Wir^a) der burgermaister der rat vnd die burger alle gemainlich der stat ze sant Gallen veriehent vnd tůn || kunt offenlich mit disem brief gegen aller ma^englichem, als der beschaiden Cůnrat Burg burger ze Costentz || sehtzig pfunt haller geltes vmb núnhundert pfunt haller von v´ns vnd v´nser stat erko^vfft hât, als || die brief wol bewîsent, die wir im darúber geben habent, vnd won er v´ns an den selben núnhundert pfunt hallern ietzo fúnfhundert pfunt haller gewert hat, darvmb so bekennen wir vnd veriehen, das wir im vnd sinen erben da von vff den na^ehsten sant Jacobs tag des zwelfbotten, der da kumt in dem ho^ewet, drissig pfunt gůter vnd ga^eber haller gebunden vnd schuldig sien gantzlich ân fúrzug ze gebenn vnd ze rihtenn ze Costentz in der stat âne allen iren schaden vnd ân alle widerrede. Wa^er aber, das wir das nit ta^etint, so sont vnd mugent si dannanhin die selben drissig pfunt haller nemen vnd gewinnen vff v´nsern vnd v´nser stat schaden an juden an cristan oder an anderm gewonlichem schaden. Vnd wie si des ze gewonlichem schaden koment, si ligin vmb die selben drissig pfunt haller an schaden ald si nemen es an schaden alder ob si des ze schaden ka^emint von zerung von klag von botten Ion von brieuen ald von gerihtz wegen ald von dehainen andren sachen, da von so^ellin wir vnd v´nser nâchkomen den selben Cůnrat Burg vnd sin erben gantzlich lo^esen vnd entrihen von ho^vptgůt vnd von schaden, als wir im alle vnuerschaidenlich bi gůten trúwen fúr v´ns vnd v´nser nachkomen gelopt habent. Vnd des ze offemm waren vrkúnde habent wir im disen brief geben besigelt mit v´nser stat haimlichem insigel. Der ist geben an dem na^ehsten ma^entag vor v´nser frowen tag ze dem a^ernde, do man von Cristus gebúrt zalte drúzehenhundert jâr vnd darnach in dem nún vnd ahtzigosten jâre.

Source Fulltext: Chartularium Sangallense X, Nr. 6316, S. 559-560.