Allen^a) den, die disen brief ansehent lesent oder ho^erent lesen, tůn ich Cůntz von Múnchwile || sesshaft ze Ffrowenfeld kunt vnd vergich offenlich mit disem brief fúr mich vnd fúr alle mine erben, || daz ich von miner kumberhafti wegen redlich vnd recht fúr mich vnd fúr alle min erben verko^vft || ha^vn die vogtien hie nachgeschriben ze V´tershouen vnd ze Braitenakker mit allen rechten nútzen zinsen gewonhaiten vnd mit aller zůgeho^erd, die min lehen warent von dem gotzhus von sant Gallen vnd die ab im geaigent vnd gefrient sint von dem erwirdigen fúrsten minem gna^edigen herren abt Cůnen des vorgenanten gotzhus ze sant Gallen, alz der brief¹ wol wiset, der dar vmb von demselben minem herren geben ist, vnd ha^vn fúr recht aigen ze koffent geben an daz ewig liecht ze Vischinan in dem closter, daz her Hug sa^elig von der Hohen Landenberg gestift vnd geordnot hett durch her Johansen von Luterbergs sa^elgen couent brůders daselbs ze Vischinan sel hailes vnd trostes willen, vmb zwelf pfunt pfenning gůter vnd genemer Costentzer múns, dero ich och gantzlich bezalt bin von minem lieben o^ehan her Iberger von Luterberg och couent brůder ze Vischinan des vorgenanten her Johansen sa^elgen von Luterberg elichen brůder an den stetten, da ich minen fromen mit geschaffot ha^vn. Vnd ha^vn och dieselben vogtien mit allen zůgeho^erden vfgeben vnd an dasselb ewig liecht gevertgot vnd bracht, alz recht sitt vnd gewonlich waz vnd alz es billich kraft ha^vt vnd haben sol nu vnd hernach. Vnd ha^vn mich och darv´ber entzigen vnd verzieh mich och redlich vnd recht mit disem brief fúr mich vnd fúr alle min erben aller aigenschaft aller lehenschaft aller manschaft aller gewer aller kuntschaft aller zúgnúst lút vnd brief aller gemaind alles rechten gaistlichs vnd weltlichs gerichts aller vordrung vnd ansprach, so ich ald min erben zů den vorgenanten vogtien ald zů den nútzen mit aller zůgeho^erd ie gewunnen ald hernach iemerme geha^vn gewinnen ald erwerben mo^echten von recht ald von gewonhait ald von dehainerlay andren sach wegen a^vn geva^erd. Ich ha^vn och gelobt vnd loben vesteklich mit disem brief fúr mich vnd fúr alle min erben, der vorgenanten vogtien an daz ewig liecht recht wern ze sint vf allen gerichten an allen stetten vnd gen allermenglichem nach dem rechten vnd nach des landes sitten vnd gewonhait an geva^erd. Vnd des alles ze offem vrkúnd der warhait so ha^vn ich Cůntz von Múnchwile da obgenant min insigel offenlich gehenkt an disen brief. Der geben ist an dem na^echsten samstag nach des haiigen crútz tag ze maigen, do man zalt von Cristus gebúrt drúzehenhundert vnd ahtzig jar, dar nach in dem sechsten jare.

Source Fulltext: Chartularium Sangallense X, Nr. 6137, S. 327.