Ich^a) Burkart von Kempten¹, den man nempt Tarmgurtel, tun kunt vnd vergich offenlich vor aller manglichem L mit disem brief, daz ich mit wolbedahtem mut vnd guter vorbetrahtung der wisen fursihtigen des burgerLmaisters des rates vnd der burger gemainlich ze sant Gallen getruwer diener worden bin wider Bilgrin L von Wolhusen² vnd wider sin helffer, vnd also, daz ich in wider den selben Bilgrin von Wolhusen beraten vnd beholffen sin sol mit minem libe, so verre ich kan oder mag, ân geuarde, mit solichem gedinge, beschach daz in der selb Bilgri von Wolhusen mit miner hilff vnd mit minem rat in iro gewalt wurde, daz su sin sicher warint, waz mich danne die ersamen Cristan Voli, Vlrich Spiesser vnd Hainrich Krum burger ze sant Gallen alle gemainlich oder der mer tail vnder in vmb min arbait vnd vmb minen dienst haissent nemen von den obgenanten dem burgermaister dem rat vnd gemainer stat ze sant Gallen, daz ich mich des willeklich lass benugen vnd su nut furo an kom noch bekumberre weder mit geriht noch ân reht noch in kain wis. War aber, daz in der selb Bilgri von Wolhusen mit miner hilff vnd mit minem rat in ir gewalt niht wurde, so sint mir die obgenanten der burgermaister der rat vnd die burger all gemainlich ze sant Gallen noch ir dehainer besunder vmb den vorgedahten minen dienst vnd vmb min arbait niht haft noch gebunden ze gebenn noch ze tunne. War aber, daz su mir zergelt geben hettint, den selben schaden vnd costung sont su och han. Ich han och willeklich gesworn ainen gelerten aide liplich ze got vnd ze den hailigen mit vf gehabenen vingern dem vorgenanten dem burgermaister dem rat vnd gemainer stat ze sant Gallen truw vnd warhait vnd alle vorgeschriben artikel ze laistenn ze tunne vnd ze vollefurenn, so verre ich mag, ân geuarde. Vnd dez alles ze offem warem vrkunde so han ich Burkart von Kempten da vorgenant erbetten den beschaidenn Herman Blumen burger ze sant Gallen, daz er sin insigel fur mich gehenkt hat an disen brief, vnder dez selben insigel ich mich willeklich gebunden han, won ich aigens insigels niht han, des och ich obgenanter Herman Blum offenlich vergich an disem brief mir vnd allen minen erben vnschadlich. Dirre brief ist geben ze sant Gallen an dem nahsten sunnentag nach sant Hylarien tag in dem jar, do von Cristus geburt warent druzehenhundert jâr, nunzig jar vnd darnach in dem dritten jare.