Wir Margretha Kriegin eptischin des closters ze Wurmsbach¹ des ordens von Cittels in Costentzer bistům kúnden allen, die || disen brief sehent oder ho^erent lesen, das fro Margretha Johans Ma^edlers, den man nemmet Nefo, burgers Zúrich des goltsmides elich || wirtin mit des selben ir elichen wirtes vnd rechten vogtes hant willen vnd gunst vnd swester Adelheit Rúmlangin ir swester mit || Claus Klingers burgers Zúrich ir erkornen vogtes hant willen vnd gunst vnd die selben zwo geswestern beid vnverscheidenlich mit gesamnoter hant vnd o^vch mit vnser hant zwei pfunt genger vnd geber Zúricher pfenning jerlicher gúlte vffiren zwein húsern vnd hofstetten dem vordem vnd dem hindern, die gelegen sint Zúrich in der meren stat ze Númargte², stossent einhalb an der Barfůssen³ tor anderhalb an des Bitzinners hus, dú selben húser beidú erbe sint von vnserm gotzhus jerlich vmb zehen schilling Zúricher pfenning von den húsern vnd hofstetten ze gebenn vnd vf allem dem recht, so dar zů geho^eret, recht vnd redelich ze ko^vffenn geben hant dem erbern man Jacob Glenter burger Zúrich vmb acht vnd drissig pfunt gewonlicher Zúricher pfenning, dero die egenanten zwo geswestern nach ir vnd ir vo^egten vergicht von im gantzlich gewert sint, also mit der bescheidenheit, das die egenanten fro Margretha vnd swester Adelheit geswestern vnd ir erben vnd nachkomen, in wes hant vnd gewalt dú vorgenanten zwei húser vnd hofstett fúrbz iemer koment, die egenanten zwei pfunt pfenning dem vorgenanten Jacob Glenter vnd allen sinen erben vnd nachkomen jerlich ab den egenanten zwein húsern vnd hofstetten mit allem dem recht, so dar zů geho^eret, geben vnd richten súln ze ieclicher fronvasten jerlich zehen schilling der selben pfenning weren súln ane allen sinen vnd siner erben vnd nachkomen schaden. Vnd durch der vorgenanten fro Margrethen vnd swester Adelheit geswestern vnd ir vo^egten ba^ette so hat Růd. Hessing, den man nemmet Runtschi, burger Zúrich vnser pfleger von vnser vnd vnsers klosters wegen die egenanten zwei pfunt pfenning gúlte vf den vorgenanten zwein húsern dem hindern vnd dem vordem mit den hofstetten vnd mit allem dem recht, so dar zů geho^eret, von in vfgenomen vnd hat dú selben zwei pfunt geltz dar vffe verlihen dem egenanten Jacob Glenter vnd sinen erben vnd nachkomen ze einem rechten erbe von vnserm kloster. Vnd hant o^vch die vorgenant fro Margretha mit des egenanten Johans Ma^edlers ir elichen wirtes vnd rechten vogtes hant vnd swester Adelheit mit des vorgenanten Claus Klingers ir erkornen vogtes hant willen vnd gunst vnd si beide vnverscheidenlich mit gesamnoter hant sich verzigen aller der rechtung vorderung vnd ansprache, so si oder ir erben ald ieman ander von ir wegen nach den vorgenanten zwei pfunt pfenning gúlt vf den egenanten zwein húsern vnd hofstetten mit allem dem recht, so dar zů geho^eret, gegen dem vorgenanten Jacob Glenter ald gen sinen erben iemer dekein wise mo^echten gewinnen mit geistlichen ald mit weltlichen gerichten oder mit dekeinen sachen. O^vch hant die egenanten fro Margretha vnd swester Adelheit ir ietwederú mit des vorgenanten ir vogtes hant vnd si beid mit gesamnoter hant mit gůten trúwen globt vnd bindent ir erben her zů, der vorgenanten zwei pfunt pfenning gúlte vf den egenanten zwein húsern dem vordem vnd dem hindern vnd vf den hofstetten vnd vf allem dem recht, so dar zů geho^eret, wer ze sinne des egenanten Jacob Glenters vnd siner erben fúr ein recht erb von vnserm kloster vnd im vnd sinen erben jerlich ane ir schaden dar ab ze werenne vmb den vorgeschriben ko^vf nach recht vor geistlichen vnd vor weltlichen gerichten vnd mit namen an allen stetten, wa oder wenne si des notdúrftig sint. O^vch sol man wissen, dz dis verko^vffen beschehen ist mit willen vnd gunst fro Margreten Heinr. von Mure⁴ des goltsmides elichen wirtin, dero lipding dz vorder hus ist, vnd o^vch mit des selben ir elichen wirtes vnd rechten vogtes willen ze ir wegen, vnd dz o^vch dú selb fro Margret von Mûre mit des selben Heinr. von Mûre ir elichen wirtes vnd rechten vogtes hant globt hant, den egenanten Jacob Glenter noch sin erben noch nachkomen an den vorgenanten zwei pfunt pfenning gúlte niemer ze bekv´mbern ze svmen noch ze irrenne weder mit geistlichen noch weltlichen gerichten noch ane gericht noch mit enkeinen sachen. Vnd hier vber ze einem waren vrkúnde so haben wir vnsers klosters insigel offenlich gehenket an disen brief vnschedelich vns vnd vnserm kloster vnd allen vnsern nachkomen an allen vnsern zinsen vnd rechten. Dis beschach vnd wart diser brief geben an dem nehsten donrstag vor sant Katherinen tag, do man zalt von gottes gebúrt drúzehenhundert vnd sibenzig jar, dar nach in dem ersten jar.

Source Fulltext: Chartularium Sangallense VIII, Nr. 5299, S. 493-494.