Ich^a) Nyclaus Symler vndervogt ze Fro^vwenvelt¹ tůn kunt vnd vergich offenlich an disem brief allen den, die in sehent lesent oder ho^erent lesen, das fúr mich || kam ze Stûda² gelegen vor der stat vnd vsserthalb den fridkraissen ze sant Gallen in miner gna^edigen herschaft von O^esterrich grâueschaft³ an dem || na^ehsten zinstag nâch sant V^olrichs tag, do ich von der selben miner gna^edigen herschaft von O^esterrich gewaltes wegen vnd an iro stat offenlich ze geriht || sass, Cůnrat Rietman von Schochenhus⁴, vnd der offnote vnd veriah da offenlich frilich vnd willeklich vngebunden vnd vngeuangen vor mir in gerihte mit sinem fúrsprechen von der vanknust wegen, als in Claus Keller von Bregentzdorff⁵, den man nemmet von Schochenhus, gehaimot vnd geuangen hatte vnd in in den diepstok ze sant Gallen gelait hatt vmb das, das er im hetti ainen ohsen verstoln bi naht vnd bi nebul, v´ber das das er im weder gelten so^elt noch widergeben, vnd aber der selb Cůnrat Rietman dawider rêtte, er hêtti rêdlich ansprachen zůtz im vmb sin můterlich êrbe vnd wa^erint die sto^ess vil iâren gewert, vnd von der selben sto^ess vnd ansprachen wegen, so er zůtz im hêtt, so hêtti er in angegriffen vnd hêtti im darvmb sinen ohsen genomen vnd nit verstoln. Won aber er vss der selben vanknúst vnd vss dem stok genomen vnd ledig wa^eri gelâssen mit minem vnd mit des selben Clausen Kellers gůtem willen, darvmb so wolti er sich aller diser nâchgeschribner sachen vnd stuken willeklich vnd gern verbinden, als hie nach beschaiden ist an disem brief. Des êrsten do offnote vnd veriah derselb Cůnrat Rietman offenlich vor mir in gerihte mit sinem fúrsprechen, wie das er mit wolbedahtem můt vnd miner^b) siner frúnd rât mit dem obgenanten Clausen Keller vmb alle die sto^esse missehellung klag vnd ansprachen, so er zů dem selben Clausen Keller von des vorgedahten sines můterlichen êrbes oder von dehainerlay ander sachen wegen, so bisher vntz vff disen húttigen tag, als dirr brief ist geben, vfgeloffen wa^erint, ie gehept hêtt, lieplich vnd gantzlich verriht vnd veraint worden wa^eri, darv^f swůr o^vch do der selb Cůnrat Rietman offenlich vor mir im geriht frilich vnd willeklich vngebunden vnd vngeuangen gesunt libs vnd můtes ainen gelêrten ait zů den hailgen mit v^fgehabnen vingern, vmb die vorgedahten vanknust vnd getât der vorgedâhten des burgermaisters des râtes vnd aller burger gemainlich der stat ze sant Gallen vnd iro ieklichs besunder vnd sunderlich des obgenanten Clausen Kellers vnd mit namen aller dero, die an der selben siner vanknust in dehaine wîse schulde gehêpt hant ald darzů gehaft sint, luter vnd gůt frúnd ze sinne vnd alle sin frúnd inen darvmb ze frúnd ze gewinnenn ân allen fúrzug vnd die vorgedahten vanknust vnd geta^et niemer ze andann noch ze a^eferrenn weder mit gaistlichem noch mit weltlichem geriht noch ân reht noch in kain wîse noch ieman von sinen wegen ân alle geua^erde, vnd hat darúber ze merer sicherhait ze rehten búrgen geben vnd gesetzt die nâchgenemten Růdolf Albrehten O^eser, Cůnraten O^eser den múller ze Êgina⁶ gebrůder vnd Cůnrat den O^eser von Obrahúsern⁷, die hant alle drie ieklicher mit siner trúwe offenlich vnd willeklich in dem geriht gelopt in min hant zů der stat ze sant Gallen handen, also bescha^eh, das der selb Cůnrat Rietman ald ieman von sinen wegen die vorgedahten vanknust vnd getât in dehain wîse iemer andotti oder a^eferti mit worten oder mit werken oder in dehain wîse vnd sinen vorgeschribnen ait v´berfu^eri in dehainen weg oder mit dehainen sachen, wenn oder wa das bescha^ehi, das danne die selben búrgen alle drie drissig pfunt pfenning gůter Costentzer múnse dem burgermaister dem rat vnd den burgern gemainlich ze sant Gallen veruallen sin sont, also das der selben búrgen ieklicher zehen pfunt pfenning der vorgeschribnen múnse veruallen sin sol, vnd das o^vch dann der burgermaister der rat vnd die burger alle gemainlich der stat ze sant Gallen vnd iro ieklicher besunder vnd wer in des helffen wil den selben Cůnrat den Rietman angriffen haymen vnd vâhen sont vnd mugent ân alles reht vnd âne allen zorn vffemm lande in do^erffern oder in stêtten ald wâ si in dann ankomen vnd ergriffen mugent, vnd das si den selben Cůnrat Rietman danne fúr ainen scha^edlichen verschulten vertailten vnd verzalten man verdêrben vnd von dem libe tůn sont vnd mugent âne alles reht vnd âne vrtail, des hat sich der obgenant Cůnrat Rietman frilich mit bedâhtem můt offenlich vor mir im geriht frilich vngebunden vnd vngeuangen gesunt lips vnd můtes verbunden vnd verstrikt, das in da vor noch dawider niht schirmen sol enkain frihait noch gewonhait enkain reht weder gaistlichs noch weltlichs gerihtes enkain gesetzt noch buntnust der hêrren noch der stêtte enkain burgreht noch lantreht noch der stett reht noch frihait noch enkainerlay ander sach noch schirm, won er sich mit namen mit v^ssgesprochnen worten vnd mit werken verzigen hat aller helffe aller gnâden alles v^sszugs alles schirmes vnd alles des, damit er sich wider die vorgeschriben sache buntnust vnd verstrikung iemer gesêtzen ald dawider gereden ald gewerben kundi oder mo^ehti in dehain wîse. Die obgenanten búrgen hant sich o^vch verbunden, das die obgedahten burgermaister rat vnd burger ze sant Gallen vnd iro helffer sú vmb das vorgeschriben gůt sont vnd mugent angriffen vnd pfenden mit geriht vnd âne alles reht vffemm lande vnd in stêtten vnd wâ si es getůn kunnent oder mugent, vnd das sú da vor o^vch niht schirmen sol enkainerlay frihait buntnust noch burgreht noch gaistlich noch weltlich geriht noch enkainerlay ander sach noch schirm ân geua^erde, ez wa^er dann, das si den selben Cůnrat Rietman dem burgermaister vnd dem rât ze sant Gallen gemainlich geantwurtint gen sant Gallen in die stat in so^elichú band, das si sin sicher sint, toten oder lebenden, so sont si vmb das vorgeschriben gelt danne lêdig sin. Vnd des alles ze offemm wâren vrkúnde so han ich der obgenant rihter Nyclaus Symler vnd vndervogt, als vorgeschriben stat, min insigel nâch rehter vrtail offenlich gehenkt an disen brief, won es mit gesamnoter vrtail ertailt wart, das ich es tůn so^elti. Vnd wir die obgenanten Cůnrat Rietman, Růdolff Albreht O^eser, Cůnrat O^eser der múller vnd Cůnrat O^eser von Obrahúsern veriehent offenlich ain gantz wârhait aller der dinge vnd gedinge, so von v´ns da vorgeschriben stât an disem brief, vnd des ze mêrer sicherhait so habent wir v´ns willeklich gebunden aller vorgeschribner sache vnd dinge vnder des obgenanten rihters vnd vndervogtes ze Fro^vwenvelt insigel, won wir aigner insigel niht hattent. Dis beschach vnd wart dirr brief geben ze Studa vor der stat vnd vsserthalb den fridkraissen ze sant Gallen, als vor ist beschaiden, an dem vorgeschribenn zinstag in dem jâre, do man zalte von Cristus gebúrt drúzehenhundert jâr vnd darnach in dem aht vnd ahtzigosten jâre.

Source Fulltext: Chartularium Sangallense X, Nr. 6274, S. 514-516.