Wir Elsbetha Rudlingerin von gottes verhangd eptisschin vnd der conuent gemeinlich des gotzhus ze Tannikon¹ sant Bernhartz ordens tun kunt vnd verieLichen offenlich mit disem brief fur vns vnd vnser nachkomen, die wir vesteklich hie zu binden, dz wir dur nutz vnd noturft vnser vnd vnsers gotzLhus mit einhalligem rat vnd guter vorbetrachtung recht vnd redlich ze koffen geben hand der erberren geistlichen frowen fro Elsinen von Lindenberg² vnser L conuent frowen ein mut kernen geltes vnd ein mut haber geltes ewiges zins vnd Wiler³ mess, dar vmb wir empfangen haben vnd in vnsers gotzhus schinberren nutz bekert haben sechzechen pfund haller guter vnd genemer hie vnd in dem land, och begert die vorgenant von Lindenberg sichereit vmb den vorgenanten zins, den setzen wir ir vff des gotzhus kasten vnd vff allu du guter, die dz gotzhus het, den selben zins si eweklich geordnet het der kustrin dur ir fordren sel willen, den man iarlich weren sol vff sant Martis tag einer ieklichen, die denn ze mal kustrin ist, mit denen gedingen, dz si sol besorgen vff der von Lindenberg grab ein licht, dz ewig si nach dem vnd hie nach geschriben stat, wenn man gumplet anzuchet, so sol man dz licht an zunden vnd sol brunnen vntz mornendes an den tag, dis sol si besorgen mit dem obgenanten mut kernen. Och het si dar vmb den obgenanten mut haber vf gesetzet der obgenanten kustrie, dz si sol kertzen besorgen vff du obgenanten greber, wenn man ir iartzit vnd ir behugten begat. Disen obgenanten kof vnd vfsatzung loben wir war vnd stet ze halten bi guten truwen. Vnd des ze einem waren vrkund so han wir du obgenant eptisschin vnd conuent vnsru eigen­ni hangendu ingesigel her an gehenket zu einer meren sicherheit aller diser dingen. Dis beschach vnd ward diser brief geben in dem iar, do man zalt von Cristus geburt drizehen hundert vnd dar nach in dem dru vnd nuntzgosten iar, an dem nechsten sonnentag ze mitter vasten.