Ich^a) Johans Sto^ekli statamman ze Veltkirch¹ kúnd vnd vergich offenlich mit disem brief, daz ich ze gericht sass ze Veltkirch in der stat || an dem na^echsten fritag vor v´nser frowen tag ze der liehtmiss von gnaden vnd gewaltz wegen dez edeln vnd ho^vcherbornen mines || gna^edigen herren gra^vff Růdolffs von Montfort² herren ze Veltkirch, do kament fúr mich vnd fúr offen verbannen gericht mit fúrsprechen || die wolbeschaidnen frowen Margareth Vaistlin wilont Kůnen Volrers seligen elichú husfrow mit ir vogt Hainrichen Hofschriber ze Veltkirch vnd o^vch Nes dez egenanten Kůnen Volrers seligen elichú to^vchter Ba^ertellis vogtz von Swartzenbachs³ elichú husfrow mit ir rechten vogt Haintzen Ba^echlin burger ze Veltkirch, wan der egenant ir elicher man ze den ziten in landes nit wz, vnd offnotend vor mir vnd vor offem verbannem gericht mit iren vo^egten vnd fúrsprechen von der erbschaft wegen, so sú baid angevallen war von dem egenanten Cůnen Volrer seligen, darvmb wa^erint sú lieplich vnd tugentlich nach iren frúnden vnd ander erber lút ra^vt frúntlich v´ber ain komen, als hienach geschriben sta^vt, dez ersten daz der egenanten Margarethen Vaistlinun vnd ir erben werden sol vnd dz ze rechtem aigenn nu hinnanhin ha^vn sol alles daz gůt, ez sig ligentz oder varentz aigen oder lehen pfantschaft oder ander gůt benemptz vnd vnbenemptz besůchtz vnd vnbesůchtz, dz der egenant Cůn Volrer selig gela^vssen ha^vt Kurwalhen⁴ halb hie dishalb dem Bodensew, vnd sunderlich waz er in Kurwalhen het gehept^b), dz so^elt alles der egenanten Margarethen Vaistlinun vnd ir erben volgen vnd dz ze rechtem aigenn ha^vn a^vn all widerred vnd a^vn all geverd, vsgenomen die vier vnd fúnfftzig pfunt pfenning, die in der edel min gna^ediger herr grauff Hainrich^c) Werdenberg von Sangaus⁵ schuldig wa^er, vnd die zwai vnd viertzig pfunt pfenning, so in Hensli von Vnderwegen⁶ schuldig wa^er nach ir brief sag, die so^eltind der egenanten Nesun Volrerinun vnd ir erben gentzlich a^vn alles minnren werden a^vn all widerred vnd^d) a^vn all geverd, vnd wz ir oder ir erben an der egenanten mins herren gra^vff Hainrichs geltschuld ab gieng, darvmb so^elt si die egenant Margareth Vaistlin vnd ir erben von lo^esen a^vn ir schaden. Ez sol o^vch die egenant Margareth Vaistlin vnd ir erben alle die geltschuld geltun, so der egenant Cůn Volrer selig in Kurwalhen hie dishalb Sews gela^vssen ha^vt ze geltenn, a^vn schaden der egenanten Nesun Volrerinun vnd ir erben. Wa^er aber, dz inen baiden oder ir erben iena gelt an barschaft gezo^egt wrd, so der egenant Cůn Volrer selig ze behaltenn geben het, wa dz wa^er ze Kurwalhen oder ze Swaben, da von sol der egenanten Margarethen Vaistlinun ain drittail werden vnd der egenanten Nesun Volrerinun die zwen tail a^vn all geverd. Ez sol o^vch der egenanten Nesun Volrerinun vnd ir erben werden vnd ze aigen ha^vn die vorgenanten sechs vnd núntzig pfunt pfenning, als vor ist beschaiden, vnd alles dz gůt, ez sig ligentz oder varentz aigen oder lehen pfantschaft oder ander gůt, so der egenant Cůn Volrer selig enhalb dem Bodensew gela^vssen ha^vt, benemptz vnd vnbenemptz besůchtz vnd vnbesůchtz, vnd sol o^vch alle die geltschuld gelten, so er enhalb dem Bodensew hinder im gela^vssen ha^vt, a^vn schaden der egenanten Margarethen Vaistlinun vnd ir erben, vsgenomen ob iena gelt an barschaft funden wrd, als vor ist beschaiden, vnd sol also ietwedrú frow vnd iro erben bi dem vorgenanten irem tail vnd gu^etern beliben in aller wis, als o^vch vor ist beschaiden, a^vn all sumung vnd ierrung vnd a^vn all geverd, wan sú daz baid alles mit miner hand vnd mit den vorgenanten iren vo^egten vor mir vnd vor offem verbannem gericht mit recht vnd mit vrtail volfu^ert vnd geta^vn ha^vnt mit vfgebenn vnd mit entzihnúst vnd mit allen sachen worten vnd werchen, als ez alles wol kraft ha^vt vnd vest vnd sta^et beliben mag nu vnd hie nach. Dez ze vrkúnd ainer wa^vrhait von iro baider bett wegen vnd o^vch von dez gerichtz wegen vnd sunderlich daz die egenanten Hainrich Hofschriber vnd Haintz Ba^echli den egenanten frowen mit miner hand vnd mit dem rechten ze rechten vo^egten geben wrdent, henk ich obgeschribner statamman min aigen insigel an disen brief vnscha^edlich mir vnd minen erben. Wir die vorgenanten Hainrich Hofschriber vnd Haintz Ba^echli vergehent o^vch, dz disú sach, als vor ist beschaiden, mit v´nsern gůten willen vnd gunst volfu^ert ist, als ez wol kraft ha^vt vnd ha^vn mag, wan wir dez tags der obgenanten frowen recht vo^egt warent, als o^vch vor geschriben sta^vt. Dez ze vrkúnd henkent wir baid v´nsrú aigenn insigel an disen brief vnscha^edlich v´ns vnd v´nsern erben. Geben ze Veltkirch an dem na^echsten fritag vor v´nser frowen tag ze der liehtmiss in dem iar, do man zalt von Cristus gebúrt drúzehenhundert vnd achtzig iar, dar nach in dem vierden jar.

Source Fulltext: Chartularium Sangallense X, Nr. 5996, S. 169-171.