Ich^a) Henni Schlosser Cuntzen Moslis seligen sun von Berg¹ tun kunt vnd vergich offenlich fur mich L vnd fur all min erben mit disem brief, daz ich mit guter williger vorbetrachtung vnd mit wolbeLdachtem sinne vnd mut dem erbern man Hansen dem Maiger von Selbnow² dem jungern vnd allen sinen L erben ains rechten redlichen staten vngeuarlichen vnd ewigen koufs ze koffent han gegeben den halben zehenden ze Selbnôw, den ich von minem vatter seligen ererbt han, ellu minu recht mit aller zugehord an dem selben zehenden, der ander taile ist Hansen Maigers dez eltern von Selbnow, vnd sint dis die guter, darab der zehend gat, dez ersten ain helbu juchart akkers ze Selbnow vndern vorchen an der halden, die der alt Hans Maiger buwt, vnd ain helbu juchart akkers ob den vorhen, die Claus Vogler buwt, vnd ab der halden enent dez wegs ze Selbnow, die ob den hofen hin stozt vntz an Clausen Voglers wingarten, vnd ab dem wingarten, der nuwlichs an der selben halden geleit ist, vnd ab der halden mit enander ob Steklis wis, vnd ain helbu juchart in der Ruti³ ze Selbnow, vnd ab dem Dornakker³ hinder der Egg³, vnd ab ainer halben juchart ze den vberganden akren. Vnd darumb hat mir der obgenant Hans Maiger vmb minen tail vnd vmb minu recht dez obgenanten zehenden gegeben ain pfund vnd acht schiling pfening, der ich gentzlich von im gewert vnd bezalt bin. Vnd darumbe so verzich ich mich vnd all min erben an dem selben zehenden mit aller zugehord gen im vnd gen sinen erben aller aigenschaft aller lehenschaft aller vordrung aller ansprach allez rechtz gaistlichs vnd weltlichs rechtz vnd gerichtz vnd alz vnsers rechten. Vnd sont ich vnd min erben dis vorgescriben koufs dez obgenanten Hansen Maigers vnd siner erben recht weren sin an allen den stetten, da si dez nach dem rechten notdurftig sint, âne all geuerd. Vnd dez allez ze offem vnd warem vrkund vnd stater ewiger sicherhait han ich der obgenant Henni Mosli genant Schlosser mich vnd all min erben dez verbunden vnder dez ersamen mannes Swartz Gebtzen dez statammans ze Lindow⁴ insigel, daz er von miner ernstlicher bet wegen fur mich vnd fur min erben an disen brief gehenkt hat, won ich aigens insigels nit han, dez och ich der selb Swartz Gebtz der amman ze Lindow vergich mit vrkund dis briefs mir selb âne schaden. Der geben ward an sant Othtmars abent nach Cristus geburt druzehenhundert iar, darnach in dem ainen vnd nuntzigosten iar.