Ich^a) Nyclans Simler vndervogt ze Fro^vwenvelt tůn kunt vnd vergich offenlich an disem brief allen den, die in sehent lesent oder ho^erent || lesen, das fúr mich kâmen ze Studa gelegen vor der stat vnd vsserthalb den fridkraissen ze sant Gallen in miner gna^edigen herschaft || von O^esterrich graueschaft an dem na^ehsten zinstag nâch sant V^olrichs tag, do ich von der selben miner gna^edigen herschaft von O^esterrich || gewaltes wegen vnd an iro stat offenlich ze geriht sass, Claus Keller von Bregentzdorf, den man nemmt von Schochenhûs, an ainem tail vnd Cůnrat Rietman von Schochenhus an dem andern tail, vnd der selb Claus Keller offnote vnd veriah offenlich vor mir in gerihte vngebunden vnd vngeuangen gesunt lips vnd můtes frilich vnd mit bedâhtem můt mit sinem fúrsprechen vnd sprach, wie das sich der obgenant Cůnrat Rietman lieplich vnd gantzlich mit im verrihtet hêtt vnd verainbert vmb alle die sto^ess missehelli klagen vnd ansprâchen, so er zů dem selben Cůnrat Rietman ie gehêpt hêtt vntz her vff disen húttigen tag, als dirre brief ist geben, es wa^eri von des ohsen wegen, den der selb Cůnrat Rietman im genomen hêtt, darvmb er den selben Cůnrat Rietman geuangen hêtt, oder von welherlay ander sachen wegen es wa^eri, es wa^er benemptz oder vnbenemptz, vnd swůr o^vch do der selb Claus Keller offenlich vor mir im gerihte willeklich vnd frilich gesunt lips vnd můtes vngebunden vnd vngeuangen ainen gelêrten ait zů den hailgen mit v^fgehabnen vingern, vmb alle die sto^esse missehellung v^flo^vffe klagen vnd ansprachen, so er zů dem selben Cůnrat Rietman ie gehept hatt vntz vff disen húttigen tag, als dirre brief ist geben vnd als vor ist beschaiden, des selben Cůnrat Rietmans luter gantz vnd gůt frúnd ze sinne vnd im darvmb frúnd vnd hêrren sunderlich hern V^olrich den Paigrer ze frúnd ze gewinnenn vnd die selben hêrren abzelêgenn ân allen fúrzug vnd ân allen des selben Cůnrat Rietmans schaden ân alle geua^erde vnd die vorgedahten sto^esse missehellung klagen vnd ansprachen, die vntz her vff disen húttigen tag, als dirre brief ist geben, v^fgeloffen sint, niemer fúrbass mê ze andenn noch ze a^eferrenn weder mit geriht noch ân reht noch in kain wîse noch ieman von sinen wegen âne alle geua^erde. Wa^er aber, das er den selben ait iemer v´berfu^eri in dehain wise oder ieman von sinen wegen, so sol er den wisen dem burgermaister vnd dem rat vnd gemainer stat ze sant Gallen drissig pfunt pfenning gůter Costenzer múnse gantzlich veruallen sin, des hât er sich mit namen verbunden vnd hat o^vch darvmb zůtz im selber ze mêrer sicherhait ze rehten búrgen geben vnd gesetzt dis nâchgenemten V^olrich den Keller von Bregentzdorf sins brůders sa^elgen svn, Johansen Múller von Riedren¹ vnd Cůnrat den Sto^vker von Nussbo^vmen², die hant alle drie mit im ieklicher besunder mit siner trúwe offenlich vor mir im gerihte willeklich gelopt in min hant zů der vorgedahten gemainer stat ze sant Gallen handen, also wa^er, das der selb Claus Keller den vorgeschribenn ait iemer v´berfu^eri in dehain wise, das si dann mit im der vorgeschribnen drissig pfunt pfenning gemainer stat ze sant Gallen veruallen sin sont, also das der selben búrgen ieklicher zehen pfunt pfenning der vorgeschribnen múnse gantzlich veruallen vnd den burgern vnd gemainer stat ze sant Gallen gebunden vnd haft sin sol, die selben zehen pfunt pfenning gantzlich an allen fúrzug ze gebenn vnd ze rihtenn, vnd sont vnd mugent o^vch dann die selben der burgermaister der rat vnd die burger alle gemainlich ze sant Gallen vnd iro ieklicher besunder vnd wer in des helffen wil den obgenanten Clausen Keller vnd die obgenanten búrgen darvmb angriffen pfenden vnd no^eten mit gaistlichem vnd mit weltlichem geriht vnd âne alles reht ân klag vnd ân zorn in stêtten vffemm lande vnd in do^erffern vnd wâ oder wâhin si das getůn mugent oder went, als vil vnd als dik, vntz das si der vorgeschribnen drissig pfunt pfenning gůter Costentzer múnse vnd o^vch des schaden, in den si vnd ir helffer von des selben pfendens vnd angriffens wegen koment, gantzlich gewert vnd entschadgot werdent, vnd sol sú noch kain ir gůt davor niht schirmen enkain frihait noch gewonhait enkain reht weder gaistlichs noch weltlichs gerihtes enkain burgreht noch der stêtt reht noch buntnust noch kainerlay ander sach noch schirm. Der selb Claus Keller hât o^vch gelopt fúr sich vnd sin erben, die obgenanten búrgen ze lo^esenn von allem dem schaden, in den si koment von dirr búrgschaft wegen. Vnd des alles ze offemm wâren vrkúnde so han ich der obgenant rihter Nyclaus Symler vndervogt, als vorgeschoben stât, min insigel nach rehter vrtail offenlich gehenkt an disen brief, won es ertailt wart, das ich es tůn so^elt. Vnd wir die obgenanten Claus Keller, V^olrich Keller sins brůders sa^elgen sun, Johans Múller von Riedren vnd Cůnrat Stoker von Nussbo^vmen veriehent offenlich ain gantz wârhait aller der dinge vnd gedinge, so von v´ns da vorgeschoben stât an disem brief, vnd des ze mêrer sicherhait so habent wir vns willeklich gebunden aller vorgeschribner dinge vnd gedinge vnder des obgenanten rihters vnd vndervogtes ze Fro^vwenuelt insigel, won wir aigner insigel niht hattent. Dis beschach vnd wart dirr brief geben ze Studa, als vor ist beschaiden, an dem vorgeschribenn zinstag in dem iâre, do man von Cristus gebúrt zalte drúzehenhundert jâre vnd darnach in dem aht vnd ahtzigosten jâre.

Source Fulltext: Chartularium Sangallense X, Nr. 6275, S. 517-518.