Allen^a) den, die disen brief ansehent lesent oder ho^errent lesen, tůn ich Johans Hoppler von Winterthur¹ kund vnd vergich || offenlich mit disem brief, das die nahgenempten Hainrich Na^egelli, sinú kind, Diethelm Na^egelli vnd sin můter, || Hans Vogel vnd sin wip vnd sinú kind, Cu^eni Vogel, sin wip vnd sinú kind, Hans Senn vnd sin wip vnd sinú kind, Mar||gareth Kryesin vnd irú kind vnd V^elin Bilgrin vnd sin můter Nesen, die min reht lehen warent von dem ho^vhwirdigen fúrsten Cůnen von gottes gnaden abt des gotzhus ze sant Gallen² vnd dem selben sinem gotzhus, sich selber von mir mit lib vnd mit gůt redlichen vnd reht aines ewigen vnwiderru^effenden ko^vffes geko^vffet ha^vnd mit irem aigenlichem gůt an das vorgeschriben gotzhus ze sant Gallen, dannen ich si o^vch ze lehen gehebt ha^vn, vmb vierzig pfund gůter alter haller, der selben haller ich von inen och gantzlich vnd gar gewert bin vnd enpfangen han vnd an minen offenn nutz bewendet, vnd han och die obgenampten lút mit lib mit gůt vnd mit allen rehten minem vorgenampten gna^edigen herren abt Cůnen an sin hand zů des vorgenanten sines gotzhus handen vff geben vnd geuertgot vnd zů sinen handen braht vnd in liplich gewer gesetzt, als reht sitt vnd gewonlich was, vnd han mich darv´ber verzigen vnd verzih mich mit disem brief fúr mich vnd fúr all min erben gen minem vorgenanten herren abt Cůnen gen sinen nahkomen gen dem selben gotzhus ze sant Gallen vnd gen den vorgenanten lúten allen gemainlich vnd gen ir ieklichem besunder aller aigenschafft aller lehenschafft aller manschafft aller gewer aller kuntschafft aller besatzzung aller zugnust lút vnd brief, die ich ietz han oder hie nah von mir ald^b) von minen erben iemer me funden werdent, alles rehten gaistlichen vnd weltlichen gerihtes aller vordrung vnd ansprach, so ich zů den vorgenampten lúten allen gemainlich oder zů dehainem besunder zů ir lib oder ir gůt ietz gehebt ha^vn oder ich ald min erben hienach iemer me gehaben gewúnnen vnd erwerben mo^ehtin von reht von gewonhait oder von dehainen andren sachen. Bescha^eh och, dz ich ald min erben, ob ich enwa^er, hienach iemer me in kúnftigen ziten dehain brief vnd vrkúnd fundint, da mit die vorgenanten lút in dehainen weg von vns von der lehenschafft wegen bekúmbert werden mo^ehtint, die selben brief súllent mir vnd minen erben vnnútz to^vd vnd gantzlich vnkrefftig sin vnd den vorgenanten lúten an ir lib noch an ir gůt dehainen schaden bringen. Ich han och gelobt fúr mich vnd all min erben, der vorgenampten lút vnd des ko^vffs reht wer ze sint nah dem rehten gen allerma^engklichem vnd die vorgenanten lút darvmb ze versprechenn vnd ze verstand vff gaistlichem vnd weltlichem geriht, wenn des die vorgenanten lút alle oder dehainer vnder in besunder oder das vorgenant gotzhus ze sant Gallen des bedurfent vnd no^vtdurftig sint, a^vn all geuerd. Vnd des hierv´ber ze offnem vnd warem vrkúnd aller vorgenanter ding vnd vergiht han ich Hans Hoppler da obgenant min aigen insigel fúr mich vnd all min erben offenlich gehenkt an disen brief. Der geben ist ze Winterthur an dem na^ehsten ma^entag nah der alten vasnaht in dem jar, do man zalt von Cristi gebúrt tusent drúhundert ahtzig vnd nún jar.

Source Fulltext: Chartularium Sangallense X, Nr. 6312, S. 556-557.