Wir Gůt von Wolfurt maistrin vnd der conuent gemainlichen des gotzhuses ze Múnsterlingen¹ sant || Augustinus orden gelegen in Costanzer bistum kúndin vnd veriehen des offenlich mit disem brief, das die || erbern gaistlichen frowen in got Anna Entziswilerin vnd Vrsel ir swester vnser closterfrowen ze Múnsterlingen || mit vnserm gemainen willen gunst vnd o^vch vrlob durch gegenwirtig vnd kúnftigen nutze vnsers closters von v´ns geko^vffet hant vnd wir in ze ko^vffende geben hant vier mut kernen gůtes vnd ga^ebes wolgemachtes kornes Costanzer messes ewiges geltes, die wir in von vnserm spicher ierlich geben so^end, vmb XXXII. pfunt pfenning gůter vnd ga^eber Costanzer múntze, die wir von den^a) vorgenanten zwein swestren vnd frowen Enzeswilerin gar vnd gentzlich enpfangen hant vnd in vnsers closters nutze gekert vnd bewendet hant. Die selben vier mut kernen sont die vorgenanten zwo frowen ierlich von vns empfhahen an sant Martins mes ze herbste vnuerzogenlich vnd on alle geuerde alle die wile si lebend vnd in libe sint mit so^elichem gedinge, das si zwo so^end ir vatter vnd ir můter, ir swester der Vischinen iarzit began, wenn es ze schulden kunt. Vnd wel vnder in zwein von erste stirbet, so sol denne die ander lebend ir swester die vier mut kernen den frowen v´ber tisch geben, vnd sond die frowen began der vorgenanten ir vatter ir můter ir swester der Vischinan vnd der selben ir voruarnden swester iarzit began ieglichs mit aim mut kernen, vnd wenne die selb o^vch erstirbet, so sond die vier mut kernen denn ewklich den frowen lidig vnd fri v´ber tische ierlich dienan zů begangnisse der selben vier iarziten, als sit vnd gewonhet ze Múnsterlingen ist, vnd sond wir nach kain vnser nakomen da wider niemer komen tun noch werben weder mit gerichte noch on gerichte weder heimlich noch offenlich, vnd wo si des an vns gebresten iemer gewúnnend, so sond si vollen gewalt haben, gerichte ze sůchen nach all ir notdurft, vnz dz wir si des genzlich vnklaghaft machend, vnd sond si des nút hindran kein vnser frihet noch recht noch gewalt. Vnd dz dis alles war vnd sta^et belib, so hant wir die obgen(anten) maistrin vnd der conuent ze Múnsterlingen vnser aigen ingesigel an disen brief gehenket. Der gegeben ist ze Múnsterlingen, do man von^b) zalte von gottes gebúrte drútzehen hundert iar, dar nach in dem sibenzigsten iar, an sant Potencianen tag der jungfrowen.

Source Fulltext: Chartularium Sangallense VIII, Nr. 5224, S. 411-412.