Ich^a) Johans von Zwingenstain¹ ritter tůn kunt vnd vergich offenlich mit disem brieue fúr mich fúr alle min erben vnd || nâchkomen allen, die in ansehent lesent oder ho^erent lesen, daz ich mit wolbedahtem můt vnd gůter vorbetrahtung den || wingarten an der Gâht² gelegen ze Rebstain³, der ainhalb stôsset an dez . . Cra^egers wingarten vnd anderthalb an Nyco||lausen Frechen wingarten, vnd anderhalb juchart akkers gelegen ze Rebstain, die man nemmet der Wîdakker⁴, die vnnen stôssent an dez O^elers akker, mit grunt mit grât mit allen rehten nútzzen vnd gewonhaiten vnd mit aller zv^o geho^erde, der selb wingart vnd o^vch die akker min reht aigen wârent vnd die Elsbethen Cůnrat dez Frechen sa^elgen wîlunt êlichen wirtinnen reht lipding sint, redlich vnd reht verko^vft vnd ze ko^vffenn geben han den êrberen vnd wolbeschaidnen Hainrich dem Heller von Balga⁵ vnd Adelhaiten siner êlichen wirtinnen baiden gemainlich vnd vnuerschaidenlich vnd iren erben, ob sú enwa^erint, vmb núnzehen phunt phenning gůter vnd gena^emer Costentzzer múnse, der ich gantzlich von in gewert bin vnd enphangen han vnd an minen offenn nutz bewendet, vnd han in o^vch den vorgeschribenen wingarten an der Gâht vnd o^vch die anderhalb juchart akkers ze Rebstain mit aigenschaft mit lêhenschaft mit allen rehten vnd mit aller zv^o geho^erde redlich vnd reht fúr reht aigen v^f geben geuertgot vnd zv^o iren handen braht, alz reht sitte vnd gewonlich waz vnd alz ez kraft vnd maht sol vnd mag han, der vorgenanten Elsbethen Frechinen an irem lîpgedinge vnd an iren rehten gantzlich vnscha^edlich. Vnd darumb so han ich mich willeklich verzigen vnd verzîch mich mit disem brieue gantzlich vnd gar fúr mich vnd alle min erben dez vorgeschribenen wingarten vnd o^vch der anderhalb juchart akkers mit aller zv^o geho^erde aller aigenschaft aller manschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so ich vnd min erben, ob ich enwa^er, an dem zv^o dem vnd von dez vorgeschribenen wingarten vnd akkers wegen ie gehept habent ald hie nâch iemer gehaben oder gewinnen mo^ehtint, vnd daz ich noch enkain min erben, ob ich enbin, noch nieman andre an v´nser stat noch von v´nsern wegen die vorgenemten Hainrich den Heller, Adelhaiten sin êlichen wirtinnen noch dehain iro erben noch nâchkomen von dez vorgeschribenen wingarten noch akker wegen niemer súllent noch wellent ansprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache, ân alle geua^erde. Ich der obgenant Johans von Zwingenstain ritter han o^vch gelobt mit miner trúwe vnd loben mit disem brieue fúr mich vnd alle min erben, dez vorgeschribenen wingarten an der Gâht vnd der anderhalb juchart akkers ze Rebstain mit aller zv^o geho^erde vnd dez ko^vffes reht wer ze sinne fúr reht aigen nâch dez landes reht vnd o^vch die vorgenemten Hainrich den Heller, Adelhaiten sin êlichen wirtinnen vnd iro erben darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder v^f getriben werdent. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzů gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so han ich Johans von Zwingenstain ritter da vorgenemt fúr mich vnd alle min erben min insigel gehenkt an disen brief. Der geben ist ze Bernang⁶ in dem Rintal an dem na^ehsten ma^entag vor sant Gregorien tag in dem jâr, do von Cristus gebúrt wârent drúzehenhundert jâr vnd darnâch in dem ain vnd sibenzigostem jâre.

Source Fulltext: Chartularium Sangallense VIII, Nr. 5265, S. 460-461.