Dilectis filiis sancti Galli¹ et Scaffasensis² monasteriorum abbatibus Constantiensis diocesis ac cantori ecclesie sancti Thome Argentinensis³ salutem etc. Vite ac morum honestas et alia probitatis et virtutum merita, super quibus apud nos dilectus filius Johannes Metzgher rector parrochialis ecclesie in Stallikon⁴ Constantiensis diocesis fidedignorum commendatur testimonio, nos inducunt, ut sibi reddamur ad gratiam liberales. Hodie siquidem ad audientiam nostram deducto, quod Johannes Bomer canonicus ecclesie sanctorum Felicis et Regule Thuricensis⁵ dicte diocesis dyabolico spiritu instigante homicidium in personam quandam Alberti dicti Bretzler de Basilia Minori⁶ laici dicte diocesis voluntarie et ex certo proposito publice nequiter perpetrarat, nos attendentes, quod veris existentibus supradictis prefatus Jo. Bomer canonicatu et prebenda eiusdem ecclesie sanctorum Felicis et Regule, quos obtinebat, reddiderat se indignum, dilecto filio preposito ecclesie Imbriacensis⁷ predicte diocesis per alias nostras litteras dedimus in mandatis, ut vocatis dicto Johanne Bomer et aliis, qui forent evocandi, super premissis inquireret diligentius veritatem, et si per inquisitionem huiusmodi invenieret prefatum Jo. Bomer huiusmodi homicidium perpetrasse, ipsum eisdem canonicatu et prebenda auctoritate nostra sententialiter privaret et amoveret ab eisdem, sicut de iure foret faciendum, prout in eisdem litteris plenius continetur. Nos igitur volentes dictum Johannem Metzger in presbiteratus ordine constitutum, qui ut asserit in artibus provectus existit et in iure canonico studet, premissorum meritorum suorum intuitu gratiam facere specialem, discretioni vestre per apostolica scripta committimus et mandamus, quatenus vos vel duo aut unus vestrum per vos vel alium seu alios, si contingat, predictum Jo. Bomer eisdem canonicatu et prebenda privari et amoveri ab ipsis sententialiter, ut prefertur, eosdem canonicatum et prebendam, cum per amotionem huiusmodi vel alias quovismodo preter quam per ipsius Jo. Bomer obitum vacabunt, prefato Johanni Metzger auctoritate predicta conferre et assignare curetis, inducentes eundem Jo. vel procuratorem suum eius nomine in corporalem possessionem canonicatus et prebende ac iurium et pertinentiarum predictorum et defendentes inductum, amoto ab eis dicto Johanne Bomer et alio quolibet illicito detentore, ac scienter ipsum Johannem Metzger vel dictum procuratorem pro eo ad dictam prebendam in eadem ecclesia sanctorum Felicis et Regule in canonicum recipi et in fratrem stallum sibi in choro et loco^a) in capitulo ipsius ecclesie cum plenitudine iuris canonici assignantes sibique de ipsorum canonicatus et prebende fructibus redditibus proventibus iuribus et obventionibus universis integre responderi, contradictores auctoritate nostra appellatione postposita compescendo, non obstantibus quibuscumque statutis et consuetudinibus ipsius ecclesie sanctorum Felicis et Regule contrariis iuramento confirmatione apostolica vel quacumque firmitate alia roboratis, aut si aliqui apostolica vel alia quavis auctoritate in eadem ecclesia in canonicos sint recepti vel ut recipiantur insistant, seu si super premissis sibi faciendis de canonicatibus et prebendis eiusdem speciales vel de beneficiis ecclesiasticis in illis partibus generales apostolice sedis vel legatorum eius litteras impetrarint, etiam si per eas ad inhibitionem reservationem et decretum vel alias quomodolibet sit processum, quibus omnibus ipsum Jo. Metzger in assecutione dictorum canonicatus et prebende volumus anteferri, sed nullum per hoc eis quoad assecutionem canonicatuum et prebendarum ac beneficiorum aliorum preiudicium generari, seu si venerabili fratri nostro episcopo Constantiensi et dilectis filiis capitulo ipsius ecclesie sanctorum Felicis et Regule vel quibusvis aliis communiter vel divisim ab eadem sit sede indultum, quod ad receptionem vel provisionem alicuius minime teneantur et ad id compelli aut quod interdici suspendi vel excommunicari non possint quodque de canonicatibus et prebendis ipsius ecclesie sanctorum Felicis et Regule vel aliis beneficiis ecclesiasticis ad eorum collationem provisionem presentationem seu quamvis aliam dispositionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem et qualibet alia dicte sedis indulgentia generali vel speciali, cuiuscumque tenoris existat, per quam presentibus non expressam vel totaliter non insertam effectus huiusmodi nostre gratie impediri valeat quomodolibet vel differri, et de qua cuiusque toto tenore habenda sit in nostris litteris mentio specialis, aut si dictus Jo. Metzger presens non fuerit ad prestandum de observandis statutis et consuetudinibus eiusdem ecclesie sanctorum Felicis et Regule solitum iuramentum, dummodo in absentia sua per procuratorem ydoneum et, cum ad ecclesiam ipsam accesseris, corporaliter illud prestet, seu quod predictus Jo. Metzger parrochialem ecclesiam prefatam, cuius fructus redditus et proventus octo marcharum argenti secundum communem extimationem valorem annuum, ut asseritur, non excedunt, noscitur obtinere. Nos enim exnunc irritum decernimus et inane, si secus super hiis a quoquam quavis auctoritate scienter vel ignoranter contigerit attemptari. Datum apud Monteflasconem⁸, IIII idus maii, pontificatus nostri anno octavo.

Source Fulltext: Chartularium Sangallense VIII, Nr. 5223, S. 409-411.