Allen^a) den, die disen brief ansehent lesent oder ho^errent lesen, kúnde ich Albreht von Ainnwille¹ vnd vergich des || o^vffenlich mit disem brief fúr mich vnd fúr alle min êrben, das ich mit wolbedâhtem můt reht vnd redlich verko^vfft || vnd ze ko^vffenn geben han dem frômen vesten ritter her Hainrich von Hermensto^vrf² vnd sinen êrben, ob er nit wa^er, || die vo^vgtay des ho^vfes vnd gůtz gelegen ze Bu^esenho^vfen³, den man nemmet des Jungen ho^vf, dú selb vo^vgtay ja^erlich giltet vnd gelten sol ainen mut gůtz vnd wolberaitz habern Byscho^vffceller⁴ messes, zway gu^eti herbst hu^enr vnd ain gůt vasnaht hůn, vnd min reht lehen gewesen ist von dem êrwirdigen gôtzhûs ze sant Gallen, vnd ist dirre ko^vff beschehen vnd vollefu^ert reht vnd redlich vmb drú pfuntz gůter haller, der selben haller ich von im gantzlich vnd gar gewert bin vnd von im enphangen han vnd an minen gůten nûtz bekêrt han, vnd han im o^vch die selben vo^vgtay mit allen rehten vnd ansprâchen, so ich dar zů hatt ald haben mo^vht, willeklich vnd frylich reht vnd redlich v^f geben vnd geuêrtgot vnd zů siner vnd siner êrben, ob er nit wa^er, handen braht von lehen herren vnd wie er sin notdurftig ist, also vnd in den rehten, das dú vorgeschriben vogtay hinnenhin mit aller zůgeho^erd des vorgenanten herr Hainrichs von Hermensto^vrfs ritters vnd siner êrben, ob er nit wa^er, reht lehen sin sol von dem vorgeschribnen gotzhûs ze sant Gallen, vnd dar vmb so han ich mich o^vch willeklich verzigen vnd verzihe mich mit disem brief gantzlich vnd gar fúr mich vnd fúr alle min êrben vnd han mich verzigen mit disem brief der vorgeschribnen vo^vgtay aller aygenschaft aller lehenschaft aller kuntschaft aller gewêr lúte vnd brief alles gaistlichen vnd weltlichen rehtes aller vôrdrung vnd ansprachen aller reht vnd rehtung, so ich oder min êrben, ob ich nit wa^er, an der ald zů der vorgeschribnen vogtay jê gehebt habint ald no^vch hinnenhin jêmer gehan ald gewinnen mo^ehtint. Ich obgenanter Albreht von Ainnwille han o^vch gelobt mit miner gůten trúwe, das ich vnd min êrben, ob ich nit wa^er, der vorgeschribnen vo^vgtay vnd o^vch ko^vffes reht wern súllint sin nach reht des landes gen ma^enlichem an gaistlichem vnd an weltlichem geriht vnd an allen den stetten, wenn wâ ald wie dik sin der vorgenant herr Hainrich von Hermenstorf ritter vnd sin êrben, ob er nit wa^er, bedurfent vnd notdurftig sint. Vnd des ze vrkúnde der warhait aller der ding, so an disem brief geschriben stat, so han ich obgenanter Albreht von Ainnwille fúr mich vnd fúr alle min êrben min insigel o^vffenlich gehênkt an disen brief. Der geben ist an dem na^ehsten ma^entag vôr sant Mathien tag des zwelfbotten in dem jâr, do man zalt von Cristus gebúrt drútzehen hundert jâr, ahtzig jâr vnd dar nâch in dem vierden jâre.

Source Fulltext: Chartularium Sangallense X, Nr. 5998, S. 173-174.