Wir^a) die nahgenempten ffrow Clement geborn von Toggenburg¹ wilent herr Hainrichs saligen herren ze Hêwen fryen vnd ritters êlichi L husfrow, Peter vnd Wolfhart herren ze Hewen² ir êlichen sun veriehen vnd tund kund offenlich mit disem brief fur vns vnd alle vnser L erben allen den, die in ansehent lesent oder horrent lesen, alz disu nahgeschribnen lut vnd guter, item des ersten, item Bernatzell³ mit lut vnd guLtern, item der kelnhof ze Helfentswil⁴ mit allen nutzzen luten schuppassen vnd andern gutern da selbs gelegen, die darin vnd darzu gehorrent, item den kelnhof ze Rikkenbach⁵, item vnd den zehenden ze Rikkenbach mit allen luten vnd gutern vnser pfand sind von dem erwirdigen gotzhus ze sant Gallen, sol man wissen, das wir da mit wolbedahtem sinn vnd mut ainhelleklich vnd nach^b) vnser frund rat die vorgenanten lut vnd guter, item Bernatzell mit lut vnd gutern, item den kelnhof ze Helfentswil mit allen nutzen, als vorgenant stat, item den kelnhof ze Rikkenbach, item vnd den zehenden ze Rikkenbach mit luten rehten nutzzen vnd zugehorden, als vorgeschriben stat vnd als wir das alles in pfandes wîs inne gehebt vnd genossen habent, ledklich vnd ffrylich gantzlich ledig vnd los gelassen habent vnd lassent vnd sagent si fur vns vnd alle vnser erben ledig vnd los mit disem brief dem hohwirdigen fursten vnserm gnadigen herren Cunen von gottes gnaden abt des gotzhus ze sant Gallen⁶ sinen nahkomen vnd dem selben sinem gotzhus ze sant Gallen mit der beschaidenhait, das der selb vnser gnadiger herr abt Cun sin nahkomen vnd das vorgenant gotzhus ze sant Gallen nu hinnanhin die vorgeschribnen lut guter vnd zehenden mit aller ir zugehord haben niessen besezzen vnd entsetzzen sond vnd mugent, wie si dunk, das es dem gotzhus nûtzlich si, vnd sollent och wir noch vnser erben noch nieman andrer an vnser statt noch von vnsern wegen si daran nut sûmen noch ierren in dehainen weg an all geuerd. Vnd habent darvmb von dem selben vnserm herren abt Cun enpfangen vnd hat vns och gewert gantzlich vnd gar zwai tusent vnd vierzig guldin guter an gold vnd vollswar an der gewiht, mit der beschaidenhait vnd gedingde, wenn der selb vnser gnadiger herre abt Cun oder sin nahkomen die andern guter von vns oder vnsern erben, ob wir enwarint, losen wellent, das denn die vorgenanten guldin dem selben vnserm gnadigen herren abt Cunen sinen nahkomen vnd dem vorgenanten gotzhus ze sant Gallen an der summ des geltz nah rechnung abgan sond, vnd sol vns denn souil dester minder werden an der losung. Vnd darvmb so habent wir vns verzigen vnd verzichent vns och mit disem brief fur vns vnd all vnser erben aller der brief vnd kuntschafft, die wir oder vnser erben von der selben vorgenanten lut vnd guter wegen ietz hand oder hienach von vns oder vnsern erben funden wurden, hin zu des egenempten vnsers gnadigen herren abt Cunen siner nahkomen vnd sines vorgenanten gotzhus ze sant Gallen handen. Vnd darvmb das dis alles, so hie vorgenant stât, von vns vnd allen vnsern erben stat vnd vnwandelber belib ietz vnd hie nah, so habent wir allu dru vnsri aignen insigel ze ainr vrkund der warhait offenlich gehenkt an disen brief. Darzu haben wir erbetten den erwirdigen vnsern gnadigen herren Burkard von gottes gnaden bischoff ze Costentz⁷ vnd her Johansen herren ze Hewen⁸ fryen vnd ritter min der egenanten frow Clementen bruder vnd vnser Peters vnd Wolfartz herren ze Hewen rehten vetter, das si ze ainer zugnust vnd merer sicherhait aller vorgenanter ding iru aigenen insigel zu vnsern insigeln offenlich gehenkt hand an disen brief, des och wir die vorgenanten Burkart von gottes gnaden bischoff ze Costentz vnd och ich Johans herre ze Hêwen frye vnd ritter veriehent mit disem offenn brief, das wir von ernstlicher bett wegen vnser lieben swoster ffro Clementen geborn von Toggenburg wilent herr Hainrichs herren ze Hewen fryen vnd ritter vnsers brudern saligen elichi husfrow vnd herr Petern vnd Wolfhartz herren ze Hêwen der selben vnser swoster vnd vnsers bruders saligen elichen sun vnser vettern vnsri aignen insigel ze ainer zugnust vnd merer sicherhait alles des, so an disem brief verschriben stat, offenlich gehenkt hand an disen brief. Der geben ist ze Engen⁹ in vnser statt an vnser lieben ffrowen abent ze mittem ogsten in dem jar, do man zalt von Cristi geburt dusent druhundert nuntzig vnd vier jar.