Allen den, die disen brief an sehent lesent oder ho^erent lesen, tu^en wir die nahgenemten Margareht Giel hern Johans sa^eligen des || Giels von Liebenberg¹ ritters elichi tochter vnd Hainrich der Giel von Glatburg² ir rehter erborner vogt kunt vnd ver||iehen offenlich mit disem brief fúr v´ns vnd fúr alle v´nser erben vmb den pfantschatz, so ich vorgenemt Margareth || Gielin von dem gotzhus ze sant Gallen hatte vsser vnd von dem zehenden ze Swarzenbach³, der mich mit andren gu^etern vnd pfantscha^etzen von dem vorgenemten minem vatter sa^eligen an erstorben vnd angeuallen ist, daz da der erwirdig min gena^ediger herre abt Geori von gottes gnâden abt des gotzhus ze sant Gallen⁴ daz selb pfand vnd pfantschatz vsser dem selben zehenden ze Swarzenbach alleklich vnd gar von mir erlo^est vnd erletgot hât vnd mich die vorgenemten Margarethun mit des vorgenemten Hainrich Giels mines vettern vnd rehten vogtes willen vnd gunst des selben pfantschatzes vnd des silbers gantzlich vnd gar gewert vnd bezalt hât an den stetten, da ich minen fromen mit geschaffet hân vnd in minen offen nutz komen sint vnd bewendet, vnd won ich noch der selb Hainrich Giel min vetter vnd rehter vogt minem vorgenemten herren abt Georien den pfantbrief, so ich von des selben pfantschatzes wegen hân, won och ander gu^eter darin verschriben sint vnd damit versetzet^a), darumb so sagent vnd lassent wir mit disem brief vnsern vorgenemten herren abt Georien vnd sin nahkomen des selben pfantschatzes des selben zehenden ze Swarzenbach gantzlich vnd gar ledig vnd los, also das er noch sin nahkomen v´ns noch v´nsern erben bi dem selben pfant vnd pfantschatz ze Swarzenbach nút mer schuldig sint noch gelten sont noch wider geben. Vnd des ze ainer warhait henken wir die vorgenemten Margareth die Gielin vnd Hainrich der Giel ir vogt v´nsri insigel an disen brief. Der geben ist ze Raprehtswille⁵ in dem jar, do man zalt von gottes gebúrt drúzehenhundert jar, darnach in dem sibenzigesten jar, an dem na^ehsten zinstag vor v´nsers herren fronlichamen tag.

Source Fulltext: Chartularium Sangallense VIII, Nr. 5227, S. 414-415.