Wir^a) Pilgreim von gots gnaden ertzbischof ze Saltzburg des hailigen stůls ze Rom legat bekennen offenlich mit disem brief, wan wir die stett Regenspurg vnd Basel fry stette || vnd ouch des heiligen Ro^emischen reychs stette Augspurg, Nu^erenberg, Costentz, Vlme, Esslingen, Rútlingen, Rotwil, Wile, V´berlingen, Memingen, Bybrach, Rauenspurg, Lindowe, sant Gallen, || Pfullendorf, Kempten, Ko^vuffpúrren, Lútkirch, Ysni, Wangen, No^erdlingen, Rotenburg uff der Tuber, Dinkelspúhel, Swinfurt, Wintzhain, Wissenburg, Halle, Haylprunnen, Gemúnd, Wimpfen, || Winsperg, Aulun, Giengen, Bopfingen, Bůchorn, Múlnhusen vnd Bůchowe so redlich vnd gerecht an dem hailigen reych vnd o^vch an vns erfunden haben, vnd wan auch si in allen sachen als gelich fridlich wege fúrhand nement, dar vmbe vnd wan auch wir mit alln dingen uff fride auch genaiget seyn, so haben wir vns yetzů mit gůtem willen vnd mit wolbedahtem sinne vnd můt got ze lob dem hailigen Ro^emischen reych ze eren vnsselb vnd gemainem lande ze frid vnd ze gemach vnsselb mit alln vnsern stetten schlossen landen lúten vnd o^vch gůten zů den vorgenanten stetten allen vnd zů allen iren slossen stetten lúten vnd o^vch gůten yetzů williklich vnd gern verstrikt vnd verpunden verstriken vnd verpinden auch vns des zů in mit rechter wissent vnd mit kraft dis briefs mit vnsern gůten trewen hinnan bis uff sant Michels tag, der allerschierist komet, vnd dar nach fümf gantze jar die na^echsten nach einander ze zellent. Also wa^er es, das yemant, wer der wa^er, die vorgenannten stett gemainlich oder ir ain oder mer besunder oder die iren, die in ze versprechen stand, in der vorgeschribenn zeit vnd jaren angriffe oder beschediget an inselb oder an iren stetten lúten oder gůter oder wie ald in weihe weise das bescha^eh, als das sich die geswornen ra^ete derselben stett oder statt auff ir er vnd ayde erkanten, das in oder den iren vnrecht gescha^eh oder beschehen wa^ere vnd das man in das nicht widerkeren wolte, wenn denn wir vorgenanter Pilgreim darvmb von den selben stetten oder statt oder von ir gewizzen botschaft oder briefen ermant werden, so súllen wir in denne getrewlich beraten vnd beholfen sin bey vnsern gůten trewen, also das wir nach derselben ir ermanunge in ainem moned dem na^echsten die oder denselben, die in den angriff oder scha^eden also ta^eten oder getan hetten, vnd auch alle ir helfer vnuertzogenlich vnd ane alle geua^erd angreiffen vnd beschedigen súllen an leib vnd an gůte ze gelicher weis vnd in allem dem rechten, als ob vns das selbe wideruaren vnd beschehen wa^ere, als lang vnd auch vntz uff die zeit, bis das in oder den iren so^elicher schad abgeleit vnd widerkert vnd die sach ga^entzlich erobert wirt, an alle geua^erde. Vnd wenne das wa^er, das so^elich angriff oder kryege ze richtunge oder ze fride kemen oder bracht wurden, so súllent sich doch die vorgenanten stette darinne besunder nicht versu^enen friden noch verrichten in dhain wise, es sy denne, das si vns mit in in derselben su^ene fride oder richtunge o^vch begriffent gelich inselb, ane all geua^erde. Doch so nemen wir vorgenanter Pilgreim ertzbischof ze Saltzburg in diser ainung vnd verpuntnússe usz den hailigen stůl ze Rom vnd ouch den allerdurchlúchtigisten fúrsten vnd herren hern Wentzlaw von gots gnaden Ro^emischen kúnig zů allen ziten merer des richs vnd kúnig ze Behaim vnsern lieben gna^edigen herren vnd dar zů die herrschaft von O^esterrich, doch sol dis vsnemen als beschaidenlich beliben vnd bestan, also wa^er es, das wir yemant, den wir in diser aynunge vsgenomen haben, wider die vorgenanten stette mu^essten oder wolten beholfen sein, das dennocht alle ir koufflúte lúte vnd ouch gůte in allen vnsern stetten schlossen landen vnd gebietten ga^entzlich sicher vnd fry sein súllent ane alle geuard. Vnd also geloben wir vorgenanter Pilgreim ertzbischof ze Saltzburg mit vnsern gůten trewen, alle vorgeschriben sach stuk púnde vnd artikel war sta^et vnd vest ze halten ze laisten vnd ze vollefúren ane alle geua^erde nach ditz briefs sag. Vnd des alles zů warem vrkúnde geben wir obgenanter Pilgreim den obgenanten stetten disen brief versigelten mit vnserm aygenn anhangendem insigel. Der geben ist an sant Jacobs tag des hailigen zwelifbotten, do man zalt nach Christes gepúrt drútzehenhundert jar vnd dar nach in dem siben vnd achtzigstem jare.

Source Fulltext: Chartularium Sangallense X, Nr. 6197, S. 399-400.