Wir^a) Pilgreim von gots gnaden ertzbischof ze Saltzburg des hailigen stůls ze Rom legate bekennen offenlich mit disem brief, als sich die stette Regenspurg vnd Basel fry stette vnd auch des || hailigen Ro^emischen reychs stette Augspurg, Nu^erenberg, Costentz, Vlme, Esselingen, Rútlingen, Rotwil, Wile, V´berlingen, Memmingen, Bibrach, Rauenspurg, Lindowe, sant Gallen, Pfullendorf, Kempten, || Kouffpúrren, Lútkirch, Ysni, Wangen, No^erdlingen, Rotenburg uff der Tuber, Dinkelspúhel, Swinfurt, Wintzhain, Wizzenburg, Halle, Hailprunnen, Gemúnd, Winpfen, Winsperg, Aulun, Giengen, || Bopfingen, Bůchorn, Múlhusen vnd Bůchowe zů vns verbunden habent nach des puntbriefs lut vnd sag, den si vns dar vmb besigelt geben hant, bekennen vnd versprechen wir mit disem brief, das vns die egenanten stette so^elicher hilf, alz in dem puntbriefe, den si vns besigelt vnd gegeben hant, begriffen ist, gen niemant schuldig noch verbunden sind ze helfen noch ze tu^ende denn allain gen hertzog Steffan, hertzog Fridrichen vnd hertzog Johannsen von Bayern vnd gen iren erben landen vnd lúten vnd ouch helfern, vnd súllen noch múgen auch si fúrbas uff niemant anders manen in dhain wise an alles geua^erde, es wa^ere denn, das si vns mit willen gern uff ander lúte wolten beholfen sin. Vnd wa^er es, das die vorgenanten die hertzogen von Bayern si alle drey gemainlich oder ir ainer oder mer besunder in der zit vnd jaren, als die vorgenant verpuntnúzz weren sol, zů vicarien des Ro^emischen reychs gesatzt oder im das empfolhen wurde ze Tútschen oder in Wa^elschen landen oder das ir ainer oder mer zů pfleger des reychs erweit wurde, das alles gemainlich ain stuk oder mer besunder sol noch mag der verpuntnúzz, die wir gen einander gemacht vnd besigelt haben, dhainen schaden bringen noch keren, wan das wir dennocht in wider dieselben herren getrewlich súllen beraten vnd beholfen sein, als vorgeschriben stet, ane alle geua^erde. Dar zů haben wir vorgenanter Pilgreim ertzbischof ze Saltzburg den egenanten stetten sunderlich mer gelobt vnd versprochen, wan wir in dem verpuntbriefe, den wir in besigelt vnd gegeben haben, vnsern herren den Ro^emischen kúnig uszgenomen haben, wa^er es denn, das derselb vnser herr der kúnig den vorgenanten herren von Bayern oder iren heifern seyn vnd des richs banyer lihen oder volk zůschikchen wurde oder wolt vnd die obgenanten stett damit bekriegen wolte von sach wegen, die das riche nicht anru^eten, das wir dennoch den vorgenanten stetten getrewlich súllen vnd wellen beraten vnd beholfen sein, als vorgeschriben stet, vnd uff das vsznemen, als wir vnsern herren den Ro^emischen kunig uszgenomen haben, dar vmbe kainen fúrtzog haben súllen in dhain weis an alles geua^erd, es wa^er denn, das daz bescha^ehe von sach wegen, die das rich selb anru^erten vnd angiengen. Vnd also geloben wir vorgenanter Pilgreim ertzbischof ze Saltzburg mit vnsern gu^eten trewen, alle hie vorgeschriben sach war vnd sta^et ze halten ze laisten vnd ze vollfu^eren ane all geuard nach dis briefs sag. Vnd zů warem vrchúnd aller vorgeschribner sach geben wir in disen brief versigelt mit vnserm aygenn anhangundem insigel. Der geben ist an sant Jacobs tag des hailigen zwelfbotten, do man zalt nach Christes gepúrd dreutzehenhundert jar vnd dar nach in dem siben vnd achtzigesten jare.

Source Fulltext: Chartularium Sangallense X, Nr. 6199, S. 401-402.