Wir V^olr(ich) von Hohenloch¹ bekennen offenlich mit disem brief vor allerma^ennclich, daz wir wolbeda^ehticlich mit vnsers rates ra^vt vns selbe mit allen vnsern vesten slossen vnd stetten landen vnd lu^eten vns vnd vnsern landen vnd lu^eten zů nu^etz vnd zů frumen verbunden haben zů den ersamen wysen burgermeistern ra^eten vnd burgern gemeinlichen der stat Regenspurg vnd andern dez heilgen Ro^emischen rychs stetten Auspurg, Vlm, Costentz, Esselingen², Ru^etlingen³, Rotwil⁴, Wyl⁵, V^eberlingen⁶, Memingen⁷, Bibrach⁸, Rauenspurg⁹, Lindawe¹⁰, sant Gallen, Kempten¹¹, Kaufbu^er¹², Lu^etkirch¹³, Ysny¹⁴, Pfullendorff¹⁵, Wangen¹⁶, Bůchorn¹⁷, Bůchawe¹⁸, Nordlingen¹⁹, Dinckelspu^ehel²⁰, Rotenburg uf der Tuber²¹, Gemu^ende²², Halle²³, Heilprunnen²⁴, Winpfen²⁵, Winsperg²⁶, Bopfingen²⁷, Aulun²⁸, Giengen²⁹, Wyl in Tu^erga^ewe³⁰, Appenzelle³¹ daz land, Winnszhein³² vnd Wyssenburg³³, die ietz in dem bund zů Swaben sind vnd noch fu^erbaz daryn kument, in ze helffen vnd getru^elich by gestendig ze sin wider aller ma^ennclich niemand vsgenumen denne vnser herre der Ro^emisch ku^enig vnd dem heiigen Ro^emischen rych siniv^e reht in aller der wyse, alz ir buntbrief vnd bunt wyset, den sie ietz mit einander hand, vnd wie offt dez not geschiht, daz wir von in vmb hilf ermant werden, so su^ellen wir in dienen vnd helffen mit zehen gleuen wol erziu^egtes volkes on verziehen, wa wir hin ermant werden, on geuerde. Were aber, daz diu^e selbe sach, darumb denne div^e manung geschehen were, nit erobert werden mo^eht mit so^elicher hilf, so sol der clagend tail zwen vnd der helffent tail dry man darsetzen, vnd wie die fu^enf man hilf scho^eppffent, da by sol ez aber beliben nach ires buntbriefs wysung vngeuerlich, vnd die selben dienst vnd hilf so^ellen wir in tu^en uf vnser kost vnd schaden. Were auch, daz der vorgenanten stet eine oder mere oder ir burger oder arme man mit vns oder mit vnsern dienern einem oder mere, die nicht in gerihten gesessen weren, zů schicken gewu^ennen in der zit ditz verbundez, darumb sollen die selben clagenden nemen einen gemainen man vzz disen dry mannen Symond von Nydeck³⁴, Zu^erch von Steten³⁵ vnd Engelhart Tanner, welhen sie wellen, vnd sol ieder tail zwen man darzů setzen, vnd uf die fu^enf man sol zů gelegenen tagen, die denne der fu^enft man bescheidet, geschehen one verziehen, waz reht ist. Hat aber der stet deheiniv^e oder deheiner der iren zů dheinen dem vnsern icht zů sprechen, der in einem gesworn geriht gesessen ist, der oder die selben so^ellent reht nemen von dem oder von den selben in dem geriht, da sie gesessen sind. Wir so^ellen schaffen, daz in reht an verziehen gang vnd daz sie vnbedingt da selbs von dannen gelassen werden. Ditz reht sol die von Rotenburg nit an gan. Wir haben auch den selben steten allen gemainlichen vnd ir ieglicher besunder vsgenu^emen vnd vzz disem bund gesetzt alle ir ehaftin priuileye reht fryheit vnd gewonheit, die sie uf disen tag biz her braht hand, on geuerde, also daz sie alle daby beliben so^ellen on vnser vnd aller mennclichs von vnsern wegen irrung vnd hindernu^esse, besunder den von Rotenburg ir lantgeriht, daz in dise verbu^entnu^ezz daran nit schaden sol noch enmage gen vns noch gen den vnsern in dhein wyse. Vnd were, daz der vorgenanten dryer manne einer oder mere abgieng, wie offt daz geschehe in zit ditz verbundez, alz offt hand die vorgeschriben stette gewalt, ie einen andern oder ander vzz vnsern dienern, welhe sie wo^ellent, an dez oder an der abgangen stat ze nemen. Ez so^ellen auch alle vnseriv^e slozz veste vnd stett, wie die namen hand, der selben stett gemainlichen vnd ir ieglicher besunder offeniv hu^eser sin in vnd zů allen iren no^eten, alz lang vnd alle die wyl diser vnser bunt mit den selben steten wert. Vnd daz wir den selben bunt mit den selben steten haben vnd halten wo^ellen in der wyse, alz hie vorbegriffen ist, on all argelist vnd geuerde, darvmb so haben wir gelobet by gůten tru^ewen vnd darzů gesworn liplichen einen gelerten ayde zů den heilgen mit uf geboten vingern. Darzů so^ellen alle vnser diener schultheissen vo^egt amptzlu^et, wie die namen hand, vnd burger auch alle geloben by gůten tru^ewen vnd darzů liplich sweren gêlert ayde zů den heilgen mit ufgeboten vingern, disen vnsern bunt mit vns ze halten in aller der wyse, alz vorbegriffen ist, on geuerde. Vnd welher vnserr diener aber den bunt also nit sweren wo^ellten, der sol auch in dez bundes schirm vnd hilf nit sin. Vnd welher vnser diener, ir sy einer oder mere, den bund also mit vnd^a) gesworn het vnd darnach vrlaub von vns nemen, den oder die su^ellen wir in geschriben geben gen Halle, wie offt daz geschehe, vngeuerlich. Wie offt auch vnserr amptman einer oder mere entsetzt vnd ein andrer oder ander an ir stat gesetzt wu^erden, der oder die selben ander gesetzt amptlu^et sollen denne auch sweren, vnsern vorgeschriben bund zů halten in aller der wyse, alz vorgeschriben ist, vngeuerlich. Zů warem offem vrkunde geben wir disen brief versigelt mit vnserm aygenn anhangenden insigel. Geben, do man zalt nach Christs gebu^ert driv^eczehenhundert iar vnd darnach in dem vier vnd ahtzigostem jare, an dem nehsten frytag vor dem wyssen suntage.

Source Fulltext: Chartularium Sangallense X, Nr. 5999, S. 174-176.