Allen^a) den, die disen brief ansehent lesent oder ho^erent lesen, kúnden wir die nâchgenemten Růdolf von Stainach ritter vnd Haintz von Stainach sin brůder vnd veriehent offenlich mit disem brieue fúr v´ns fúr alle v´nser erben vnd || nâchkomen, daz wir baid ainhelleklich mit gůter vorbetrahtung von v´nser redlicher nôt wegen den obern hof vnd den vndern hof ze Bregenzdorf mit hûs mit hof mit wingarten mit akkern mit wisen mit wasen mit zwi mit || holtz mit veld mit wunn mit waiden mit stegen mit wegen mit wasser mit wasserflússen vnd gengen mit allen rehten nútzzen vnd gewonhaiten vnd mit allem dem, so von reht ald von gewonhait darzv^o vnd darin geho^erent, ez sie genemptz oder vngenemptz gesůchtz oder vngesůchtz wissentz oder vnwissentz, redlich vnd reht verko^vft vnd ze ko^vffenn geben habent v´nserm gůten frúnde Johansen Gna^epser burger ze sant Gallen vnd sinen erben, ob er enwa^er, vmb drúhundert phunt vnd vmb fúnf phunt phenning gůter vnd gena^emer Costentzzer múnse, der wir alleklich vnd gar von im gewert sigent vnd enphangen habent vnd an v´nser baider offenn nutz bewendet, die selben vorgeschribenen ho^ef baid ze Bregenzdorf v´nser reht erblehen wârent von dem êrwirdigen gotzhus ze Salmanswîller, dannen wir im o^vch die selben vorgeschribenen ho^ef den obern hof vnd den vndern hof ze Bregenzdorf mit allen rehten vnd mit aller zv^o geho^erde, alz da vorgeschriben stât, reht vnd redlich geuertgot vnd zv^o sinen handen braht habent, alz reht sitte vnd gewonlich waz vnd alz ez kraft vnd maht sol vnd mag han. Die selben vorgeschribenen ho^ef baide habent wir im da fúr vnd in den rehten ze ko^vffenn geben vnd geuertgot, daz da von noch darab niht gât noch gân sol dann aller ja^erlich der grôsse zehend vnd ain vierdung wachses von dem obern hof vnd ain vierdung wachses von dem vndern hof ze Bregenzdorf vnd niht anders an daz vorgeschriben gotzhus ze Salmanswîller. Vnd darumb so habent wir v´ns willeklich verzigen vnd verzihent v´ns mit disem brieue gantzlich vnd gar fúr v´ns vnd alle v´nser erben der vorgeschribenen ho^ef dez obern hofes vnd dez vndern hofes ze Bregenzdorf mit aller zv^o geho^erde aller aigenschaft aller manschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so wir vnd v´nser erben, ob wir enwa^erint, an den zv^o den vnd von der vorgeschribenen ho^ef wegen ze Bregenzdorf ie gehept habent ald hie nâch iemer gehaben oder gewinnen mo^ehtint, vnd daz wir noch enkain v´nser erben noch nieman andre an v´nser stat noch von v´nsern wegen den vorgenanten Johansen Gna^epser noch dehain sin erben noch nâchkomen von der vorgeschribenen ho^ef wegen ze Bregenzdorf noch von dehainer iro zv^o geho^erde wegen niemer súllent noch wellent ansprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht nâch ân reht noch mit enkainer lay ander sache ân alle geua^erde. Wir habent o^vch baid vnuerschaidenlich gelobt vnd lobent mit disem brieue fúr v´ns vnd alle v´nser erben, der vorgeschribenen ho^ef vnd gu^eter ze Bregenzdorf mit aller zv^o geho^erde vnd dez ko^vffes reht wern ze sinne nâch dez landes reht, vnd habent im vnd sinen erben darúber zv^o v´ns ze mêrer sicherhait ze rehten wern geben vnd gesetzzet die êrsamen junkher Wilhelm von Enne¹, hern Eglolf von Roschach² ritter, Eglolf von Rosenberg³, Lútolt den Schenken von Landegg⁴ vnd Walther den Blârrer von sant Gallen, die hânt im mit v´ns gelobt iekliche besunder mit siner trúwe, der vorgeschribenen ho^ef vnd gu^eter ze Bregenzdorf mit aller zv^o geho^erde vnd dez ko^vffes reht wern ze sinne nâch dez landes reht vnd o^vch den vorgenanten Johansen Gna^epser vnd sin erben darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder v^f getriben werdent, vnd sunderlich habent wir vnd o^vch die vorgenemten wern gelobt, der vorgeschribenen ho^ef vnd gu^eter ze Bregenzdorf vnd dez ko^vffes reht wer ze sinne fúr hern Diethelm von Gúttingen Wilhelms sa^elgen von Gúttingen⁵ wîlunt êlichen sun, der in dem lande noch in diser gegen niht ist, vntz daz er ze land vnd in diz gegen kumpt, ob er noch lebt vnd in lîp ist, vnd súllent o^vch nâch dem, so er ze land vnd in diz gegen kumpt, der vorgeschribenen ho^ef vnd gu^eter ze Bregenzdorf vnd dez ko^vffes wern sin nâch dez landes reht gen dem vorgenanten hern Diethelm von Gúttingen vnd sú darumb gen dem selben hern Diethelm von Gúttingen versprechen vnd verstân an allen stetten ân allen iren schaden, wenn wâ vnd wie dik sú darumb von im an gesprochen geschadgot oder v^f getriben werdent. Bescha^ech aber, daz got niht welle, daz der obgenant Johans Gna^epser oder sin erben, ob er enwa^er, vor^b) der vorgeschribenen ho^ef vnd gu^eter wegen ze Bregenzdorf gantzlich ald in dehainen tail von ieman, wer die wa^erint, v^f getriben an gesprochen oder geschadgot wûrdint mit dem rehten inwendig dem zil vnd in den tagen, alz wir sin wern súllent sin, alz vor ist beschaiden, wenn alz wie dik daz bescha^ech, so súllent wir sú darumb ân allen fúrzug versprechen verstân vnd gantzlich entrihen ân allen iren schaden von der selben ansprâch vnd von allem dem schaden, in den sú davon ka^emint. Ta^etint wir daz niht, so habent wir vnd o^vch die vorgenemten wern alle gesworn iekliche besunder willeklich ainen gelerten ait ze den hailigen mit v^f gehabenen vingern, wenn wir von dem vorgenanten Johansen Gna^epser ald von sinen erben, ob er enwa^er, ald von ir gewissen botten ald mit ir brieuen darumb ermant werdent ze hûs ze hof oder vnder o^vgen, daz wir v´ns alle darnach inrent den na^ehsten aht tagen ân allen fúrzug antwúrten súllent gen Costentz oder gen sant Gallen in der zwaiger stett ain, in wedri dann iekliche vnder v´ns wil, vnd súllent da in offener wirt húser bi vailem gůt reht giselschaft laisten iekliche besunder ie zwai vnverdingoter mâl an dem tag, ân alle geua^erde, vnd súllent von der selben stat noch giselschaft niemer lâssen noch komen won mit dez vorgenanten Johansen Gna^epsers willen oder siner erben, ob er enwa^er, ê daz sú von der selben ansprâch vnd von dem schaden, in den sú da von komen wa^erint, gantzlich vnd gar entrigen erlo^est vnd entschadgot werdent. Vnd wenn sich nâch der ersten manung der na^ehst mânot ergât, wir laistent oder niht, so hât der obgenant Johans Gna^epser vnd sin helffer vnd sin erben, ob er enwa^er, vnd ir helffer, wer die sint, friges vrlob vnd vollen gewalt, darnâch wenn sú wellent v´ns vnd v´nser erben, ob wir ensint, vnd o^vch die vorgenemten wern ze phendenn ze no^etenn ze heftenn vnd an ze griffenn an lúten vnd an gůt vff dem land vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wâ sú daz getůn mugent, alz vil vnd alz lang, vntz daz sú von der selben ansprâch vnd von dem schaden, in den sú da von komen wa^erint, vnd o^vch von dem schaden, in den sú vnd iro helffer von dez selben phendenns no^etenns heftenns vnd an griffenns wegen koment, gantzlich vnd gar entrigen erlo^est vnd entschadgot werdent. Vnd sol v´ns noch v´nser erben, ob wir enwa^erint, noch die vorgenemten wern noch v´nser noch der selben wern lút noch gůt hie vor noch hie wider niht schirmen noch gůt sin kam frihait kain gewonhait kain burgreht kain puntnust kain lantfrid noch kain reht dez landes noch der stette gaistlichs noch weltlichs gerihtes noch enkainer lay ander sache noch fúrzug. Gieng o^vch der vorgenemten wern dehainer ab von todes wegen ald von dehainen andern sachen vnnútz wûrd, wenn ald wie dik daz bescha^ech, wenn ez danne der obgenant Johans Gna^epser oder sin erben, ob er enwa^er, an v´ns oder an v´nser erben, ob wir enwa^erint, vorderont ze hûs ze hof oder vnder o^vgen, so súllent wir in darnâch inrent den na^ehsten vierzehen tagen ainen andern wern an dez stat geben, der abgangen ist, der alz gůt vnd alz gewiss sie vnd in allen den rehten, alz der waz, der abgangen ist. Ta^etin wir daz niht, wenn wir danne vnd o^vch die andern vorgenemten wern von dem obgenanten Johansen Gna^epser ald von sinen erben, ob er enwa^er, ald von ir gewissen botten ald mit ir brieuen darumb ermant werdent ze hus ze hof oder vnder o^vgen, so súllent wir v´ns darnâch inrent den na^ehsten aht tagen ân allen fúrzug bi dem ait, den wir gesworn habent, antwúrten in der vorgeschribenen zwaiger stett ain vnd súllent da reht giselschaft laisten, alz vorgeschriben stât, vnd hant v´ns o^vch darzů gewalt ze phendenn vnd ze no^etenn an lúten vnd an gůt, wie vnd wâ sú daz getůn mugent, alz vil vnd alz lang, vntz in ie der wer an dez vnnútzzen stat geben vnd v^sgeriht wirt. Wa^er o^vch, daz wir ald der vorgenemten wern dehainer die vorgeschribenen giselschaft selber niht laisten wo^elt ald mo^eht, der sol ainen êrbern kneht mit ainem maiden an sin stat ze gisel legen, der die giselschaft an siner stat laist vnd alz túr kom ân geua^erde, alz ob er selber laisti. Wir die vorgenanten von Stainach gebrůder habent o^vch baid vnuerschaidenlich gelobt fúr v´ns vnd alle v´nser erben, den vorgenemten wern iren schaden gantzlich ab ze tu^enne, in den sú koment von der vorgeschribenen werschaft vnd giselschaft wegen, vnd habent inen vnd iren helffern darumb o^vch erlo^vbt, v´ns vnd v´nser erben, ob wir ensint, ze phendenn vnd ze no^etenn an lúten vnd an gůt ze gelicher wîse vnd in allen den rehten alz dem vorgenanten Johansen Gna^epser, alz vil vnd alz lang vntz in der schad gantzlich ab gelait vnd vergolten wirt. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so habent wir die vorgenemten Růdolf von Stainach ritter vnd Haintz von Stainach sin brůder fúr v´ns vnd alle v´nser erben v´nserú insigel gehenkt an disen brief. Wir die vorgenemten wern Wilhelm von Enne frige, Eglolf von Roschach ritter, Eglolf von Rosenberg, Lútolt Schenk vnd Walther Blârrer veriehent ainer gantzzer wârhait aller der dinge vnd gedinge, so von v´ns an disem brief da vorgeschriben stât, vnd ze mêrer sicherhait der selben dinge so habent wir o^vch v´nserú insigel gehenkt an disen brief. Der geben ist ze sant Gallen an dem na^ehsten zinstag vor sant Vrbans tag in dem jâr, do von Cristus gebúrt wârent drúzehenhundert jâr vnd darnach in dem ain vnd sibenzigostem jâre.

Source Fulltext: Chartularium Sangallense VIII, Nr. 5274, S. 468-471.