Ich Waltz vom Stain ritter vnd ich Wolff vom Stain sin sun tu^egint kunt vnd verjehent offentlich fúr v´ns vnd v´nser erben mit disem brief allen den, die in ansehent oder ho^erent lesen, das wir baid mit gůtem willen vnd mit gůter vorbetrachtung vnd ainhellenklich recht vnd redlich verkaufft vnd ze kauffen geben hant ainez sta^eten vnd ewigen kauffez fúr recht lehen von dem erwúrdigen gottshus ze St. Gallen, wie es wol krafft vnd macht haben mag, den erbern lúten V^olrich Búrgin stattamman ze Lindow vnd Růdolf dem Maiger burger ze Lindow vnd allen iren erben vnser gůt ze Ra^eterschen die zwen ho^ef, die hiut ze tag buwent Peter vnd Ja^ek die Schertwegg gebrůder, mit húsern mit hoffstatten vnd hoffraitinen mit aker vnd wisen holtz vnd feld waid vnd trat weg vnd steg mit wasser fliessendem vnd stendem mit aller zugeho^ert vnd v´nsern wingarten vnd boungarten ouch ze Ra^eterschen gelegen vnd v´nsern halben torggel ze Ra^eterschen vnd alles, das den vorbenenten gůten von allter von recht oder von gewonhait zůgeho^eret, besůchtz vnd vnbesůchtz benemtz vnd vnbenembtz vnder erd vnd ob erd, vnd habint darum empfangen von inen in rechtes koffes wise núntzig pfund pfening alles gůter vnd genger Costentzer múntz, der wir gar vnd ga^entzlich von inen gewert vnd betzalt sigint vnd in v´nser redlich nutz bewend habint, dieselben guter wir inen hant geben fúr ledig vnd los vnd fúr vnanspra^echig von menglich vnd sunderlich dafu^er, daz nit darab gât noch gân soll dann ab den obgenanten zwain ho^efen der korn zehend, vnd namblich den vorgenanten torrggel halben haben wir inen geben mit der beschaidenhait, wann daz wa^er, ds derselb torrggel abbrunne oder sust abgieng vnd zergieng, wie sich daz fu^egti, so soll die hoffstatt, da derselb torggel vffstund, dann gentzlich vnd gar ir vnd ir erben sin vnd sol sy denne dar an niemen weder bekrenken noch irren in dehaine wise, vnd wann die obgenanten gu^eter lehen sind von dem obgenanten gotzhaus vnd dem apt von St. Gallen, so habint wir inen dieselben gu^eter von demselben abt vnd lehenherrn geuergget vnd in ir hand bra^vht mit entzihend mit vffgend mit worten mit werchen mit ra^eten mit getha^etten vnd mit allen den dingen, die dartzů nutz vnd noturfftig sint von recht oder von gewonhait vnd wie es krafft vnd macht haben soll vnd mag ân alle geua^erd, vnd dartzů so^ellint wir vnd v´nser erben ir vnd iro erben vmb die vorgeschriben gu^eter vnd vmb den vorgeschriben koff recht geweren sin nach lehensrecht gen menglich vff gaistlichem vnd weltlichem gericht vnd an allen sta^etten vnd gerihten, wa sy dez bedúrffent vnd noturfftig sint, nach lehenz reht. Vnd ze merer vnd besser sicherhait so habint wir inen vnd iren erben vmb die obgenanten gu^eter vnd vmb den vorgeschriben koff zů v´ns vnd v´nsern erben zů rehten vnuerschaide(nli)ch geweren geben vnd gesetzt ditz nachbenembt ersam vest lút minen brůder herrn Berhtolthen vom Stain¹, Diepolten von Lutrach² vnd Hainrichen den vogt von Sumerow³ zem Lúpoltz⁴ gesezzen mit der beschaidenhait, war daz dien obgenanten V^olrich Búrgin vnd Růdolf dem Maiger oder iren erben die vorgenanten gůt ze Ra^eterschen oder dehain ir zůgeho^erd von Jemen angericht angesprochen wurd ald anbehebt mit dem rechten gaistlichem ald weltlichem gar oder ain tail, e ds sy es besezzen hetind nach lehenz reht, da súllent wir vnd die obgenanten geweren vnd v´nser erben die obgedachten V^olrich Búrgin vnd Růdolf den Maiger vnd ir erben vmb vertretten vnd versprechen mit dem rehten vnd nach lehenz reht vnd sy vnd die obgenanten gu^eter von aller ansprach ledig vnd loz machen ân allen iren schaden. Ta^etint wir dez nit vnd wa^er, daz sy sich selber darumb versprechen mu^estint, wie sy dez ze schaden kument, es sige von zehrung von brieuen von botenlohn von gricht von klag, den schaden allen so^ellint wir vnd die obgenanten geweren vnd vnser erben den vorbedahten V^olrich Búrgin vnd Růdolf dem Maiger vnd iren erben gar vnd gentzlich vssrihten vnd abtůn ân allen iren schaden. Ta^etind wir dez nit, wann dann darnach die vorgenanten geweren oder ir erben von den jetzbenembten V^olrich Búrgin vnd Růdolf dem Maiger oder von ihren erben ermant werdend ze hus ze hof ald vnder ogen mit briefen oder mit boten gemainlich ald besonder, so sont sy ze mal vnd vnuertzogenlich by der ersten manung invaren gen Lindow in die statt in ainez offen wúrtzhus jeglicher, wele denn gemant ist, mit sin selber lib vnd mit ainem pfa^erit vnd da vngeua^erlich gyselschafft laisten ie zwayma^vl an dem tag nach rehter gyselschafft sitt vnd gewonhait, wele daz nit tůn wo^elt noch mo^echt, der sol ainen kneht vnd ain pfa^erit dahin ze gysel legen in allem dem rechten, als ob er selb ze gysel la^eg, vnd sont och denn dieselben gysel von der obgenanten gyselschafft nimer gelaussen noch vffho^eren noch nit von Lindow komen, e daz den obgenanten V^olrich dem Búrgin vnd Růdolf dem Maiger vnd iren erben dú vorgeschriben gu^eter mit ir zůgeho^erd von aller anspra^vch ledig vnd loz werdend gemacht ân all iren schaden vnd dartzů der schad, den sy von dez versprechenz wegen gehebt hetind, o^vch gar vnd gentzlich abgelait wirdt an ihren schaden, vnd wenn also gelaist wirdt zwen manot oder wa^er, daz in die laistung vnd gyselschafft vertzogen wurd wider iren willen, so ha^ent sy vnd ir helffer vollen gwallt vnd gůt reht vnd fryes vrlob, v´ns vnd die obgenanten geweren, die nit gelaist ha^vnt, vnd nach den zway manoten alle geweren, sy habint gelaist oder nit, gemainlich vnd besonder darumb anzegriffent ze pfa^endent vnd ze no^etend an allen vnsern lúten vnd gůten ligenden vnd varenden, wa sy die ankomend vnd begriffend mit clag a^vn clag mit griht an gricht in stetten vnd in gerihten vf dem land vnd wie sy vns allerbest geno^eten múgent oder wend vnd v´ber alle búnd burgrecht fryhait gesetzen vnd fryhait lantgeriht vnd lantfrid, die jetz sind oder noch vffstand, alz vil vnd alz dikh, vntz daz inen diz vorgeschriben allez gentzlich vnd gar wirdt vsgeriht vnd vollefu^ert, alz vorbeschaiden ist, a^vn allen iren schaden. Wir vertzihent v´ns o^vch fúr v´ns vnd alle vnser erben an den vorgenanten guten ze Ra^eterschen vnd waz dartzů geho^eret gen den vorgenanten V^olrich Búrgin vnd Růdolf dem Maiger vnd gen iren erben aller aigenschafft aller lehenschafft aller vordrung vnd ansprach allez rechtz gaistlichez vnd weltlichez gerihtz vnd allez v´nserz rehten, vnd ist diser vorgeschriben ko^vff geschehen mit allen den worten vnd werkhen raten vnd geta^eten, so von reht vnd von gewonhait dartzů geho^ert vnd noturfftig ist. Wir verjehent o^vch fúr v´ns vnd v´nser erben, die obgenanten geweren vnd ir erben von diser gewerschafft ze lo^esent a^vn allen iren schaden, iren worten vmb den schaden ze gloubent a^vn ayd vnd a^vn bewisung, alz wir in by gůten trúwen darumb gelopt habint. Vnd detz allez ze offem vnd warem vrkund geben wir obgenanten Waltz vom Stain ritter vnd Wolff vom Stain sin sun den obgenanten V^olrich Búrgin vnd Růdolf dem Maiger vnd allen iren erben disen brief besigelt mit v´nsern aigen angehenkten insigeln vnd mit der obgenanten geweren insigeln. Wir die obgenanten geweren verjehent, dis gewehrschafft war vnd sta^ett ze hallten in aller der wise, alz vorgeschriben ist. Vnd detz ze vrkúnd habind wir v´nsere aigne insigel fúr v´ns vnd v´nsere erben och gehenckt an disen brief mit vergiht aller vorgeschribnen ding. Dirre brief ward geben an dem nehsten zinstag nach St. Matthyas tag des zwo^elfboten, do man zallt nach gottez geburt dryzehenhundert jar, darnach in dem zway vnd achtzigosten jar.

Source Fulltext: Chartularium Sangallense X, Nr. 5894, S. 13-15.