Allen, die disen brief ansehent oder ho^erent lesen, kv´nden wir Cv^onrat Turwald chor||herre vnd senger ze sant Johans kilchen ze Costentz¹ rihter von v´nsers hailgen vatter || des ba^vpstes gewalt vnd gebott mines gna^edigen herren des abbtes des gotzhus ze sant || Gallen² vnd Hainrich von sant Peter³ schaffner vnd procurator des selben mines herren von sant Gallen tu^egin kvnt vnd veriehin des offenlich mit disem brief an des selben gotzhus statt ze sant Gallen, als v´ns fúrbraht ward, das das gu^etli gelegen bi Sulgen⁴, so Johans Hohenberg burger ze Sulgen ze ko^vffent geben hett Hainrichen V´belhern, das ze dem Obernswartzenbach⁵ gelegen ist, das das selbe gu^etli lehen solt sin von dem gotzhus ze sant Gallen, vnd als wir den selben Hainrichen V´belhern vmb getriben hant mit geriht von des selben gu^etlins wegen, das wir v´ns des ainhelleklich erkent habent vnd von wisen lúten vnd ra^vt des vnderwist sigin vnd das selbe gotzhus ze sant Gallen, das das selbe gotzhus von der klag vnd ansprach wegen la^vssen wil, vnd o^vch von der bett wegen vnd der kvntschaft, so v´ns min frow von Hohenberg⁶ geta^vn hat, vnd sagent den selben Haintzen V´belhern vnd alle sin erben fúr minen herren von sant Gallen fúr sin gotzhus vnd fúr alle ir nachkomen ledig vnd los vmb alle sto^esse missehellvng vnd ansprach, so das egenant gotzhus von des vorgenanten gu^etlins wegen ze inen nv ald her nach haben oder gewinnen mo^ehtint in dehaine wise suss noch so weder mit geriht noch a^vn geriht gaischlichem noch weltlichem. Vnd ze warem vrkv´nd aller dirre ding geben wir vorbenempter senger des gotzhus vnd der gestift ze sant Johanne vnd Hainrich von sant Peter des obgenanten mines herren amptman v´nsrú insigel an disen brief. Der ist ze Costentz geben, do man von Cristes gebúrte zalt drúzehenhvndert jar, darnach in dem ain vnd sibentzigosten jar, an dem na^ehsten fritag vor sant Georyen tag.

Source Fulltext: Chartularium Sangallense VIII, Nr. 5267, S. 462-463.