Wir Cůn von gottes gnaden abt des gotzhus ze sant Gallen¹, das a^vn alles mittel zů geho^ert dem stůl ze Ro^vm, veriehent, das fúr || v´ns kam ze Roschach² in dem dorf vnser vnd vnsers gotzhus lieber dienstman Růdolf von Roschach³ der alt vnd sprach, das der || wingart, den man nempt das Aichholtz⁴, den er ko^vfft ha^vt vmb sinen lieben vettern herr Eglolfen von Roschach⁵ ritter vnd sto^vsset dar||an vnnanvffhin Blarrer Sta^ehellis sa^eligen kind wingart, so sto^vsset denn obnan abher daran des jungen herr V^olrichs von A^emptz⁶ wingart, nempt man och das Aichholtz, sin reht lehen wa^er von v´ns vnd vnserm vorgenanten gotzhus ze sant Gallen, den selben wingarten er sinem lieben brůder Eglolfen von Roschach och vnsers gotzhus dienstman fu^egen vnd in gema^echtz wis machen wo^elt, vnd batt v´ns ernstlich, dz wir vnsern willen vnd gunst darzů geben woltin vnd och im des gundin. Darvmb erhorton wir do sin bett, won si v´ns redlich dunk, vnd fůgt vnd machot do ze stett der egenempt Růdolf von Roschach dem vorgenempten sinen brůder Eglolfen von Roschach den vorgeschribnen wingarten mit aller zůgeho^erd ze ainem rehten gema^echt vnd in rehtz gema^echtz wis vnd fůgt vnd machet och das also mit disem brief, vnd ist diz beschehen vnd redlich vollfu^ert nah vnsers gotzhus gewonhait vnd reht, als es krafft vnd maht haben sol vnd mag ietz vnd hie nah. Vnd des ze offnem vnd warem vrkúnd haben wir abt Cůn da obgenant vnser insigel offenlich gehenkt an disen brief. Ich Růdolf von Roschach der alt des obgeschribnen gotzhus dienstman vergich mit disem brief offenlich, dz alles das war ist, das der hohwirdig fúrst Cůn von gottes gnaden abt des vorgenanten gotzhus ze sant Gallen von mir an disem brief veriehen vnd verschriben ha^vt, vnd des ze noch merer sicherhait han ich och min aigen insigel gehenkt an disen brief. Geben an dem zinstag in der pfingstwuchen in dem jar, do man zalt von Cristi gebúrt tusent drúhundert achtzig vnd nún jar.

Source Fulltext: Chartularium Sangallense X, Nr. 6324, S. 569.