Ich^a) Albreht von Lindenberg schulthais ze Wil¹ tůn kunt vnd vergich offenlich mit disem brief allen, die in an sehent lesent oder ho^erent lesen, das ich offenlich ze gericht sass ze Wil in der stat an der mitwochen ze inga^en||dem mertzen^b) an ainem tail V^olrich von Lo^enberg² ze disen ziten burgheirr ze Yberg³ vnd Anna⁴ sin elichi hûsfrôw mit Stephan von Stûrzenegg⁵ burger ze Wil irem erkornen vogt, mit dem si do vor gerichte mit reht || vnd mit vrtail beuogtot ward in dirr sach vnd die vogty ich im verleh nach der stat ze Wil reht sitten vnd gewônhait, vnd an dem andern tail Johans der Kôch von Affeltrangen⁶, vnd offenten vnd veriahen da die || selben V^olrich von Lo^enberg vnd Anna sin elichi hûsfrow mit Markus dem Kamrer irem fúrsprechen vnd sprâchen, als sú vormals dem vorgenanten Johans Koch vnd Margreten siner elichen husfrôwen ze koffenn geben hettint zwen tail des gůtes gelegen in dem Bůch⁷ entzwischen Tobel⁸ vnd Ma^erwille⁹, als die brief wisent, die der selb Johans Koch vnd Margreta sin elichi hûsfrow darúber hant, also hettint sú och baidú gemainlich vnd vnuerschaidenlich den v´brigen drittentail des selben gůtz im Bůch genant des Risers gu^etli, daz ir der egenanten Annen redlich pfant gewesen wa^eri, mit allen rehten nútzzen vnd gewonhaitten vnd mit allem dem, so nach reht vnd von gewônhait zů dem selben dritten tail des vorgeschriben gůtz vnd darin geho^eret, fúr sich vnd alle ir erben redlich reht vnd och aigenlich verkoft vnd hettint ze koffenn gebenn dem selben Johans Koch vnd Margreten siner elichen hûsfrôwen vnd iren erben, ob sú ensint, fúr ain lidiges vnuerkúmbertes aigen gůt vmb drissig pfunt pfenning alles gůter vnd genamer Costentzer múns, der selben pfenning sú gar vnd gantzlich von im sint gewert an den stetten, da sú iren nûtz vnd fromen mit geschaffot hant nach ir vergiht, vnd darumb welti der vorgenant V^olrich von Lo^enberg den vorgeschriben drittail des vorgeschriben gůtz mit allen rehten nútzzen vnd gewonhaitten vnd mit aller zůgeho^erd dem egenanten Johans Koch vnd Margreten siner elichen hûsfrôwen vertegen vf geben vnd zů iren handen bringen, als reht wa^er, vnd die egenant Anna sin elichi hûsfrôw sich verzihen lûterlich vnd och gar vnd gantzlich fúr sich vnd alle ir erben des selben gu^etlis vnd pfantschatzzes vnd aller der brief recht vordrung vnd ansprach, so si von kainer lay sach wegen daran darzů vnd dauon ie gehan vnd gewunnen hetti vntz vff disen húttigen tag, als dirre brief geben ist, och in der vorgenanten Johans des Kochs vnd Margreten siner elichen hûsfrôwen vnd in ir erben hand, och als reht wa^er, vnd batten mich vorgenanten richter ze erfarn an ainer vrtail, wie sú das tůn soltint, das es kraft hetti vnd haben mo^eht ietz vnd hernach, do fragt ich vorgenanter richter vrtail vmb. Do ward mit gemainer vrtail ertailt, das der egenant Stephan von Sturzenegg die egenanten Annen ze drin malen fu^eren solti vsser des gerichtes ring vnd si ze ieglichem fragen, ob si das verzihen vnbetwungenlich ta^et vnd wilklich vnd gern tůn wolti, vnd saiti der bi sinem ayd ze dem dritten male, das si im gesait hetti, das si es vnbetwungenlich ta^et vnd wilklich vnd gern tůn wolti, das dann der vorgenant V^olrich von Lo^enberg das vertegon vnd vfgeben tůn solti mit siner hand vnd och dú egenant Anna das verzihen tůn solti mit iro vnd och mit des vorgenanten ir vogtes handen an des gerichtes stab hin in der egenanten Johans Koch vnd Margreten siner elichen hûsfrowen vnd in ir erben hand, vnd das es also wol kraft hett vnd habi ietz vnd hernach, das tett der vorgenant Stephan von Sturzenegg vnd fůrte die egenanten Annen V^olrichs von Lo^enberg elichen hûsfrowen ze drin malen vsser des gerichtes ring vnd fragte si ze ieglichem male, als im vormals mit^c) gemainer vrtail ertailt ward, ob si das verzihen vnbetwungenlich ta^et vnd wilklich vnd gern tůn wolti, der saite bi sinem aide ze dem dritten male, das si im gesait hett, das si es vnbetwungenlich ta^et vnd wilklich vnd gern tůn wolti, vnd nâch dem stůnden die egenanten V^olrich von Lo^enberg vnd Anna sin elichi hûsfro dar fúr offen gerichte vnd vertegot vnd gab do ze stett der selb V^olrich von Lo^embg^d) mit siner hand den vorgeschriben drittail des vorgeschriben gůtes mit allem reht vnd mit aller zůgeho^erd letklich vnd och frilich vf,vnd enzeh sich och dú egenant Anna von Lo^enberg do ze stett gantzlich gar vnd och lûterlich fúr sich vnd alle erben mit iro vnd mit des vorgenanten ir vogtes handen redlich vnd reht mit gelerten worten, als reht was vnd mit gemainer vrtail ertailt ward, an des gerihtz stab hin in des vorgenanten Johans Koch vnd Margreten siner elichen hûsfrôwen vnd in ir erben hand des vorgeschriben drittail des egenanten gůtz, vnd entzihent sich och die egenanten V^olrich von Lo^enberg vnd Anna sin elichi husfrôw baidú vnd ietwedres besunder mit disem brief fúr sich vnd alle ir erben gen dem vorgenanten Johans Koch vnd gen Margreten siner husfrôwen vnd gen allen iren erben aller aigenschaft aller manschaft aller lehenschaft aller kuntschaft aller besatzzung alles pfantschatzzes aller gewer lút vnd brief aller reht vordrung vnd ansprach, so sú an dem zů dem vnd von des vorgeschribenn gu^etlis wegen ie hatten ald noch hienach iemer gehan vnd gewinnen in dehain wis mo^ehtint, vnd das sú noch ainkain ir erben noch nieman andrer von ir wegen noch an ir stat die egenanten Johans Koch noch Margreten sin elichen hûsfrôwen noch ainkain ir erben von des vorgeschribenn gu^etlis wegen niemer súllent noch wellent ansprechen vftriben bekumberron bekrenken noch in ainkain wis noch weg beswa^erren weder vff gaistlichem noch vff weltlichem gericht noch ân reht noch mit enkainer lay ander sach. Es hat och der vorgenant V^olrich von Lo^enberg gelobt fúr sich vnd fúr sin erben, des vorgeschriben drittailes des egenanten gůtes vnd och des kofs wer ze sinne fúr aigen nach reht, wenn wa vnd wie dik sin die egenanten Johans Koch, Margreta sin elichi husfrôw vnd ir erben bedurfent vnd notdúrftig sint an gaistlichem vnd an weltlichem gericht, ân alle geuerd, vnd als dis also beschaidenlich volfu^ert was, do batt im der vorgenant Johans Koch des gerichtes brief hieúber geben, die wurden im nach miner frage mit gemainer vrtail ertailt. Vnd ze ainer warhait aller diser vorgeschribner ding vnd gedingde henk ich Albreht von Lindenberg schulthais min insigel von des gerichtes wegen an disen brief, darnach veriehin wir V^olrich von Lo^enberg vnd Stephan von Sturzenegg vogt in dirre sach och ain gantz warhait aller der ding vnd gedingde, so hieuor an disem brief geschriben stat, vnd ze ainer gantzen warhait der selben ding henk ich V^olrich von Lo^enberg da vorgenant vnd ich Stephan von Sturzenegg in vogtes wise mir vnd minen erben vnscha^edlich v´nsri insigel och an disen brief. Der geben ist ze Wil in der stat an der vorgeschribenn mitwochen in dem jar, do man zalt von gottes gebúrt drúzehenhundert jar, darnach in dem ainen vnd sibenzigosten jar.

Source Fulltext: Chartularium Sangallense VIII, Nr. 5264, S. 458-460.