Wir Eberhart etc. bekennen, dz fur vnns kam der beschaiden Cůnrat der Múßlinger, den man nempt der alt schriber von sant Gallen, vnd offnet vor v^enns, er welte den erbern vnd beschaiden maister Hainrichen dem Keller schulmaister zů sant Gallen, Aulbrechten von Lindenberg¹, V^olrichen Lichtenstein dem schriber von Wyl² vnd Johannsen Nenggenswyler von sant Gallen von besunder trúw vnd frúntschafft wegen, so er zů inen hett, fu^egen vnd machen ze ainem rechten gemacht dise hienach geschribnen gu^etere gelegen in der vorgenanten Richenow, die von vnns vnnd vnnserm gotzhus lehen sind, item der wingart, den man nempt der Withhoff, den wingarten, den man nempt Ba^erglis hoff, hus hoffraiti torggel vnd wingarten dahinger gelegen mit allen rechten, so zů denselben wingarten huß hoffraite vnd torggel geho^erend, welhe gu^eter derselb Cůnrat vormauls koufft hett vmb Johannsen den Swartzen Hugen sa^elgen des Swartzen sun vnd Johannsen den Swartzen sinem vettern Walthers des Swartzen sa^elgen sun burgere ze Costenntz, vnd batt vnns der obgenant Cunrat Múßlinger, dz wir im desselben gema^echts gunnen weltind, also haben wir sin bett gůtwilliclich erho^ert vnd haut derselb Cůnrat mit vnnser handgetat vnd mit vnnserm gůten willen vnd gunst den vorgenanten maister Hainrich dem Keller, Aulbrechten von Lindemberg, V^olr. Lichtensteig vnd Johannsen Nenngenswyler inen allen vieren gemainlich vnd vnuerschaidenlich die vorgenanten gu^eter mit allen nútzen vnd rechten vnd mit aller zůgeho^erd gefu^eget vnd gemachet ze ainem rechten vnd redlichen gema^echte, vnd ist ouch dasselb gema^echt bescha^ehen mit aller ordnung vnd krafft worten vnd wercken, so darzů horten vnd ho^eren solten nach gewonhait vnnsers gotzhus. Dat. in vigilia Nicolai anno LXX primo.

Source Fulltext: Chartularium Sangallense VIII, Nr. 5303, S. 497.