Allen^a) den, die disen brief ansehent lesent oder ho^erent lesen, tůn ich Hainrich Boksperg amptman der erwirdigen || gaistlichen miner gna^edigen frowen frow Vrsullen von gottes verhengnúst a^ebtissennen vnd gemaines couents des gotz||huses ze Magtenow¹ des ordens von Ziteln in Costentzer bistum gelegen kund vnd vergich offenlich mit disem brief, daz ich || an derselben miner frowen statt mit vollem gewalt offenlich ze gericht sazz ze Magtenow vor dem closter an dem ahtenden tag ze pfingsten, vnd kam da fúr mich in offen verbannen jargericht der erber man V^olrich Bůcholtz ze den ziten schafner der obgenanten miner frowen vnd ires gotzhus vnd offnot mit sinem fúrsprechen von der ietzgedahten siner frowen wegen vnd an ir statt vnd klegt vnd sprach, daz ain weg giengi vnd och von alter herdan gangen wa^eri v´ber ain wis ze Wolferswile² gelegen, die man nempt die Nidren Truttwis, denselben weg die obgedahten sin frowen vnd ir vordem von alter herdan souil zits vnd iar, daz nieman anders wisti noch geda^ehti, von ir obgenanten gotzhus wegen dar zů vnd dar von gangen geritten vnd geuarn wa^erent vnd ru^ewklich vnd vnanspra^echig vntz bi kurtzen ziten her genutzot hetten, ir korn vnd ho^ew vnd ander frúht inzeziehent vnd zefu^erent vnd irú gu^eter ze buwent vnd ze tument vnd ander ires gotzhus fromen zeschaffent ze den ziten, so si des bedo^erftint vnd alz si ander so^elich bw weg vmb ir closter nutzotint, der selb weg inan och vormals vor mir och an offem iargericht ze Magtenow mit dem rechten ertailt vnd veruallen wa^eri, alz der brief³ wol wisti, den si dar úber mit minem insigel versigelten hettint. Vnd v´ber daz alles so hetti Bertschi Kurer burger ze sant Gallen vnd Hans Kurer sin brůder dieselben sin frowen von desselben wegs wegen nach dem zit, alz er inan vormals vor mir mit dem rechten ertailt wa^eri, bekúmbert vnd inan dar vmb fúr des hailgen riches stett des bundes vmb den See⁴ verkúndet, vor denselben stetten sin frowen sich och dar vmb gen den Kurern versprochen hetten. Vnd da hetten dieselben stett sú ze baiden tailn von des vorgedahten wegs wegen zů dem rechten wider gewist vnd geschikt gen Maggtnow in daz na^ehst iargericht, daz dar nach wurdi, wan och der selb weg in dem ietzgenanten iargericht gelegen wa^eri, doch also, wenn dasselb iargericht sin wo^elti, daz dann sin obgenanten frowen das den vorgenanten Kurern vor hin vier tag verkúnden so^elten, vf welan tag daz iargericht wurdi, vnd dasselb iargericht wa^eri vf hút disen obgeschribnen tag vnd wa^eri och also den obgenanten Kurern vor vier gantzen tagen von der obgenanten siner frowen wegen verkúndet. Vnd da stu^endi er och hie in gericht an der obgenanten siner frowen statt vnd von ires gotzhus wegen vnd wo^elti des rechten warten von des obgedahten wegs wegen vnd getrúwoti och got vnd dem rechten, daz die vorgedahten sin frowen vnd ir gotzhus fúrbas nieman an demselben weg sumen ierren bekúmbern ald bekrenken so^elti, vnd batt mich an ainer vrtail eruarn, was dar vmb recht wa^eri. Vnd do wart nach miner frag mit gesamnoter gemainer vrtail vf den aid ertailt, daz er warten so^elti, alle die wil ich ze gericht sa^essi, vnd ka^emi derwil der obgenant Bertschi Kurer ald Hans sin brůder nit noch nieman andra, der daz verspra^ech ald verantwurti, daz dann den obgenanten minen frowen vnd irem gotzhus der vorgeschriben weg a^vn aller menglichs sumen vnd ierren mit dem rechten genauen sin so^elti vnd och genallen wa^eri in aller wis, alz der vorgenant V^olrich Bůcholtz von iren wegen geoffnot vnd klegt hetti, daz si in von allter gehebt vnd genutzet hetten, alz da ob geschriben sta^vt. Vnd das tett o^vch der obgenant V^olrich Bůcholtz vnd wartot, alz im ertailt was, vnd kam nieman, die wil ich ze gericht sazz, der das verspra^ech ald verantwurti, vnd geuiel den obgenanten minen frowen do derselb weg, alz recht vnd vrtail gab. Vnd des alles ze offner zúgnúst der warhait so gib ich obgenanter richter den obgenanten minen frowen vnd irem gotzhus mit rechter vrtail von vordrung wegen des vorgenanten V^olrich Bůcholtz disen brief mit minem insigel von des gerichtes wegen versigelt. An denselben disen brief ich V^olrich von Ebersperg⁵ vnd ich Wernli Giel von Liebenberg⁶ och v´nsrú insigel von des vorgenanten richters ernstlicher bett wegen mit rechter vrtail gehenkt haben v´ns vnd v´nsren erben vnscha^edlich ze merer zúgnúst aller dirr vorgeschribnen ding, wan wir och baid zegegen in gericht stůndent vnd a^ellú vorgeschribnen ding also sahen vnd horten beschehen, alz hie vor an disem brief beschaiden ist. Der geben ist mit rechter vrtail an dem obgeschribnen tag, do man zalt von Cristus gebúrt drúzehenhundert vnd ahtzig jar, dar nach in dem sibenden jar.

Source Fulltext: Chartularium Sangallense X, Nr. 6189, S. 389-391.