Ich^a) Bilgri Rûssinger der alt vnderuogt ze Rapraswil¹ vergich offenlich mit disem brief allen den, die in ansehent lesent oder horrent lesen, das fur mich kam ze Rapraswil L in der statt, do ich offenlich ze geriht sass an dem tag, alz dirr brief geben ist, der wolbeschaiden Johans Ebnoter vnd Beatrix sin elichi husfrowe vnd offnoton vor L mir in offnem geriht mit irem fursprechen vnd sprachent, das die beschaiden Johans Huber ze Oberhouen² gesessen, Hainrich, Vlrich vnd Cunrat sin elichen sun L vnd Margaret sin elichi tohter mit kinden mit lib vnd mit gut iro lehen warint von dem hohwirdigen fursten Cun abt vnd^b) dem gotzhus ze sant Gallen³, vnd hettint aber die selben Hainrich, Vlrich vnd Cunrat des vorg(enampten) Johansen Hubers elichen sun vnd Margarecht sin elichi tohter sich selb mit kinden mit lib mit gut vnd mit aller zugehord an das erwirdig vor(genampt) gotzhus ze sant Gallen vnd der vorg(enampt) Johans Huber sich selber mit lib mit gut vnd mit aller zugehord an die kilchen zem Willa⁴ im Turbatun⁵ gelegen aines ewigen vnwiderruffenden redlichen koffes gekofft hettint^c) von in mit zwaintzig pfund guten vnd Ytaligern hallern, der si von inen gantzlich gewert warint vnd enpfangen hettint, die selben lut sy och mit kinden mit lib mit gut ligendem vnd varendem vnd mit allen rehten zu des vor(genampten) gotzhus handen vnd der vor(genampten) kilchen hand bringen woltin, vnd baten mich obgen(ampten) rihter erfarn an ainer vrtail, wie sy das tun vnd vollfurren soltin, dz es krafft vnd maht hetti nah dem rehten iez vnd hienach. Vnd do fragt ich obgen(ampter) rihter vrtail vmb vnd ward mit gemainer vrtail ertailt, das die vorgenampt Beatrix des egenempten Johansen Ebnoters elichi wirtinne an des gerihtes ring ainen vogt mit des selben ir elichen mannes willen nemen solt, wen si denn wolt, vmb die sach, vnd der selb ir vogt solt die egen(ampt) Beatrix furren vsser des gerihtes ring dristund vnd si ze ieklichem mal fragen, ob si die vor(genampten) lut mit kinden mit lib mit gut ligendem vnd varendem vnd mit allen rehten gern willenklich frilich vnd vnbetwungenlich vff geben vertgan vnd des vor(genampten) gotzhus vnd och der vor(genampten) kylchen handen bringen wolt, vnd saiti der selb ir vogt ze dem dridten mal bi sinem aid, dz si im gesait hetti, dz si das och also willenklich frilich vnbetwungenlich vnd gern tun wolt, denn so soltin die vorg(enampten) Johans Ebnoter, Beatrix sin elichi husfrow mit iro vnd mit des selben ir vogtes handen die vorgenempten lut mit ir kinden mit lib mit gut ligendem vnd varendem vnd mit allen zugehorden an des gerihtes stab vff geben zu des vor(genampten) gotzhus vnd och der vor(genampten) kilchen handen vnd damit sich enzichen fur sich vnd all ir erben zu des selben gotzhus vnd der vor(genampten) kilchen handen vnd gen den obgenampten luten ir kinden ir lib ir gut ligentz vnd varentz aller aigenschafft aller lehenschafft aller besatzzung aller zugnust aller kuntschafft lut ald brief, die si von der vorg(enampten) lut ir kinden ir lib ir gut ligentz alder varentz ie gehebt hand ald si oder ir erben iemer me gehaben ald gewinnen mohtin, alles rehten gaistlichen vnd weltlichen gerihtes aller vordrung vnd ansprach, die sy^d) daher zu der vorg(enampten) lut ir kind ir lib ir gut ligentz oder varentz zu allem ald zu dehainem besunder gehebt habint ald iro erben von iren wegen iemer me gehaben mohtin ald kundint in dehainen weg an all geuerd, vnd das den das also nah dem rehten wol krafft vnd maht hett vnd haben moht ietz vnd hienah. Vnd do nam die vorg(enampt) Beatrix mit ir elichen mannes willen ze vogt den vesten Johansen von Wilberg genampt von Tossegg⁶, dem ich och die vogtye verleh vmb die sach, alz sitt vnd gewonlich was. Vnd der selb Johans der egen(ampten) Beatrix vogt furt sie vsser des gerihtes ring dristund vnd fragt si ze ieklichem mal vnd sait ze dem dridten mal bi sinem aide, alz im och ertailt ward. Vnd do gaben vff die vorgen(ampten) Johans Ebnoter vnd Beatrix sin elichi husfrowe fur sich vnd all ir erben mit iro vnd des vorg(enampten) Johansen Beatrix vogtz handen die vorg(enampten) Hainrichen, Vlrichen vnd Cunrat Johansen Hubers elichen sun vnd sin tohter Margarethen mit kinden mit lib mit gut ligendem vnd varendem zu des vor(genampten) gotzhus ze sant Gallen handen an des gerihtes stab vnd den vor(genampten) Johansen Huber zu der vor(genampten) kilchen handen an des gerihtes stab vnd verzigen vnd enzigen sich och da mit fur sich vnd all ir erben an des gerihtes stab zu des vor(genampten) gotzhus handen vnd der vor(genampten) kylchen hand^e) vnd gen den vor(genampten) luten ir kinden iro lib ir gut ligentz vnd varentz mit allen den worten vnd artikeln, als och ertailt ward vnd dauorgeschriben stat, zu des vor(genampten) gotzhus ze sant Gallen vnd der vorg(enampten) kilchen zem Willa im Turbatun gelegen handen. Vnd ze vrkund diser ding, die also vor mir dem obgenampten rihter in offnem geriht beschehen vnd vollfurt sint, so han ich min insigel^f) von des gerihtes wegen mit vrtail offenlich gehenkt an disen brief. Ich Johans Ebnoter vergich ain gantz warhait aller vor(genampter) ding, vnd das dis war stat vnd vnwandelber belib von mir vnd minen erben ietz vnd hie nah, so han ich och min aigen insigel fur mich vnd all min erben mit vrtail gehenkt an disen brief. Darnach vergich ich Johans von Wilberg genampt von Tossegg der^g) vorg(enampten) Beatrix Johans Ebnoters elichen husfrowen vogt in dirre sach, das alles das war ist, dz von mir von der vogtye wegen vnd von der selb Beatrix wegen an disem brief verschriben stat, vnd ze merer sicherhait der selben ding han ich och min aigen insigel von der vogtye wegen mit vrtail gehenkt an disen brief mir vnd allen minen erbon gantzlich vnschadlich. Geben ze Rapraswill an dem donstag in der osterwuchen in dem jar, do man zalt von Cristi geburt tusent druhundert vnd nuntzig jar.