Allen^a) den, die disen brief ansehent lesen oder ho^erent lesen, tůn ich Cůnrat Brunnman¹ amptman der wolerbornen miner gna^edigen hersch||aft von Tokkenburg kund vnd vergich offenlich mit disem brief, daz ich an der ietzgenanten miner herschaft statt mit vollem gewalt offenlich || ze gericht sazz ze Wil² in der statt in glicher wis vnd in allem dem rechten, alz ob ich ze Sirnach³ vnder der linden sa^essi, vnd kamen da fúr mich in || gericht die erbern lút Adelhait Landin Cu^eni Kellers sa^elgen von Wil elichi tohter mit Bertolt Sta^ehellin von Betwisen⁴ irem erkornen vogt, mit dem si do vor mir in gericht v´ber dis nachgeschribnen sach beuogtot wart, alz recht vnd vrtail gab, wan si och do wolbedahtklich lobt mit ir trw´ in aides wis, daz si ieren rechten gebornen vogt nit gehaben mo^echt, vnd Margret ir elichi tohter mit Haini Ffrikken irem rechten erbornen vogt, vnd offnoten da vor mir in gericht mit den ietzgenanten iren vo^egten vnd mit iro fúrsprechen vnd sprachent, dz si baid wissentklich vnd wolbedahtklich fúr sich vnd fúr alle ir erben redlich vnd recht verkoft hetten alles daz gůt, so sú in dem gůt ze V´tershouen⁵ inwendig dem bach vnd och dem hag, der gegen dem holtz ist, daz man nempt Wissa⁶, iendert ligent hetten, es sie holtz veld wisan ald akker, wie daz alles genant ald gehaissen ist, vnd och den ietzgenanten hag mit allen rechten nútzen zinsen gewonhaiten vnd mit aller zůgeho^erd, daz iro erb wa^eri von dem gotzhus ze Vischinan⁷, vnd hetten ze koffent geben dem erwirdigen gaistlichen herren abt Johansen des gotzhus ze Vischinan⁸ vnd allen sinen nachkomen zů desselben gotzhus handen vmb sehs pfund pfen(ning) alles gůter vnd gena^emer Costentzer múns, dero si och gantzlich von im bezalt wa^eren an den stetten, da si iren fromen mitgeschaffet hetten. Vnd nach der offnung vnd vergicht vergoten do die obgenanten Adelhait Landin vnd Margret ir tohter mit iren vnd mit der obgenanten iro vo^egt handen mit gelerten worten an des gerichtes stab alles vorgedaht gůt, so sú in dem gůt ze Vtershouen inwendig dem bach vnd dem hag iendert hatten, wie dz alles genant ald gehaissen ist, vnd och den hag hin zů des vorgenanten abt Johansen des gotzhus ze Vischinan vnd zů siner nachkomen vnd och zů desselben gotzhus handen, alz recht sitt vnd gewonlich was vnd alz nach miner frag mit gemainer vrtail ertailt wart. Vnd verzigen vnd entwerten sich och do ledklich vnd frilich vnd verzihent vnd entwerent sich och redlich vnd recht mit disem brief fúr sich vnd fúr alle ir erben alles rechten aller rechtung aller vordrung vnd ansprach, so si ald ir erben zů denselben gu^etern vnd zů dem hag ie gehatten ald hernach iemer mer gewinnen mo^echten von recht ald von gewonhait ald von dehainerlai andren sach wegen, a^vn geua^erd. Vnd lobten och do fúr sich vnd fúr alle ir erben, derselben gu^eter vnd des hags vnd des kofs des obgenanten abt Johansen vnd siner nachkomen vnd des obgenanten sines gotzhus gen allermenglichem allenthalben recht wern ze sint nach dem rechten vnd nach des landes sitten vnd gewonhait an geua^erd. Vnd des alles ze offem vrkúnd der warhait so gib ich obgenempter richter dem vorgenanten abt Johansen vnd sinem gotzhus von siner vordrung wegen disen brief mit minem insigel von des gerichtes wegen versigelt. Der geben ist mit rechter vrtail an dem na^eschsten zinstag nach sant Gregorien tag, do man zalt von Cristus gebúrt drúzehenhundert vnd ahtzig iar, darnach in dem núnden jar.

Source Fulltext: Chartularium Sangallense X, Nr. 6315, S. 558-559.