Mijen ald Margretha Sennin dehein tribweg durch recht vber ir gůt ald durch ir reben so^elten han mit ir viche ze tribenn ald ze fu^erenne, des were si vnwissende, des vermassen sich die vorgenanten Johans Mijen vnd Margret Sennin, si wolten kuntlich machen, als recht were, das si den weg also so^elten haben, als si in ansprechig hetten. Dar vmb wart inen ze beiden siten tag geben vmb die bewisung, das die egenanten Johans Mijen vnd Margretha Sennin ir gezúgnúss fúr gericht brechten. Vnd kam o^vch min fro^vw die eptischin von Wurmsbach fúr gericht, als ich tag geben hatt, vnd wartet der gezúgnúss. Des kamen aber die egenanten Johans Mijen vnd Margretha Sennin o^vch vf dem selben tag fúr mich an offen gericht vnd liessen von ir gezúgnúss, als si sich vermessen hatten, dar vmb ich in tag geben hatt vf den selben tag, als vorgeschriben stat, offenlich vor gericht. Do liess dú vorgenant min fro^vw die eptischin an recht, wz nu recht were. Dar vmb wart rechtes gefraget vnd wart nach miner frag von erbern lúten mit gesamnoter vrteil erteilt, das die vorgenant eptischin ze ir vnd ir conuentes wegen dien egenanten Johans Mijen vnd Margrethen Sennin den vorgenanten weg anbehebt hetten, das si enhein vich darvber triben noch fu^eren so^elten, vnd do dz erteilt wart, do liess aber die egenant eptischin ze ir vnd ir conuentes wegen an recht, ob in dz gericht icht billich sinen brief her vber geben so^elt. Der wart in nach miner frag von erbern lúten mit gesamnoter vrteil erteilt ze gebenn. Her vber ze einem waren vrkúnd so han ich disen brief von des obgenanten mines herren vnd des gerichtes wegen, won es o^vch erteilt ist, mit minem insigel offenlich besigelt vnschedelich dem obgenanten minem herren vnd sinem gotzhus an allen ir zinsen vnd rechten. Dis beschach vnd wart diser brief geben ze Meilan an dem núnden tag brahotz, do man zalt von gottes gebúrt drúzehenhundert jar, dar nach in dem sibenzigosten jar, da ze gegen waren Johans Lo^vpper, Růd. Moso, Růd. Húrgo, Johans Keller, Bercht. Knopfli vnd ander erber lút.

Source Fulltext: Chartularium Sangallense VIII, Nr. 5226, S. 413-414.