Wir graff Růdolf von Nido^vw lantuogt² der durlúchtigen hochgeborn fúrsten || v´nsrer genedigen herren der hertzogen von O^ester. ze Swaben, ze Ergo^ew vnd ze || Thurgo^ew thůn kunt vnd veriehen offenlich mit disem brief, daz fúr v´ns vnd v´nser || herschaft von O^ester. rete komen sind der from vest ritter herr Friderich von Húnwile³ ze einem teil vnd der burgere von Raprechtswile⁴ gewisse botten an dem andern teil von der sto^ezze wegen, so die selben zwen teil miteinander gehebt hand von der luten wegen, die in die nach geschribnen ho^efe geho^erent, die die egenanten burgere von Raprechtswil ze burgere emphangen vnd genomen hatten. Da sol man wússen, dz wir vnd v´nser herschaft rete, die do ze mal bi v´ns waren, v´ns einhelklich erkent haben nach kuntschaft nach rede vnd widerrede, vnd dunket v´ns ouch, dz die obgenanten burgere von Raprechtswile der lúten, die da geho^erent in den kelrhoff ze Kempten⁵, in die vogtie ze Adoltswile⁶ vnd in^a) die vogtie ze Bliggenswile⁷, dz allez des egenanten her Friderichs phand ist, enheinen der selben lúten niemer me ze burger emphahen noch nemen so^ent in ir stat wider sinen willen, vnd die selben lúte, die si ietzunt ze burger emphangen habent, die in den egenanten kelrhof vnd in die vogtien geho^erent, so^end si ir burgrechten vnd ir eiden ledig sagen vnd ouch lassen ane irrung, ane allein Claus der Bero von Kempten, der sol vnd mag wol bi sinem burgrecht beliben, v´b er wil. Vnd des ze einem waren vrkúnd so han wir der vorgenant graff Růdolf von Nido^vw lantuogt v´nser eigen inges(igel) offenlich gehenket an disen brief. Der geben wart ze Baden⁸ an dem nechsten fritag vor sand Matheus tag des zwelfbotten des jars, do man zalt von Christus gebúrt drútzehenhundert iar vnd darnach in dem ein vnd sibentzigosten iare.

Source Fulltext: Chartularium Sangallense VIII, Nr. 5290, S. 486-487.