Allen^a) den, die disen brief ansehent lesent oder ho^erent lesen, kúnde ich Cůnrat Schowinger der gewantschnider der iunger burger ze sant Gallen || vnd vergich offenlich an disem brieff von des vrsůchens wegen, als die fromen wisen der burgermaister der rât vnd die burger ze || sant Gallen in minem hus getan vnd gesůcht hant von des geltes wegen, das Cůnrat dem Ho^vnglin verstoln wart, vnd von anders || blunders wegen, daz da ze sant Gallen verstoln wart, des selben geltes vnd blunders etweuil in minem hus erfunden wart, das ich gelopt han willeklich mit miner trúwe vnd loben mit disem brief, das ich die selben burgermaister den rât noch kainen burger noch burgerinen von sant Gallen von der selben getât vnd vrsůchens wegen niemer bekúmberren bekrenken noch vêhen sol noch wil in kain wise noch ieman von minen wegen. Wa^er aber, das ich rehtes gen in darvmb nit enbern wolti, so ist mir das reht behalten, also das ich gelopt han vnd darnach willeklich vngebunden vnd vngeuangen gesworn han ainen gelerten ait zů den hailgen mit v^fgehabnen vingern, das ich die selben burger vnd burgerinen vmb das vorgeschriben vrsůchen vnd vmb alles das, so bis her vff disen húttigen tag, als dirr brief ist geben, v^fgeloffen ist, vnd o^vch vmb alles das, so ich mit der selben stat ze sant Gallen oder mit dehainem burger ald burgerinen ze sant Gallen gemainlich ald sunderlich hinnanhin ze schaffenn hêtt oder ze schaffenn gewunne, v^fftriben vnd reht gen in nemen sol ze sant Gallen in der stat nâch der selben ir stat reht vnd gewonhait vnd nienert anderswâ, ez wa^er denn, das ich da selbs ze sant Gallen rehtlos gelassen wurdi vnd das kuntlich wurdi, so mag ich das reht dann sůchen, wâ dann das billich ist. Vnd des alles ze offemm waren vrkúnde so han ich Cůnrat Schowinger da vorgenemt min insigel offenlich gehenkt an disen brieff, vnd ze merer sicherhait der selben dinge so han ich erbetten den beschaidenn Cůnrat ab der Hůb, den man nemmt den Io^ehler, das er o^vch sin insigel zů minem insigel ze ainer zúgnust aller vorgeschribner sach gehenkt hât an disen brief, des o^vch ich der selb Cůnrat ab der Hůb, den man nemmt der Io^ehler, offenlich vergich an disem brief mir vnd minen erben vnscha^edlich. Dirr brief ist geben an fritag in der pfingstwuchen, do man von Cristus gebúrt zalt drúzehenhundert jâr vnd darnach in dem nún vnd ahtzigosten jâre.

Source Fulltext: Chartularium Sangallense X, Nr. 6325, S. 569-570.