Ich^a) Cůntz Zo^ebeli, den man nempt Rainolt, burger ze Veltkirch¹ tůn kund vnd vergich des offenlich mit disem brief allen^b) den, die in ansehent lesent oder ho^erent lesen, das ich schuldig bin vnd gelten || sol recht vnd redelich vnd min erben, ob ich enwa^ere, Růdolffen Mayger von Altstetten vnd Annen vnd Vrsullen sinen schwo^estran, a^ellú drú Diethegens Maygers sa^eligen von Altstetten² elichú kind, || vnd iren erben, ob sy enwa^erint, sybentzig pfunt gůter vnd gena^emer pfenning Costentzer múnsz ald so vil der múnsz, dú dann ze mâl, so die werschafft geschehen sol, ze Veltkirch in der || statt fúr Costentzer pfenning vngevârlich geng werd vnd gena^em ist, die ich inen schuldig worden bin vmb win, den mir iro vetter vnd rechter vogt Jos der Mayger von Altstetten³ an iro statt ze ko^vffent geben hât, die selben pfenning so^ellint ich ald min erben inen ald iren erben gar vnd gantzlichen richten weren vnd bezaln vff nv den na^echsten sant Martins tag, der aller schierost nâch der dât dis briefes kompt vnd kúnfftig ist. Tu^egint ich ald min erben des nit, wie dann sú oder iro erben des selben gůtes nach iro ersten vorderung ze schaden koment, sy nemint es an schaden an juden an cristan an wechseln an ko^effen vff linwat oder an anderm gewonlichem schaden, ald wôn neme so vil gůtes vff sú an schaden ald ka^emint sú sin ze schaden von zerung von clag von bottenlôn von briefen oder von gerichtes wegen ald sust von ander redlicher sach wegen, da von so^ellint ich vnd min erben sú vnd ir erben vmb dis vorgenant hobgůt vnd schaden âne allen iren schaden gar vnd gantzlichen lo^esen ledigen vnd och vnclagber machen, als ich inen das fúr mich vnd min erben by minen gůten trúwen vnd mit vrkúnde dis offenn briefs gelopt vnd verhaissen hab. Vnd vmb dis vorgenant hobgůt vnd schaden hab ich inen ze merer sicherhait ze rechten búrgen geben vnd gesetzt minen lieben o^ehen Johansen Sto^eklin stattamman⁴ vnd Hainrichen Sto^eklin sinen brůder burger ze Veltkirch baid vnuerschaidenlich, die hând inen och gelopt by iren gůten trúwen, wa^er ob ich den vorgenanten kinden dis obgedâcht gůt nit richti noch werti vff den vorgenanten tag vnd in der wyse, als vor ist beschaiden, das sy inen ald iro gewissen bottschafft dann nach iro ersten vorderung vnuerzogenlich vmb dis vorgenant hobgůt vnd schaden verpfenden sont mit gůten vngevârlichen varenden pfanden, die man dann getriben oder getragen mag, vnd sont das tůn als dik als lang vnd als vil, v´ntz das dú obgedâchten kind ald iro erben des vorgenanten iro hobgůtz vnd alles schadens gar vnd gantzlich âne allen iren schaden bezalt vnd vssgericht werdent in der wyse, als vor ist beschaiden, an geva^erd. Wâ ich ald min erben vnd dis vorgenanten búrgen das alles nit ta^etint, als vor geschriben stât, so hând dú vorgenanten kind vnd iro vogt darnach, wenn sú wend, vollen gewalt vnd fryges vrlob, das sy vnd iro erben vnd alle, die inen des helffen wend, mich vorgenanten gúlten vnd min erben vnd och die obgenanten búrgen vmb dis vorgenant hobgůt vnd schaden wol angriffen hefften pfenden bekúmberen vnd vmtriben sont vnd mugent an allen v´nsern ligenden vnd varenden gu^etern in stetten vff wasser vnd vff dem land vnd allenthalben, wâ vnd wie sy wend, es syg mit gericht gaischlichem ald weltlichem ald ân gericht, als dik als lang vnd als vil, v^ntz das sy des vorgenanten hobgůtes vnd schadens gar vnd gantzlich âne allen iren schaden bezalt vnd vssgericht werdent, als vor ist beschaiden, ân geva^erde. Vnd vor der pfandung sol mich vorgenanten gúlten min erben noch die obgedâchten búrgen noch enkain v´nser ligent noch varent gůt in dekain wyse nit schirmen weder gaischlich noch weltlich gericht ban noch âcht noch enkainer schlacht ander sach susz noch so ân all geva^erd. Vnd wie dú vorgenanten kind des angriffens hefftens vnd pfendens och vngevârlich ze schaden koment, den selben schaden mit dem vorgenanten hobgůt sol ich vorgenanter gúlt ald min erben inen ald iren erben och ablegen vnd ab tůn ân all widerred. Ich der selb gúlt genant Cůntz Zo^ebelli hab och die vorgenanten búrgen baid gelopt ze lo^esent by minen gůten trúwen, wie sy von dirre obgedâchten búrgschafft vnd des gůtz wegen iemer ze schaden koment ald ir erben, ob sy enwa^erint, vnd vmb den selben schaden iren worten ze gelôbent ân ayd. Es sol och ma^englichem ze wissent sin von des vorgeschribenn wins wegen, den ich von den kinden vnd irem vogt gekôfft hân, als vor ist beschaiden, das da namlich berett vnd gedinget ist, ob sich erfund an der vacht vnd an den vassen, darinn ich den win gekofft hân, das des selbens wins me wa^er, dann wir ietz v´berschlagen vnd gescha^etzet hând, als die obgeschriben summ geltz wyset, das och dann ich vnd min erben den selben úbrigen win inen vnd iren erben och gantzlichen bezaln vnd vssrichten so^ellint nach dem, als wir des kôffs v´ber ain komen sigint, ân geva^erd ze gelicher wyse, wa^er och, das des wins minder wa^er, dann als vor ist beschaiden, der sol v´ns an der obgedâchten summ den sybentzig pfunt pfenningen ab gân och ân geva^erd. Vnd des alles ze wârem vnd offem vrkúnde so hab ich vorgenanter gúlt Cůntz Zo^ebelli fúr mich vnd min erben min aygen insigel offenlich gehenkt an disen brief, darzů och wir obgenanten búrgen baid Johans Sto^ekli stattamman vnd Hainrich Sto^ekli burger ze Veltkirch v´nsrú aignú insigel offenlich gehenkt habint an disen brief. Der ze Veltkirch geben ward des jares, do man zalt von Cristes gebúrte drúzehenhundert vnd achtzig jar vnd darnach in dem núnden jâr, an dem hailigen abent ze pfingsten.

Source Fulltext: Chartularium Sangallense X, Nr. 6323, S. 567-568.