Ich^a) V^olrich der Hager ain burger ze Wangen¹ tůn kunt vnd vergich offenlich fúr mich vnd fúr mim^b) erben vor aller ma^enclich mit disem || ga^egenwúrtigen brief allen den, die in ansehent lesent oder ho^erent lesen, daz ich mit wolbedachtem sinne vnd mit gůter vorbetrachtung recht || vnd redlich verkoft vnd ze koffend geben han ze ainem sta^eten vnd ewigen koff fúr recht lehen von dem erwirdigen herren dem abt dez gotzhus || ze sant Gallen dem erbern wolbeschaiden man Jacob dem Spîtz, den man na^enmet^b) Ja^ek von Durrenberg², vnd sinen erbun minen zehenden vss dem gůt ze Durrenberg, da der vorgenant Jacob der Spitz hw´t ze tag vff sitzt, waz von korn zehenden ia^erlich da von gaut, mit allen rechten nútzen vnd zůgeho^erden vnd mit allen den rechten, alz ich den selben zehenden bis vff disen hw´tigen tag inn^e gehept genossen vnd her braucht haun, vnd ist der koff geschehen vmb fúnf vnd zwaintzig phund vnd fúnf schilling phenning allez gůter vnd gena^emer Costentzer múns, der ich gar vnd ga^entzlich von im gewert vnd bezalt bin vnd die anderschwa in minen redlichen nutz komen vnd bewent sint, vnd darumb verzieh ich mich hw´t ze tag fúr mich vnd min erben in dez obgenanten Jacob dez Spitz vnd in siner erbun hand aller der recht vordrung vnd ansprach, so ich ald mim^b) erben zů dem vorgeschriben zehenden vnd zů dem obgenanten gůt von zehenden wegen gehept haben oder noch gehaben mo^echten, ez wa^er vff gaistlichem oder vff weltlichem gericht. Vnd wan der vorgeschriben zehend vss dem ôbgenanten gůt recht lehen ist von dem erwirdigen herren dem abt dez gotzhus ze sant Gallen, alz vorgeschriben staut, so han ich dem vorgenanten Jacob dem Spitz den obgeschriben zehenden gefergot vnd von dem lehen herren in ir hand braucht mit worten vnd mit werchen, die nach gwonhait vnd nach recht darzů gehorten vnd wie es wol kraft vnd macht gehaben mocht. Ich sol och vnd mit mir alle min erben dez obgenanten Jacob dez Spitz vnd siner erbun vff den vorgeschriben zehenden recht gweren sin nach lehens recht gen ma^enclich vff gaistlichem vnd weltlichem gericht. Vnd darzů ze ainer merrer vnd besserr sicherhait so han ich dem vorgenanten Jacob dem Spitz vnd sinen erbun vmb den vorgeschriben koff vnd vff den obgenanten zehenden zů mir vnd minen erbun ze ainem rechten gweren geben vnd gesetzt nach lehens recht den^c) êrsamen vnd wolbeschaiden man Johansen den Wermaister A^endres dez Wermaisters sa^elgen^d) sun burger ze Wangen gen ma^enclich an allen stetten vff allen gerichten gaistlichen vnd weltlichen vnd wa si dez bedurffent oder notdúrftig sint, also vnd mit der beschaidenhait, wa^er daz dem vorgenanten Jacob dem Spitz oder sinen erben der^e) obgeschriben zehende^f) yena vss dem vorgenanten gůt anspra^echig wurd mit dem rechten vff gaistlichem oder vff weltlichem gericht, da sol ich der vorgenant V^olrich der Hager oder min erben vnd der vorgenant gwerer ald sin erben in vnd sin erben vmb versprechen vnd vertretten nach dem rechten vnd der ansprach aun allen schaden tůn. Ta^et ich ald min erben vnd der vorgenant gwer oder sin erben dez nit vnd wa^er, daz der vorgenant Jacob der Spitz sich selber von dez obgenanten zehenden wegen versprechen mu^estin, wie sy dez versprechentz ze schaden ko^emin, den schaden allen sol ich ald min erben vnd der vorgenant gwer oder sin erben dem obgenanten Jacob dem Spitz oder sinen erben, ob er ênwa^er, vssrichten vnd ab tůn gar vnd ga^entzlich aun allen schaden. Ich der vorgenant V^olrich der Hager vergich och fúr mich vnd min erben, den vorgenanten gweren vnd sin erben von der gwerschaft ze lo^esent aun allen schaden, vnd ob sy ir yena ze schaden ko^emin, iren worten vmb den schaden ze globent aun ayd. Vnd dez allez ze ainem wauren vnd offenn vrkúnd so gib ich dem vorgenanten Jacob dem Spitz vnd sinen erbun disen brief besigelt mit mimme^g) aigen vnd angehenkten insigel vnd mit dez vorgenanten gweren insigel. Ich der obgenant gwer vergich der gwerschaft in aller der wis, alz vor von mir an disem brief geschriben staut, vnd darumb henk ich min aigen insigel och an disen brief. Der geben wart ze Wangen in dem iaur, do man zalt von Cristes gebúrt driv´zehenhundert iaur vnd darnach in dem zwai vnd sybentzigosten iaur, an vnser frowun aubent ze der liehmisse.

Source Fulltext: Chartularium Sangallense VIII, Nr. 5307, S. 500-501.