Wir^a) Geori von gottes gnâden abt des gotzhus ze sant Gallen¹, das ân alles mittel zů geho^eret dem stůl ze Ro^vm, veriehen vnd tu^en kunt mit disem brieff || allen, die in ansehent lesent oder ho^erent lesen, daz fúr v´ns kamen ze Wil² in der statt des na^ehsten ma^entags vor sant Johans tag des To^vffers || ze sunnwendi, do wir offenlich ze geriht sassen, die fromen herr Johans von Fro^vwenfeld sa^enger ze dem tůme ze Costentz³, herr Růdolf von Rosenberg || von Zukkenriet⁴ ritter vnd Jacob von Fro^vwenfeld des selben herr Johans des sa^engers brůder vnd offneten da mit fúrsprechen vnd sprachen, daz sú mit gůter vorbetrahtung vnd beschaidenhait von ir redlichen not wegen reht vnd redlich verko^vffet hettin dis nachgeschriben ho^ef, den hof ze Loch⁵ vnd den hof, den man nemmet Nidra Edlaswille⁶, mit hus mit hof mit holtz mit veld mit akkern mit wisen mit wunn mit waid mit wegen mit stegen mit wasser mit wasser flússen mit wasserlaiten mit allen rehten nützen vnd gewonhaiten vnd mit allem dem, so darzů vnd darinn geho^eret, die von v´ns vnd v´nserm gotzhus ir lehen wa^erin, vnd hettin ze ko^vffenn geben dem erbern kneht Cůnraten dem Kessler von der Núwen Ramswag⁷ vnd sinen erben vmb zwaihundert pfund^b) pfenning gůter Costentzer múns vnd wa^erin o^vch der selben pfenningen gantzlich von im gewert an den stetten, da sú iren fromen mit geschaffet hettin, vnd wo^eltin o^vch die selben ho^ef mit allen rehten dem selben Cůnrat dem Kessler vfgeben vnd vertgen, als reht wa^er, vnd baten v´ns ze erfaren an ainer vrtail, wie sú das tu^en vnd dauon gân so^eltin, daz es kraf hetti nu vnd hienach. Do fragten wir vrtail vmb vnd ward ertailt mit gemainer vrtail, daz der vorgenemt herr Johans der sa^enger ainen vogt nemen so^elt an dem ring, wen er wo^elt, vnd die selben ho^ef mit siner vnd mit des selben sines vogtes hand an v´nser hand geben so^elt, vnd daz die vorgenemten herr Růdolf von Rosenberg vnd Jacob von Frowenfeld die selben ho^ef mit ir handen vfgeben so^eltin an v´nser hand vnd v´ns dann alle drig bitten, die selben ho^ef dem vorgenemten Cůnrat dem Kessler lihen ze rehtem lehen. Das tâten o^vch sú, vnd nam do ze stett der selb herr Johans der sa^enger ze vogt Cůnrat von Múnchwille⁸, dem o^vch wir die vogtye vmb die sach nach v´nsers gotzhus gewonhait verlihen, vnd gaben o^vch do ze stett der selb herr Johans der sa^enger mit siner vnd mit des selben sines vogtes handen vnd o^vch die vorgenemten herr Růdolf von Rosenberg vnd Jacob von Fro^vwenfeld mit ir handen die vorgeschriben ho^ef mit allen rehten ledklich vf an v´nser hand vnd baten v´ns, die selben ho^ef dem vorgenemten Cůnrat dem Kessler lihen ze rehtem lehen, das taten o^vch wir durch iro be^at vnd haben die vorgeschriben ho^ef mit allen rehten nútzen vnd gewonhaiten vnd mit aller zů geho^erd dem vorgenemten Cůnrat dem Kessler verlihen vnd lihen im mit disem brief ze rehtem lehen, vnd entzigen sich o^vch do ze stett die vorgenemten herr Johans der sa^enger mit dem selben sinem vogt vnd herr Růdolf von Rosenberg vnd Jacob von Fro^vwenfeld vnd entzihent sich mit disem brief fúr sich vnd fúr alle ir erben gen dem selben Cůnrat Kessler gen allen sinen erben vnd nachkomen aller aigenschaft aller lehenschaft aller manschaft aller gewer aller kuntschaft alles v^szuges alles schirmes aller zúgnúst lút vnd brief alles rehten gaistliches vnd weltliches gerihtes aller vordrung vnd ansprach, so sú alle gemainlich oder dehainer vnder inen besunder zů den vorgeschriben ho^efen gantzlich oder an dehainem tail hatten oder iemer gewinnen mo^ehtin von reht von gewonhait oder von dehainen andren sachen. Die vorgenemten herr Johans der sa^enger, herr Růdolf von Rosenberg vnd Jacob von Frowenueld hânt o^vch gelopt fúr sich vnd fúr alle ir erben, der vorgeschriben ho^ef vnd des ko^vffes reht wern ze sinne nach reht gen ma^englichem vff gaistlichem vnd vff weltlichem geriht, wa wenn ald wie dik sin der vorgenemt Cůnrat Kessler oder sin erben bedurfent vnd notdurftig sint ald darumb vfgetriben vnd angesprochen werdent, daz sú sú darvmb ân allen iren schaden verstân vnd versprechen sont vnd von der ansprach entrihen vnd ledig machen ân geua^erd. Vnd ist dis alles redlich vnd reht beschehen vnd vollefu^ert mit allen den worten werken vnd geta^eten, so nach gewonhait vnd nach reht darzů gehorten vnd notdurftig waren vnd als reht sitte vnd gewonlich was. Vnd des ze ainer warhait henken wir abt Geori dauorgenemt v´nser insigel an disen brief. Darnach veriehen wir die vorgenemten Johans der sa^enger, Růdolf von Rosenberg ritter, Jacob Hofmaister von Fro^vwenfeld vnd Cůnrat von Múnchwille vogt in diser vorgeschriben sach ain gantz warhait aller diser vorgeschriben ding vnd daz alles das war ist, das der erwirdig v´nser gena^ediger abt Geori dauor genemt von v´ns veriehen hât an disem brief. Vnd des ze merer sicherhait der selben ding henken wir o^vch v´nsri insigel an disen brief. Der geben ist in der stat ze Wil an dem vorgeschriben ma^entag in dem jar, do man zalt von gottes gebúrt drúzehenhundert jar vnd darnach in dem sibentzigosten jar.

Source Fulltext: Chartularium Sangallense VIII, Nr. 5229, S. 416-417.