Ich^a) Jacob Růpreht, den man nemmt der Lo^ew, statamman ze sant Gallen¹ tůn kunt vnd vergich offenlich an disem brief allen den, die in sehent lesent oder ho^erent lesen, das fúr mich kam || ze sant Gallen in der stat an dem na^ehsten dunstag nach sant V^olrichs tag, do ich an des richs strâsse offenlich ze geriht sasse, Berschi Hermans von Albesperg² vnd offnote vnd || veriah da der selb Berschi Hermans offenlich frilich vnd willeklich vngebunden vnd vngeuangen vor mir im gerihte mit Walther Schúrpfen burger ze sant Gallen sinem fúrspre||chen von der vanknust wegen, als in die fromen der burgermaister vnd der rât gemainlich der stat ze sant Gallen gehaimot vnd in in iro vanknust vnd banden hattent, vmb das das er Albreht Hermans sines brůders sa^elgen kinden o^vch burgern ze sant Gallen iro va^etterlich êrbe vnd irú gelegnen gu^eter genomen vnd sich dero vnderzogen hatt mit gewalt vnd ân reht, won aber die selben der burgermaister vnd der rât ze sant Gallen in durch siner vnd siner frúnd ernstlicher bett willen vss der selben vanknust lêdig gelassen hêttint, darvmb so wo^elti er sich aller nâchgeschribnen sache vnd dinge willeklich vnd gern verbinden, als hienach beschaiden ist an disem brief. Des ersten do swůr der selb Berschi Hermans von Albesperg offenlich vor mir im gerihte frilich willeklich vnd vnbetwungenlich vngebunden vnd vngeuangen gesunt lips vnd můtes mit gůter vorbetrahtunge ainen gelêrten ait liplich zů got vnd zů den hailgen mit v^fgehepten vingern, vmb die vorgedahten vanknust vnd getât der vorgedâhten des burgermaisters des râtes vnd aller burger gemainlich der stat ze sant Gallen vnd iro ieklichs besunder vnd sunderlich des obgenanten Albreht Hermans sines brůders sa^elgen kint vnd mit namen aller dero, die an der selben siner vanknust dehain schuld gehept hant in dehain wîse ald râtent ald helffent oder gehaft darzů gewesen sint, luter gantz vnd gůt frúnd ze sinne vnd alle sin frúnd inen darvmb ze frúnd ze gewinnen ân allen fúrzug vnd die selben vanknust vnd getât niemer ze andenn noch ze a^eferrenn weder mit gaistlichem noch mit weltlichem geriht noch âne geriht weder mit worten noch mit werken noch in kain wîse noch ieman von sinen wegen âne alle geua^erde. Er nam o^vch in den selben ait vnd swůr, das er des vorbenemten Albreht Hermans sines brůders sa^eligen kint an allen iren gu^etern ligenden vnd varenden, so in iro vatter sa^elig hât gelâssen, noch an dekainen iren gu^etern niemer mê sumen irren bekúmberren noch bekrenken noch in kain wîse beswa^eren sol noch wil noch ieman von sinen wegen weder mit geriht noch ân reht noch in kain wîse, ez wa^er dann, das in dúhti, das er zů dehainen iren gu^etern reht oder rêdlich ansprach hêtti, wo^elt er dann darvmb rehtes gen in nit enbern, so sol vnd mag er sú darvmb v^fftriben vnd reht zůtz in sůchen ze sant Gallen in der stat vor dem geriht daselbs oder vff der pfallentz daselbs vor minem herren vnd ainem abt von sant Gallen, ob die ansprach wa^er vmb gelegen gůt, das dannan belehent wa^eri, vnd sol o^vch nienert anderswâ sú darvmb v^fftriben noch beklagen, das hât er alles in den ait genomen. Er nam o^vch in den selben ait vnd swůr, wa^er das er dehainer lay sache oder ansprache zů den burgern gemainlich ze sant Gallen oder zů dehainem burger ald burgerinen ze sant Gallen besunder man oder fro^vwen, si sien ietzo daselbs burger oder die hienach daselbs burger werdent, iemer ze sprechenn hêtt oder ze sprechenn gewunne, wo^elt er darvmb rehtz nit enbern, das er sú darvmb o^vch v^fftriben vnd rehtes gen in pflegen sol ze sant Gallen in der stat vor dem geriht daselbs vnd nienert anderswâ. Wa^er och, das danne die ansprach gelegen gůt růrti, wa hin dann die sach vor dem statamman ze sant Gallen fúrbass mit vrtail gezogen oder gewîset wúrdi, da bi sol er es o^vch beliben lâssen vnd dawider nit tůn, das hât er alles gesworn. Wa^er aber, da vor got sie, das er den vorgeschribenn ait iemer v´erfu^eri oder ieman von sinen wegen an dehainem der vorgedahten stuken in dehain wîse oder mit dehainen sachen, so sol er den selben dem burgermaister dem rât vnd gemainer stat ze sant Gallen hundert pfunt gůter vnd ga^eber Ytaliger haller veruallen sin. Vnd hât o^vch der selben gemainer stat ze sant Gallen darvmb zůtz im selber ze mêrer sicherhait dis nâchgenemten lút Hainrichen Hermans sinen sun vnd Jacob den Êraman burger ze sant Gallen ze rehten angúlten vnd Herman den Eraman des selben Jacobs brůder, Walther den Wêtter o^vch burger ze sant Gallen vnd Hainrich den Hablútzel ze rehten búrgen geben vnd gesêtzt, die selben angúlten vnd búrgen hant alle fúnf vnuerschaidenlich mit im ieklicher mit siner trúwe willeklich vnd offenlich vor mir im gerihte gelopt in min hant zů gemainer stat ze sant Gallen handen also, bescha^eh das der selb Berschi Hermans von Albesperg den vorgeschribenn ait iemer v´berfu^eri oder ieman von sinen wegen an dehainen vorgeschribnen stuken vnd artikeln in dehainen weg oder in dehain wîse, das si danne mit im gemainer stat ze sant Gallen der vorgeschribnen hundert pfunt gůter Ytaliger haller gantzlich veruallen vnd der selben gemainer stat ze sant Gallen gebunden vnd haft sin sont vnuerschaidenlich, das selb gelt gantzlich ze gebenn vnd ze rihtenn âne allen fúrzug, vnd sont vnd mugent o^vch danne die selben der burgermaister der rat vnd burger alle gemainlich ze sant Gallen vnd iro ieklicher besunder vnd wer in des helffen wil den obgenanten Berschin Hermans vnd die obgenanten angúlten vnd iro erben, ob sú ensint, vnd o^vch die obgenanten búrgen darvmb pfenden vnd angriffen no^eten vnd heften an ligenden vnd varenden gůten in stetten in do^erffern vnd vff dem lande mit gaistlichem vnd mit weltlichem geriht vnd âne alles reht ân klag vnd ân allen zorn, wie vnd wâ oder wâhin sú das getůn mugent oder wênt, als vil vnd als dik, vntz das sú der vorgeschribnen hundert pfunt gůter haller vnd o^vch des schaden, in den sú vnd ir helffer von des selben pfendenns vnd angriffenns no^etens vnd heftens wegen koment, gantzlich gewert v^ssgeriht vnd da von entschadgot werdent, vnd sol die obgenanten Berschin Hermans noch sin erben noch die obgenanten angúlten noch iro erben noch die búrgen noch kainú irú gůt hievor noch dawider niht schirmen noch gůt sin enkain frihait noch gewonhait enkain reht gaistlichs noch weltlichs gerihtes enkain buntnust noch burgreht noch der stettreht noch enkainerlay ander sach noch schirm, won si sich des alles verzigen hant. Es wa^er dann, das die obgenanten angúlten vnd búrgen den selben Berschin Hermans danne toten oder lebenden ainem burgermaister vnd dem rat gemainlich ze sant Gallen geantwúrtint gen sant Gallen in die stat in so^elichú band, das sú sin sicher sint, so sont sú dann vmb das vorgeschriben gelt vnd gelúpt dann ledig sin. V´ber das alles hât sich der selbe Berschi Hermans sunderlich des offenlich vor mir im geriht willeklich gebunden, als wa^er, da vor got sie, das er ald ieman von sinen wegen die vorgeschriben vanknust vnd getât iemer andotti oder a^eferti in dehain wîse vnd den vorgeschriben geswornen ait an dem selben stuk besunder iemer v´bersa^ehi vnd v´berfu^eri mit dehainen sachen, wenne oder wâ das bescha^ehi, das danne der burgermaister der rât vnd die burger alle gemainlich der stat ze sant Gallen vnd iro ieklicher besunder vnd alle iro helffer den selben Berschin Hêrmans von Albesperg angriffen haimen vnd vâhen sont vnd mugent ân alles reht ân allen zorn vnd ân klag vffemm lande in do^erffern ald in stetten ald wâ sú in dann ankomen vnd ergriffen mugent, vnd das si dann den selben Berschin Hermans fúr ainen scha^edlichen verschulten vertailten vnd verzalten man verdêrben vnd von dem libe tůn sont vnd múgent âne alles reht vnd âne vrtail vnd das in davor noch dawider niht schirmen sol enkain frihait noch gewonhait enkain reht weder gaistlichs noch weltlichs gerihtes enkain gesêtzt noch buntnust der hêrren noch der stette enkain burgreht noch lantreht noch der stettreht noch enkainerlay ander sach noch schirm, won er sich mit namen verzigen hât aller helffe aller gnâden alles v^sszugs alles schirmes vnd alles des, damit er sich wider die vorgeschriben sache vnd buntnust iemer gesetzen ald dawider gerêden ald gewerben kundi oder mo^ehti in dehain wîse. Vnd des alles ze offemm wâren vrkúnde so han ich Jacob Růpreht statamman da vorgenemt min insigel von des gerihtes wegen offenlich gehenkt an disen brief, won es ertailt wart mit gemainer vrtail, das ich es tůn so^elt. Vnd wir die obgenanten Berschi Hermans von Albesperg, Walther Schúrpf sin fúrsprech, als vorgeschriben stât, Hainrich Hermans des selben Berschi Hermans svn, Jacob Eraman angúlten, Herman Eraman, Walther Wetter vnd Hainrich Hablútzel búrgen, als vorgeschriben stât, veriehent alle offenlich an disem brief ain gantz wârhait aller der dinge vnd gelúpt, so von v´ns da vorgeschriben stât an disem brief, vnd des ze mêrer sicherhait so habent wir die selben Walther Schúrpf, Jacob Êraman vnd Herman Êraman v´nsrú insigel och gehenkt an disen brief, vnd won ich der selb Berschi Hermans aigens insigels niht hatt, so han ich mich willeklich gebunden aller vorgeschribner sache vergiht dinge vnd gedinge vnder des obgenanten Walthers Schúrpfen mines fúrsprechen insigel, vnd won wir die obgenanten Hainrich Hermans des obgenanten Berschi Hermans svn, Walther der Wêtter vnd Hainrich Hablútzel aigner insigel o^vch niht hattent, so haben wir ich der selb Hainrich Hermans Hainrich den Wissen, ich der selb Walther Wêtter V^olrich den Ko^echler vnd ich Hainrich Hablútzel V^olrich den Keller den bader burger ze sant Gallen erbetten, das sú irú insigel fúr v´ns o^vch gehenkt hant an disen brief, vnder dú selben insigel wir v´ns willeklich gebunden habent aller vorgeschribner dinge vnd gedinge, vnd wir die selben Hainrich Wisse, V^olrich Ko^echler vnd V^olrich Keller der bader veriehent offenlich, das wir v´nsrú insigel von ernstlicher bett der obgenanten Hainrich Hermans, Walther Wêtters vnd Hainrichs Hablútzels, als vor ist beschaiden, fúr sú gehenkt habent an disen brief v´ns vnd v´nsren erben gantzlich vnscha^edlich. Dis beschach vnd wart dirre brief geben ze sant Gallen an dem vorgeschribenn dunstag in dem jâre, do man von Cristus gebúrt zalte drúzehenhundert jâr vnd darnach in dem aht vnd ahtzigosten jâre.

Source Fulltext: Chartularium Sangallense X, Nr. 6276, S. 518-521.