Wir die von Regenspurg ein frie stat vnd wir die andern dez heiligen Romischen rychs stet Augspurg, Vlm, Costentz, Ezzelingen, || Ru^etlingen, Rotwile, Wile, V´berlingen, Memmingen, Bibrach, Rauenspurg, Lindauwe, sant Gallen, Kemptun, Kauffbu^eren, Lu^etkirchen, Ysnin, || Pfullendorff, Wangen, Bůchorn, Buchauwe, No^erdlingen, Dinkelspúhel, Rotenburg vf der Tuber, Gemu^ende, Halle, Heilprunnen, || Winphen, Winsperg, Bophingen, Alun, Giengen, Wil in Turgauwe, Appentzelle daz lant, Windshen vnd Wiszenburg, alz wir ietz in dem bunde bi ein ander sin, bekennen offenlich mit disem brief vor aller meniglich, daz wir mit rat vnserr reit wolbedechtlichen fu^er vns vnd alle die, die ietz bi vns in dem bunde sin oder nach fu^er zů vns dar in komen, vns verbunden haben zů dem edeln herren herren V^olrich von Hohenloch zehen gantzu jar, die schierst nach ein ander komen one vnderbint nach dato disz briefez, also daz wir gesworen haben einen liplichen gelerten eyt zů den heiligen mit vfgeboten vingern, ob daz gescheche, daz yemant, wer der were, nyemant vsgenomen, den obgenanten herren oder die sinen in der zit disz verbundez von disem bunde oder von andern sinen briefen friheiten rehten oder gewonheiden, als er die biz her brauht hat, oder in an sinen steten lúten vnd gůten beschedigen oder bekrenken wolten, wie oder in welher wise daz gescheche, daz súllen wir, wenne vnd wie wir dez innan oder geinnert werden, zů stunt dem obgenanten herren raten vnd helffen widersten vnd getru^elichen da wider beholffen sin. Ez sullen auch vf den selben eyt alle vnser veste schlozze vnd stet, wie die namen hant, dez obgenanten herren von Hohenloch vnd der iren offenne huser sin in vnd zů allen iren no^eten, alz lang vnd alle die wile diser vnser bunt mit dem obgenanten herren wert. Vnd dez zů vrkunde vnd bessern sicherheit geben wir dem obgenanten herren disen brief besigelt von vnser aller^a) heizze wegen mit der von Halle kleinen insigel. Geben nach Cristus gebu^erte dru^ezehen hundert iar vnd dar nach in dem vier vnd ahtzigestem an dem wissen sunntage.

Source Fulltext: Chartularium Sangallense X, Nr. 6000, S. 176-177.