Ich^a) V^olrich Habch stattamman ze Costentz¹ kúnd vnd vergich des offenlich mit disem brief allen den, die in ansehend oder ho^erend lesen, das ich ze Costentz in der statt des tages, als diser brief geben ist, offenlichen ze || gericht sass, do kament fúr mich vnd fúr offen gericht der beschayden Hainrich der Spicher, fro Elizabeth sin elichú wirtinne vnd Johans Spicher des egenanten Hainrich des Spichers rechter elicher sun burger ze Costentz || ze ainem tayl vnd der fromm vest her V^olrich von A^emptz² ritter der elter ze dem andern tayl. Die egenanten Hainrich, fro Elsbet vnd Johans die Spicher offnotont da vor mir vnd offem gericht mit iro fúrsprechen || vnd sprâchent, das sy von dem selben herr V^olrichen von A^emptz ritter dem eltern an barem gůt enphangen habind sibentzig phund acht phund vnd zehen schilling alles gůter vnd ga^eber phenning Costentzer múnss vnd sigind och dero gar vnd gantzlich von im bericht gewert vnd bezalt vnd habind sy in iren redelichen nutz geben vnd bewendet, als sy a^ellú drú vor gericht veriahend, vnd das sy och fúr sich vnd alle ir erben dem selben herr V^olrich von A^empt^b) dem eltern vnd allen sinen erban vmb die selben a^echt vnd sibentzig phund vnd zehen schilling gůter Costentzer phennig habind ze koffend geben recht vnd redelich vnd aines besta^etten iemerwerenden ewigen vngevârlichen koffes iro owe, die man nempt Ma^vner Owe³ vnd die in dem Rintal gelegen wa^ere vnd stiesse ainhalb an des halbritters gůt anderhalb an Ma^vner veld vnd aber ainhalb an der Schmitter gůt vnd an der Bruner gůt, das alles mit wasen mit zwy mit wisan mit holtz mit veld mit wunne mit waiden mit stoken studan vnd mit stainen mit stegen mit wegen mit abwegen mit wasser mit wasser laity flússen vnd gengen mit allen rechten frúchten nútzen vnd gewonhaiten vnd mit aller ehafty, es sye benemptes ald vnbenemptes wissendes oder vnwissendes sy ligend in dem Rin oder vsserthalb dem Rin es sye gesůchtes ald vngesůchtes, als das alles an sy komen vnd bra^vcht wa^ere vnd als sy die selben owe mit allem dem, so dar zů ald dar in von recht oder von gewonhait geho^eret vntz her vff disen hútigen tag, als diser brief geben ist, gehebt besessen vnd genossen hettind, also vnd mit den selben rechten woltynd sy im ôch das vertigen vnd vffgeben fúr recht lechen von dem erwirdigen gotzhus ze sant Gallen. Ôch offnotand da by der selbe Hainrich Spicher, fro Elsbeth sin elichú wirtinne vnd Johans sin sun, das vntz her vff disen tag vnd dis gezite dem beschaiden V^olrich dem Bo^vssen burger ze Costentz ab vnd vsser der egenanten owe mit aller zůgehorde zway phunt gůter phenning der obgedachten múnss ja^erkliches vnd je des jâres besunder ze rechtem libgedinge gienge vnd ga^vn solte, den selben V^olrich Bossen, der och vor gericht ze gegen was, hettind sy aber der selben zway phund phenning ja^erkliches geltes vnd libdinges vff andrú irú gu^eter nach sinem willen gewiset, als in des wol benu^eget hette vnd daran er och komen wa^ere, vnd solty och fúrbass mer mit der egenanten owe vnd was dar zů geho^eret nv hinnenthin nút ze schaffend noch ze tu^end haben noch och dekaines rechten dar zů sprechen vorderan noch niemerme gemůtan in dekaine wise ân alle geva^erde. Vnd ba^vtend inen die obgenanten Hainrich Spicher, fro Elsbeth sin elichú wirtinne vnd Johans Spicher sin rechter sun nach dirre offenung iren fúrsprechen an ainer vrtayl ze ervarend, wie sy also die vorgedachten owe mit allem recht vnd mit allem dem, so dar zů ald dar in geho^eret, als vor ist beschayden, ze des vorgenanten herr V^olriches von A^emptz vnd ze siner erben handen vnd gewalt bringen vnd vertigen vnd och vff geben soltind, als recht wa^ere vnd das es kraft vnd macht hette vnd da mit er sin erben vnd nachkomen nv vnd och hie nach besorget wa^erind. Do fragt ich obgenanter amman vrtayl vmb, was recht wa^ere, do ward ertaylet, das die egenante fro Elsbethen die Spicherinen das gericht vor an vnd des ersten vmb dis sach mit ainem andern man, des sy an des gerichtes ring begertú, danne mit ir elichen wirt vnd doch mit sinem willen bevogten solty, mit dem dis sach vollefu^eret wurde, vnd das danne dar na^vch aber bescha^ech, als recht wa^ere. Do můtat sy des wolbeschaiden mannes Cůnrat Hagens ze disen ziten burgermaister in der egenanten statt ze Costentz⁴, der ward ir och also mit vrtayl v´ber dis sach vor gericht ze vogt geben, der selbe vogt stůnd och do an stett vnd anhendes ze ir dar vnd batt ir an ainer vrtail ze ervarend, wie sy nv in diser sach varen vnd tůn solty, als recht wa^er vnd das es kraft vnd macht hette. Do ward ertaylt, das sy der selbe vogt ze drin malen vsser des gerichtes ring fu^eren solt vnd sy ze jeglichem mâl fragen solt, ob sy dis vertigen entzihen vnd vffgeben willeklich vnd gern tůn wolt vnd ta^ette. Das tett och der selbe vogt, als im ertailt ward, vnd gieng ze jeglichem mâl mit ir wider în fúr das gericht vnd saite da vff sinen ayd, das sy im ze drin malen gesait vnd veriehen hette, das sy es willeklichen gern vnd vnbetwungenlichen tůn wolt vnd ta^ete. Dar nach fragt ich obgedachter amman aber vrtayl vmb, was nv recht ware, do ward ertailet mit rechter gesamnoter vrtayl, wa nv die obgedachten Hainrich Spicher, fro Elsbeth sin elichú wirtinne mit dem vorgenanten Cůnrat Hagen ir erkornen^c), Johans Spicher des jetzgenanten Hainrich Spichers rechter sun vnd och der obgenant V^olrich Bo^vss von des libdings wegen, als vor ist beschayden, dar stu^endint vnd da offenlichen vor gericht die vorgedachten owe mit allem recht vnd mit aller zůgeho^erde, als das alles an sy komen vnd bracht wa^er vnd sy es och alles vntz vff disen hútigen tag, als diser brief geben ist, gehebt besessen vnd genossen hettind vnd sunderlich als der egenant V^olrich Boss sin libding dú zway phunt Costentzer phenning ja^erkliches geltes dar vff da von vntzher besessen genossen vnd ingenomen hette vnd och a^ellú sinú rechten, als vor geschriben sta^vt, der vorgenante Hainrich der Spicher, Johans sin sun, V^olrich Boss, die drie mit iren handen, vnd dú egenant fro Elsbeth mit ir vnd des vorgedachten Cůnrat Hagens ir erkornen vogtes handen dem vorgenanten her V^olrich von A^emptz dem eltern ritter an sin hand ledeklich vnd los vertigotind vnd vffga^ebind vnd sich dar an a^ellú vierú fúr sich vnd alle ir erben gen dem selben her V^olrich vnd gen allan sinen erban vnd nachkomen ze vrta^ete vnd ze rechtem aygen entzigind aller aygenschaft aller lehenschaft aller vorderung vnd anspra^vch alles vszugs schirms vnd rechtes gaistliches vnd weltliches gerichtes, da mit sy ald dekain ir erben die vorgenanten owe vnd schwas dar zů geho^eret gar ald an dehaynem tayl fúr aygen oder fúr lehen nv ald hie nach jemer kúndint ald mo^echtind bekúmberren bekrenken ald angesprechen in dekaine wise, vnd och da by der vorgeschriben Hainrich Spicher, fro Elsbeth sin elichú wirtinne vnd Johans Spicher sin sun fúr sich vnd alle ir erben lobetind mit iren gůten trúwen vor gericht, wa^er ob dem vorgenanten her V^olrichen von A^emptz sinen erban ald nâchkomen die vorgenempten owe gar ald an dehaynem tayl jemand anspra^eche fúr aygen oder fúr lehen oder mit dekainer ander ansprâch, als das dem obgedachten V^olrich Bôssen oder jemand anders dekain libgeding da von ald dar ab nv hinnenhin gang oder ga^vn so^elle, das sy in vnd sin erben des och verstan vnd versprechen wellind an allan gaistlichen vnd weltlichen gerichten vnd an allen den stetten, da er des nottúrftig ist vnd wirt ald sin erben vnd nachkomen, gantzlich a^vne allen des selben her V^olriches von A^emptz vnd siner erban vnd nachkomen schaden, vnd och der owe vnd was dar zů geho^eret vnd dis koffes iro recht wer vnd troster ze sind, doch nit fúro danne na^vch gewonhait vnd recht der statt ze Costentz a^vn alle geva^erde vnd das sy danne dar na^vch mit im kertind ze minem herren dem abt von sant Gallen vnd im da das obgedachte gůt die owe vnd schwas dar zů geho^eret, wan es von dannen lehen wa^ere, och vertigotind mit des selben lehenherren hand willen vnd gunst na^vch lehens recht. Wenne das bescha^eche vnd vollefu^eret wurde, das es danne vmb die sach wol kraft vnd macht hette nv vnd och hie nâch mit dem rechten. Das selbe vertigen entzihen gelúbd vnd vffgeben vollefůrten da die obgenanten Hainrich Spicher, fro Elsbet sin elichú wirtinne mit dem obgedachten Cůnrat Hagen ir erkornen vogt vnd Johans Spicher des egenanten Hainriches rechter sun vnd och der vorgenante V^olrich Bôss von des libdinges wegen gen dem obgedachten herr V^olrichen von A^emptz ritter mit allen den worten werken ra^eten vnd geta^eten vnd mit aller kraft, so dar zů hort ald nottúrftig was nâch gewonhait vnd recht vnd als inen och mit frag vnd mit rechter gesamnoter vrtayl offenlichen vor gericht ertailt ward. Vnd des alles ze ainem vrkúnde der wârhait so habind wir die obgenanten V^olrich Habch stattamman, Hainrich Spicher, Cůnrat Hagen vogt vnd V^olrich Bôss burger ze Costentz, als vor ist beschaiden, v´nsrú insigel gehenket an disen brief, vnder dú selben insigel wir die vorgenanten Johans Spicher vnd Elsbeth Hainrich Spichers elichú wirtinne, wan wir aygener insigel nit enhabind, v´ns vesteklichen bindent aller diser ding mit disem brief. Der ist ze Costentz geben, do man von Cristus gebúrt zalt drúzehenhundert jâr, dar nach in dem fúnff vnd achtzigsten jar, an dem na^echsten donrstag vor v´nser frowen tag, als ir v´nser herre von dem engel verkúndet ward.

Source Fulltext: Chartularium Sangallense X, Nr. 6065, S. 244-246.