Wir Vlrich von Hohenloch bekennen offenlich mit disem briefe vor aller meniclich, daz wir wolbedehticlich mit rate vnsers râtes vns selber mit allen vnsern slozzen landen vnd leuten vns vnd vnsern leuten vnd lande zu nutz vnd zu frummen verbunden haben zu den ersamen wisen burgermeistern reten vnd burgern gemeinclich der stat Regenspurg vnd andern des Romischen richs steten Augspurg, Vlme, Costentz, Ezzlingen, Reutlingen, Rotwile, Wyle, V´berlingen, Memingen, Bybrach, Rauenspurg, Lindaw, sant Gallen, Kempten, Keuffbeurn, Leutkirch, Ysny, Pfullendorff, Wangen, Buchorn, Buchaw, Nordlingen, Dinkelsbu^ehel, Rotenburg vff der Tuber, Gemu^end, Halle, Heilpr(un), Wympfen, Winsperg, Bopfingen, Oln, Giengen, Wyle in Turgow, Appezelle daz lant, Winsheim vnd Wizenburg, die ietz in dem bunde ze Swaben sin vnd noch furbaz dor in ko^vmen, zehen gantze jor, die schirst noch einander kumen on vnderbinde nach dato ditz briefes, also daz wir gesworn haben einen leiplichen gelerten eyt zu den heilgen mit vffgeboten vingern, ob daz geschehe, daz iemant were, wer der wer, niemant vzgenumen, der selben stete eine oder mere in der zit ditz vrbundes von irem bunde oder von andern irn briefen fryheiden rehten vnd gewonheiden, als sie die biz her braht haben oder sie an irn steten leuten vnd guten beschedigen oder bekrenken wo^elt, wie oder in welcher wise daz geschehe, daz sullen wir, wenne vnd wie wir des innen oder geinnert werden, zestund der oder den gedrungen oder geschedigten steten raten vnd helfen vnd widersten vnd getrewlich do wider beholfen sin. Ez sullen ouch vff den selben eyt alle vnser vesten sloz vnd stete, wie die namen hant, der selben stete aller gemeinclich vnd ir ieclicher besunder offen hu^eser sin in vnd zu allen i^ern no^eten, als lange vnd all die wile diser vnser bunt mit den selben steten wert. Zu gutem vrku^ende vnd bezzerr sicherheit geben wir in disen brieff versigelt mit vnserm eyginen anhangendea insigel. Geben nach Christi gebu^ert dru^ezehenhundert jare, dor nach in dem vier vnd ahtzigsten jare, an dem weizzen suntage.

Source Fulltext: Chartularium Sangallense X, Nr. 6001, S. 177-178.